Miss Universe 2020: मिस मेक्सिको Andrea Meza ठरली 'मिस युनिव्हर्स', पटकावला सर्वोच्च सौंदर्यवतीचा मुकुट

Feature_Photo_4_(1)

मिस मेक्सिको असलेल्या अन्ड्रिया मेझाने 69 वा 'मिस युनिव्हर्स 2020' चा किताब पटकावला आहे. असा किताब पटकावणारी ती तिसरी मेक्सिकन सौंदर्यवती ठरली आहे.

फ्लोराडिया या ठिकाणी आयोजित करण्यात आलेल्या या स्पर्धेत अन्ड्रिया मेझाने इतर 73 सौंदर्यवतींना मागे टाकत हा किताब पटकावला आहे.

या स्पर्धेत भारताचे प्रतिनिधित्व करणारी अॅडलिन कॅसेलिनोने पहिल्या पाचमध्ये स्थान पटकावलं आहे.

गेल्या वर्षीची सौंदर्यवती दक्षिण आफ्रिकेच्या झोजिबिनी तुन्झी हिने 26 वर्षीय मेझाच्या डोक्यावर मिस युनिव्हर्सचा मुकुट घातला.

अंतिम फेरीत अन्ड्रिया मेझाला विचारण्यात आलं होतं की, जर तुम्ही तुमच्या देशाच्या नेत्या असत्या तर कोरोनाशी कशा प्रकारे लढा दिला असता?

त्यावर अन्ड्रिया मेझाने उत्तर दिलं की, यावर निश्चित असा उपाय नाही, पण परिस्थिती हाताबाहेर जायच्या आधीच मी लॉकडाऊनचा निर्णय घेतला असता. त्यामुळे मृत्यूंमध्ये घट आली असती.

माझ्यासाठी सौंदर्याची व्याख्या म्हणजे आत्मा आणि हृ्दयाचे सौंदर्य अशी आहे असं अन्ड्रिया मेझा म्हणाली.

तुम्ही कोणीच नाही अशा प्रकारचा विचार समोरच्याने करावा अशी वेळ येऊ देऊ नका, आत्मविश्वास ठेवा असं अन्ड्रिया मेझा म्हणते.

अन्ड्रिया मेझा ही चिहुआहुआ टुरिझमची ब्रॅंड अॅम्बेसिडर आहे. तसेच ती सॉफ्टवेअर इंजिनिअर आहे.

अन्ड्रिया मेझा अॅक्टिवविअर या कपड्यांचा ब्रँड असलेली कंपनी तिच्या मालकीची आहे.