Success Story : नोकरी सोडून कोरफडीची शेती, गावातच सुरु केली कंपनी; भंडाऱ्याचा खेमराज कमावतोय लाखोंचा नफा

Success Story : भंडारा (Bhandara) जिल्ह्याच्या लाखांदूर तालुक्यातील रोहणी या गावातील तरुण नोकरी सोडून कोरफडीची (Aloe vera) शेती करत आहे. या शेतीतून तो लाखो रुपयांचा नफा कमवत आहे.

Agriculture News Aloe vera bhandara

Success Story : अलिकडच्या काळात काही तरुण शेतकरी (Farmers) शेतात नवनवीन प्रयोग करताना दिसत आहेत. पारंपारिक पद्धतीनं शेती न करता आधुनिक पध्दतीनं शेती करत आहेत. तर काही उच्चशिक्षीत तरुण नोकरी न करता शेती करताना दिसत आहेत. भंडारा (Bhandara) जिल्ह्याच्या लाखांदूर तालुक्यातील रोहणी या गावातील तरुण नोकरी सोडून कोरफडीची (Aloe vera) शेती करत आहे. यामधून तो लाखो रुपये कमावतोय. खेमराज भुते (Khemraj Bhute) असं या तरुण शेतकऱ्याचे नाव आहे. 

खेमराज भुते यांनी एम फार्मपर्यंत शिक्षण घेतल्यानंतर एका मोठ्या कंपनीत फार्मासिटिकल्सची नोकरी सांभाळली. मात्र, दुसऱ्याची नोकरी करण्यापेक्षा गावातील वडिलोपार्जित शेतीत काहीतरी नवीन करुन स्वतःचा उद्योग उभारावा, यासाठी नोकरी सोडून गाव गाठणाऱ्या पठ्ठ्यानं शेतात कोरफडीची लागवड केली. आता गावातच स्वतःची कंपनी सुरु केली आहे. या माध्यमातून उत्पादित ज्यूस, जेल, फूड आणि स्किन केअर प्रॉडक्ट राज्यातच नव्हे तर सातासमुद्रापार अमेरिका, जर्मनी, रशिया आणि दुबईपर्यंत पोहोचलं आहे. त्यांच्या उत्पादनाला मोठी मागणी वाढल्यानं, सोडलेल्या नोकरीचे फलित झाल्याचं समाधान भुते यांनी व्यक्त केलं.

साडेतीन एकरात नाविन्यपूर्ण कोरफडीची शेती

भंडारा जिल्ह्याच्या लाखांदूर तालुक्यातील जेमतेम तीन हजार लोकवस्तीच्या रोहणी या गावातील खेमराज भुते हे यशस्वी उद्योजक आहेत. एम फार्मपर्यंतचे शिक्षण घेतलेल्या खेमराज भुते यांनी सुरुवातीला एका मोठ्या कंपनीत फार्मासिटिकलस् म्हणून नोकरी सांभाळली. मात्र, स्वतःच्या अंगात गुण असतानाही दुसऱ्याकडे नोकरी का करावी, या उद्देशानं झपाटलेल्या खेमराज यांनी कालांतराने नोकरी सोडत थेट गाव गाठलं. वडीलोपार्जित शेतीतील साडेतीन एकरात खेमराजनं नाविन्यपूर्ण कोरफडीची शेती केली. सुरुवातीला गावातील अनेकांनी त्याला याबाबत उपदेशाचे डोज पाजलेत. मात्र, आता तेच लोक याचा यशस्वी उद्योग बघून त्याच्याकडं नाविन्यपूर्ण शेतीसाठी मार्गदर्शन घेत आहेत. 

भारतासह अमेरिका, जर्मनी, रशिया, दुबईतून प्रॉडक्टला मागणी 

पारंपरिक धान पिकाला फाटा देऊन खेमराजनं केलेल्या या कोरफडीच्या शेतीसह लघु उद्योगातून गावातील 15 ते 20 जणांना रोजगार मिळाला आहे. कोरफडीतून आता छोट्याशा रोहिणी या गावातच शरीराला आरोग्यवर्धक ज्यूस, चेहऱ्याला लावणारे विविध प्रकारचे स्किन केअर जेल, खाद्यपदार्थ याची निर्मिती करण्यात येत आहे. मोठमोठ्या कंपन्यांच्या तुलनेत खेमराजच्या कंपनीतून तयार होणाऱ्या प्रॉडक्टची किंमतही कमी आहे. यामुळं परिसरात त्यांच्या प्रॉडक्टला मोठी मागणी आहे. एवढेच नव्हे तर, राज्यातील कानाकोपऱ्यात त्यांचे प्रॉडक्ट विकलं जात असून, आता तर अमेरिका, जर्मनी, रशिया, दुबईसह अन्य देशातही त्यांच्या प्रॉडक्टला मोठी मागणी वाढली आहे. 

साडेतीन एकरात निव्वळ तीन लाखांचा नफा

वडिलोपार्जित साडेतीन एकरात लावलेल्या कोरफडीच्या शेतीतून त्यांना 65 हजार रुपये वार्षिक खर्च येतो. त्यातून त्यांना तीन लाखांचा निव्वळ नफा प्राप्त होत आहे. पहिला प्रयोग यशस्वी झाल्यानं आता त्यांनी गावातील अन्य एकरबर शेती भाडेतत्त्वावर घेतली असून, त्यातही त्यांनी आता कोरफडीची लागवड केली आहे. या माध्यमातून धान पिकापेक्षा आधुनिक शेतीतून त्यांनी मोठी आर्थिक प्रगती साधली आहे.

महत्त्वाच्या बातम्या: