Rohit Sharma: कोलकाताविरुद्ध रोहित शर्मा इम्पॅक्ट प्लेयर म्हणून का खेळला?; टी-20 विश्वचषकाआधी चिंता वाढवणारी बातमी

IPL 2024 MI vs KKR: कोलकाताविरुद्ध झालेल्या सामन्यात रोहित शर्माला प्लेइंग इलेव्हनमध्ये सामील न केल्यानं विविध चर्चा रंगल्या होत्या.

Rohit sharma

Source : BCCI/IPL

IPL 2024 MI vs KKR: मुंबई इंडियन्स (MI) आणि कोलकाता नाइट रायडर्स (KKR) यांच्यात काल झालेल्या सामन्यात कोलकाताने बाजी मारली. कोलकाताने 24 धावांनी मुंबईचा पराभव केला. या पराभवामुळे मुंबईचं यंदाच्या हंगामातील आव्हान देखील संपुष्टात आलं आहे. मुंबईतील वानखेडे मैदानावर झालेल्या या सामन्यात कोलकात्यानं दिलेल्या 170 धावांच्या आव्हानाचा पाठलाग करताना मुंबईला 145 धावाच करता आल्या.

कोलकाताविरुद्ध झालेल्या सामन्यात रोहित शर्माला (Rohit Sharma) प्लेइंग इलेव्हनमध्ये सामील न केल्यानं विविध चर्चा रंगल्या होत्या. यानंतर इम्पॅक्ट प्लेयर म्हणून मैदानात उतरला होता. रोहितने काल फक्त फलंदाजी केली. त्याने 12 चेंडूत 11 धावा केल्या.  इम्पॅक्ट प्लेयर म्हणून रोहित मैदानात उतरल्याने अनेक प्रश्न उपस्थित केले जात आहेत. याचदरम्यान एक मोठी अपडेट समोर आली आहे. 

रोहित शर्माला पाठदुखीचा त्रास पुन्हा होऊ लागला आहे. याचकारणामुळे कोलकाताविरुद्ध तो इम्पॅक्ट प्लेयर म्हणून मैदानात उतरला. आगामी टी-20 विश्वचषक असताना रोहित शर्माला पाठदुखीचा त्रास होणं म्हणजे भारतीयांसाठी एक चिंतेची बाब आहे. मुंबई इंडियन्सचा फिरकीपटू पियुष चावलाने रोहित शर्माला होणाऱ्या पाठदुखीच्या त्रासाची माहिती दिली आहे. 

पियुष चावला नेमकं काय म्हणाला? 

सामना संपल्यानंतर बोलताना मुंबई इंडियन्सचा फिरकी गोलंदाज पियुष चावलाने रोहित शर्मा मुख्य प्लेइंग इलेव्हनमध्ये का नव्हता? त्याचा खुलासा केला. “रोहितला सौम्य पाठदुखीचा त्रास जाणवत होता. खबरदारी म्हणून त्याचा प्लेइंग इलेव्हनमध्ये समावेश केला नाही” असं चावला म्हणाला.

मुंबईचा पराभव-

केकेआरने पहिल्या खेळात 169 धावा केल्या होत्या, ज्यासाठी व्यंकटेश अय्यरने 70 धावांची शानदार खेळी केली. लक्ष्याचा पाठलाग करण्यासाठी मुंबई इंडियन्स मैदानात उतरली तेव्हा संघाची सुरुवात खूपच खराब झाली होती. संघाने 46 धावांत 3 विकेट गमावल्या होत्या. रोहित शर्मा 11 धावा, इशान किशन 13 आणि नमन धीर 11 धावाच करू शकला. सूर्यकुमार यादव खंबीरपणे उभा राहिला, पण दुसऱ्या टोकाकडून सातत्याने विकेट पडत होत्या. सूर्यकुमार यादवने 35 चेंडूत 56 धावा केल्या, त्यादरम्यान त्याने 6 चौकार आणि 2 षटकारही लगावले. 

टी20 विश्वचषकासाठी भारतीय संघ: (India Squad For ICC T-20 World Cup 2024)

रोहित शर्मा(कर्णधार), यशस्वी जयस्वाल, विराट कोहली, सूर्यकुमार यादव, ऋषभ पंत (विकेटकीपर), संजू सॅमसन (विकेटकीपर), हार्दिक पांड्या (उपकर्णधार), शिवम दुबे, रवींद्र जाडेजा, अक्षर पटेल, कुलदीप यादव, युजवेंद्र चहल, अर्शदीप सिंह, जसप्रीत बुमराह, मोहम्मद सिराज. 

राखीव खेळाडू- शुभमन गिल, रिंकू सिंग, आवेश खान, खलील अहमद 

भारतीय संघाचे वेळापत्रक

5 जून - वि. आयर्लंड, न्यू यॉर्क
9 जून - वि. पाकिस्तान. न्यू यॉर्क
12 जून - वि. अमेरिका, न्यू यॉर्क
15 जून - वि. कॅनडा, फ्लोरिडा 

संबंधित बातम्या: