Nagpur Crime : क्षुल्लक वादातून पेट्रोल पंपावर टोळक्याची दादागिरी; महिलेला धक्काबुक्की, लोटांगण घालून पाया पडायला लावलं
Nagpur Crime : नागपुरात पेट्रोल पंपावर झालेल्या किरकोळ वादानंतर टवाळखोर तरुणांच्या जमावानं पेट्रोल पंप चालवणाऱ्या 44 वर्षीय महिलेला तरुणांच्या पायावर लोटांगण घालून सार्वजनिकरित्या माफी मागण्यास भाग पाडलं.
Nagpur Crime : राज्याची उपराजधानी समजल्या जाणाऱ्या नागपुरात (Nagpur) नेमकं चाललंय काय? असा प्रश्न आता सर्वांना पडला आहे. नागपुरात एका पेट्रोल पंप चालक महिलेला धक्काबुक्की करण्यात आली आहे. क्षुल्लक वादातून पेट्रोल पंपावर टोळक्याची दादागिरी पाहायला मिळाली. वाद फारच विकोपाला गेला आणि त्यानंतर पेट्रोलपंप चालक महिलेला पायावर लोटांगण घेत माफी मागण्यास टोळक्यानं भाग पाडलं. टोळकं एवढ्यावर थांबलं नाही, तर त्यांनी त्यानंतर या घटनेचे व्हिडीओ सोशल मीडियावर व्हायरल केले.
नागपुरात पेट्रोल पंपावर झालेल्या किरकोळ वादानंतर टवाळखोर तरुणांच्या जमावानं पेट्रोल पंप चालवणाऱ्या 44 वर्षीय महिलेला तरुणांच्या पायावर लोटांगण घालून सार्वजनिकरित्या माफी मागण्यास भाग पाडलं. त्यानंतर तिच्या माफिचे ते व्हिडीओ परिसरात तिची बदनामी करत आपली दादागिरी प्रस्थापित करण्याच्या उद्दिष्टानं व्हायरल केले. या घटनेचे व्हिडीओ व्हायरल झाल्यानंतर पोलिसांनी गुन्हा दाखल करत तीन जणांना अटक केली आहे.
प्रकरण नेमकं काय?
18 डिसेंबरच्या रात्री दहा वाजता नागपूर हिंगणा रोडवरील इलेक्ट्रिक झोन चौकावर पीडित महिला सुचित्रा लोहकरे आपल्या पेट्रोल पंपावर उपस्थित होती. त्यावेळी एका बाईकवर आलेल्या दोन तरुण पेट्रोल पंपावर काम नसताना इकडे तिकडे फिरू लागले. त्यामुळे पेट्रोल पंप संचालिका सुचित्रा लोहकरे यांनी त्यांना हटकलं. या मुद्द्यावर दोन्ही तरुणांचा सुचित्रासोबत शाब्दिक वाद आणि धक्काबुक्की सुद्धा झाली. थोड्यावेळानंतर वाद घालणारे तरुण परिसरातील आपल्या गुंड प्रवृत्तीच्या इतर सहकाऱ्यांना घेऊन आले. रात्री दहा वाजताच्या सुमारास पेट्रोल पंपावर आलेल्या या जमावानं जोरदार गोंधळ तर घातलाच. सोबतच इलेक्ट्रिक झोन चौकावर आमची दादागिरी चालते, इथे एवढा मोठा कोण झाला आहे? जो आमच्या सहकाऱ्यांना दमदाटी करेल, असं सांगत सुचित्रा लोहकरे यांनी माफी मागावी असा दबाव आणला.
रात्रीच्या वेळी एवढा मोठा जमाव आपल्या विरोधात पेट्रोल पंपावर आला आहे, हे लक्षात घेऊन सुचित्रा यांनी शाब्दिक माफी मागितली. मात्र जमावाचा नेतृत्व करणारा राजेश मिश्रा नावाचा व्यक्ती ज्या तरुणांशी तुम्ही वाद घातला होता, त्यांच्या पायावर लोटांगण घालून माफी मागावी लागेल, असा हट्ट धरून होता. त्यामुळे जमावाच्या दबावापुढे नमतं घेत सुचित्रा लोहकरे यांना पायावर लोटांगण घालत माफी मागावी लागली. जमावातील काही टवाळखोर तरुणांनी तो व्हिडीओ चित्रित करून परिसरात सुचित्रा यांचा सार्वजनिक अवमान करण्यासाठी व्हायरल केला.
दरम्यान, व्हिडीओ वायरल झाल्यानंतर पोलिसांनी या प्रकरणी तपास करत गुन्हा दाखल केला. धमकावणं, शिवीगाळ करणं, विनयभंग करणं अशा विविध कलमान्वये राजेश मिश्रा आणि त्याच्या काही सहकाऱ्यांविरोधात गुन्हा दाखल करत तिघांना अटकही केली आहे.
महत्त्वाच्या बातम्या
ट्रेंडिंग न्यूज
