Bharat Gogawale Oath Ceremony : शिवसेनेला किती खाती मिळणार? भरत गोगावलेंनी स्पष्टच सांगितलं

Bharat Gogawale Oath Ceremony : शिवसेनेला किती खाती मिळणार? भरत गोगावलेंनी स्पष्टच सांगितलं

मुंबई: महायुती सरकारच्या शपथविधी सोहळ्याला अवघे काही तास उरले असताना एकनाथ शिंदे हे गुरुवारी उपमुख्यमंत्रिपदाची शपथ घेणार की नाही, याबाबतचा सस्पेन्स अजूनही कायम आहे. बुधवारी दिवसभरात दोनवेळा देवेंद्र फडणवीस (CM Devendra Fadnavis) यांनी एकनाथ शिंदे यांची वर्षा निवासस्थानी भेट घेतली. मात्र, एकनाथ शिंदे हे गृहमंत्रिपदाबाबत ठाम असल्यामुळे खातेवाटपाबाबत तोडगा निघू शकलेला नाही. त्यामुळे गुरुवारी मुंबईतील आझाद मैदानावर होऊ घातलेल्या शपथविधी सोहळ्यात (Mahayuti Oath Taking Ceremony) मुख्यमंत्री, दोन उपमुख्यमंत्री आणि काही मंत्री शपथ घेणार किंवा फक्त देवेंद्र फडणवीस हे मुख्यमंत्रीपद आणि अजित पवार हे उपमुख्यमंत्रिपदाची शपथ घेणार, याकडे राजकीय वर्तुळाचे लक्ष लागले आहे. 

एकनाथ शिंदे यांनी शपथविधीचा मुहूर्त जवळ येऊन ठेपला तरी गृहमंत्रिपदाची आपली मागणी लावून धरली आहे. मुख्यमंत्री, उपमुख्यमंत्र्यांसोबत काही मंत्र्यांचाही आज शपथविधी व्हावा, ही एकनाथ शिंदे यांची मागणी आहे. शिवसेनेला अपेक्षित खाती आणि संभाव्य मंत्र्यांबाबतही त्यांनी काल देवेंद्र फडणवीस यांच्याशी चर्चा केली. मात्र, या चर्चेतून कोणताही तोडगा न निघाल्याने आता भाजपमधील वरिष्ठांशी चर्चा करुन कळवतो, असे देवेंद्र फडणवीस यांनी एकनाथ शिंदे यांना सांगितल्याचे समजते.