Pune Traffic: पुण्यातील सिंहगड रस्त्यावर भीषण वाहतूक कोंडी; वाहनांच्या लांबच लांब रांगा, पुणेकर वैतागले

सतत कोसळणाऱ्या पावसामुळे अनेक ठिकाणी रस्ते जलमय झाले असून, वाहतुकीवर मोठा परिणाम झाला आहे.

Pune Traffic Jam

आज मंगळवारी सकाळपासून सिंहगड रस्त्यावर प्रचंड वाहतूक कोंडी झाली असून विठ्ठलवाडी परिसरात वाहनांच्या लांबच लांब रांगा लागल्या आहेत.

सकाळपासून पुण्यात जोरदार पाऊस सुरू आहे. मुसळधार पावसामुळे शहरातील अनेक रस्ते जलमय झालेत.

गेल्या काही दिवसांपासून सुरू असलेल्या मुसळधार पावसाने रस्त्यांवर खड्डे पडले आहेत. यामुळे वाहनांची गती मंदावते, आणि त्याचा परिणाम वाहतुकीच्या कोंडीत दिसून येतो.

त्यातच सिंहगड रोडवरील नव्याने उभारण्यात आलेल्या उड्डाणपूलाचे अद्याप लोकार्पण झालेले नाही. त्यामुळे वाहतुकीचा ताण अजूनही इतर रस्त्यांवरच वाढतो आहे.

सिंहगड रस्ता हा पुण्यातील महत्त्वाचा आणि दैनंदिन लाखो वाहनांची वर्दळ असलेला मार्ग आहे. मात्र वारंवार होणारी वाहतूक कोंडी, खड्डेमय रस्ते, तसेच पर्यायी रस्त्यांचा अभाव यामुळे पुणेकर त्रस्त झाले आहेत.

शहरातील वाहतुकीवरही पावसाचा मोठा परिणाम झाला आहे. सिंहगड रोड, कोथरूड, स्वारगेट, कात्रज आणि नगर रोड परिसरात पाणी साचल्याने वाहनांच्या लांबच लांब रांगा लागल्या.

मागील काही दिवसांपासून पुण्यात आणि आसपासच्या परिसरात मुसळधार पाऊस सुरू आहे.