Ujani Dam Water : शरद पवार यांच्या उपस्थितीत उजनीच्या पाण्यासंदर्भात महत्त्वाची बैठक

पुण्यातील निसर्ग मंगल कार्यालयात राष्ट्रवादी काँग्रेसचे अध्यक्ष शरद पवार, प्रदेशाध्यक्ष जयंत पाटील, उपमुख्यमंत्री अजित पवार आणि सोलापुरचे पालकमंत्री दत्तात्रय भरणे यांच्यात बैठक सुरु आहे. काल देखील दत्तात्रय भरणे यांनी बारामतीतील गोविंद बागेमध्ये जाऊन शरद पवारांची भेट घेतली होती. उजनीच्या पाणी प्रश्नावरुन सोलापूरचे पालकमंत्री असलेल्या दत्तात्रय भरणे यांची कोंडी करण्याचा प्रयत्न होत आहे. त्यामध्ये राष्ट्रवादी काँग्रेसचे स्थानिक नेतेही सहभागी आहेत. त्यामुळे दत्तात्रय भरणे सोलापूरचे पालकमंत्रीपद सोडणार किंवा त्यांच्याकडून ते पद काढून घेतले जाणार अशी चर्चा सुरु आहे. उजनी धरणातील सोलापुरच्या वाट्याचे पाणी इंदापूरला नेण्याचा प्रयत्न होत असल्याचा आरोप सोलापूर जिल्ह्यातील नेत्यांनी केला होता. त्यानंतर जलसंपदा मंत्री जयंत पाटील यांनी तो निर्णय रद्द केला होता. मात्र त्यानंतर दत्तात्रय भरणे यांचा मतदारसंघ असलेल्या इंदापूर तालुक्यात उजनीच्या पाण्यासाठी आंदोलन करण्यात आले.