इंदूसमोर पुंडलिक कुरकुंबे नावाचं नवं आव्हान; मालिकेला नवं वळण मिळणार?

Indrayani Colours Marathi Serial: कलर्स मराठीवरील इंद्रायणी मालिकेत इंद्रायणी शाळा सुरू करण्याचा नवा संकल्प घेते, पण तिच्या कीर्तनावेळी मोहितराव तिच्यावर सरकारी जमीन घेऊन फसवणूक केल्याचा आरोप करतो.

Indrayani Colours Marathi Serial

गावकरी मात्र इंद्रायणीच्या पाठीशी उभे राहतात आणि मोहित्रावला मंदिराबाहेर हाकलतात. नंतर इंद्रायणी अधिकार्‍यांसोबत बैठक निश्चित करते जेणेकरून भविष्यात कोणतीही अडचण निर्माण होऊ नये.

आनंदी तिला घरातच थांबवण्याचे अनेक प्रयत्न करते, पण इंद्रायणी अधोक्षजच्या मदतीने हुशारीने घराबाहेर पडते आणि यशस्वी बैठक घेते. पण आता येत्या भागांमध्ये इंदूसमोर पुंडलिक कुरकुंबे नावाचे नवे आव्हान उभे ठाकणार आहेत.

आता इंद्रायणी समोर एक खूप मोठे आव्हानं उभं ठाकणार आहे. एक श्रीमंत उद्योगपती मंदिराच्या ट्रस्टला मोठी देणगी देण्यासाठी येतो, पण ती देणगी फक्त दिग्रसकर परंपरेच्या अधिकृत वारसालाच दिली जाईल, असं स्पष्ट करतो.

आनंदीला वाटतं हा हक्क अधोक्षजचा असावा, म्हणून ती तातडीने एक कमिटी मीटिंग बोलावते आणि अधोक्षजला वारस म्हणून घोषित करण्याची इच्छा व्यक्त करते. व्यंकू महाराज मात्र सांगतात की ही जबाबदारी पात्र व्यक्तीला द्यायला हवी.

यावर अनंदी ठामपणे उत्तर देते जर अधोक्षज वारस न झाला, तर त्याचे परिणाम भोगावे लागतील. दरम्यान, वाड्यात सुरू असलेल्या या वादाची चर्चा संपूर्ण गावात जोरात सुरू असते. त्याच वेळी एक व्हिडीओ सोशल मीडियावर व्हायरल होतो, ज्यात अधोक्षजची वारस म्हणून निवड झाल्याची थट्टा केली जाते.

हा प्रकार पाहून इंद्रायणी अत्यंत व्यथित होते आणि हे सगळं कोण करतंय हे शोधू लागते. शोध घेत असतानाच तिला कळतं की 'पुंडलिक' नावाचा एक व्यक्ती या सर्व प्रकारामागे आहे.

इंद्रायणी काही कृती करायच्या आधीच पुंडलिक विठुचिवाडीत विठ्ठल मंदिरात कीर्तनासाठी उभा राहतो आणि तिथूनच अधोक्षजच्या वारसत्वाला थेट आव्हान देतो. कीर्तनकार परंपरा चालवण्यासाठी अधोक्षज सक्षम नाही, असं खुलेआम सांगत तो अधोक्षजच्या तोतल्यावर टीका करतो.

इंद्रायणी ठामपणे पुंडलिकला इशारा देते की अधोक्षजच्या दोषावरून त्याचा अपमान खपवून घेतला जाणार नाही. पण गावातल्या गैरसमजांना आळा बसावा आणि अधोक्षजच्या क्षमतांविषयी विश्वास निर्माण व्हावा म्हणून ती पुंडलिकचं आव्हान स्वीकारते तेही अधोक्षजच्या वतीनं

आता इंद्रायणीच्या या निर्णायक पावलामुळे काय वळण घेईल ही परंपरा? पुंडलिकचं आव्हान तिला पार करता येईल का? अधोक्षजला मिळणारं वारसत्व मान्य होईल का? या सर्व प्रश्नांची उत्तरं मालिकेच्या पुढच्या भागांमध्ये मिळणार आहेत.