टीम इंडियाच्या नव्या जर्सीला स्वदेशी जागरण मंचचा विरोध!

मुंबई: ‘ओप्पो’ ही मोबाईल उत्पादक कंपनी टीम इंडियाचा नवा पुरस्कर्ता झाली आहे. भारतीय संघाच्या नव्या जर्सीचं अनावरणही करण्यात आलं. पण आता याच जर्सीला आरएसएसशी निगडीत एका संघटनेनं विरोध केला आहे. क्रीडा मंत्रालयाने यामध्ये हस्तक्षेप करुन ही ओप्पो आणि बीसीसीआयचा करार संपुष्टात आणावा अशी मागणी स्वदेशी जागरण मंचने केली आहे. ओप्पो ही चीनी कंपनी असल्यानं या संघटनेनं जर्सीला विरोध केला आहे. स्वदेशी वस्तूंचे उत्पादन आणि वापर याच्या अभियानासाठी स्वदेशी जागरण मंचाने अभियान सुरु केलं आहे. त्यासाठीच या जर्सीला त्यांनी विरोध केला आहे. या संघटनेकडून केंद्रीय क्रीडा मंत्री विजय गोयल यांना एक पत्र लिहण्यात आलं आहे. 'राष्ट्राभिमान आणि आपल्या नागरिकांचे उद्योगांचे कल्याण यापेक्षा पैसा महत्वाचा नाही. यासाठी आम्ही तुम्हाला या प्रकरणात हस्तक्षेप करुन ओप्पो आणि बीसीसीआयमधील करार संपुष्टात आणण्याची मागणी करत आहोत. 'भारतीय क्रिकेट संघातील खेळाडूंनी ओप्पो लिहलेली जर्सी घालू नये' अशी मागणी या संघटनेचे राष्ट्रीय सहसंयोजक अश्वनी महाजन यांनी केली आहे. ‘ओप्पो’ ही मोबाईल उत्पादक कंपनी टीम इंडियाची नवी पुरस्कर्ता आहे. ‘स्टार इंडिया’ ही स्पोर्ट्स नेटवर्क कंपनी 2013 सालापासून टीम इंडियाची मुख्य पुरस्कर्ता होती. पण आता एक एप्रिल 2017 ते 31 मार्च 2022 या पाच वर्षांसाठी टीम इंडियाच्या मुख्य पुरस्कर्त्याचे हक्क ‘ओप्पो’ने मिळवले आहेत. या कालावधीत टीम इंडियाच्या शिलेदारांच्या पोशाखावर ‘ओप्पो’चा लोगोही पाहायला मिळेल. या पाच वर्षांत भारतीय संघ मायदेशात 14 आणि परदेशात 20 मालिकांमध्ये खेळणार आहे.  याच कालावधीत आयसीसी चॅम्पियन्स ट्रॉफी, आयसीसी क्रिकेट विश्वचषक आणि ट्वेन्टी ट्वेन्टी विश्वचषकही खेळवण्यात येणार आहे. ‘ओप्पो’ने 1079 कोटी रुपयांना टीम इंडियाची स्पॉन्सरशिप विकत घेतली आहे. ओप्पोला प्रत्येक द्विपक्षीय सामन्यांसाठी 4.61 कोटी तर आयसीसी मालिकेसाठी 1.56 कोटी रुपये मोजावे लागतील. एवढी किंमत मोजणारी ‘ओप्पो’ ही आतापर्यंतची सर्वात मोठी कंपनी आहे. यापूर्वी ‘सहारा’कडून प्रत्येक सामन्यासाठी सर्वाधिक 3.34 कोटी रुपये दिले जात होते. तर स्टार इंडियाकडून प्रत्येक सामन्यासाठी 1.90 कोटी रुपये आणि आयसीसीच्या मालिकांसाठी 61 लाख रुपये दिले जायचे. संबंधित बातम्या: 'ओप्पो' कंपनी टीम इंडियाची नवी पुरस्कर्ता!