RBI : आरबीआयचा धमाका सुरुच, तीन बँकांवर मोठी कारवाई, लाखो रुपयांचा दंड भरावा लागणार, कारण समोर

RBI : रिझर्व्ह बँक ऑफ इंडियानं काल अहमदाबादमधील कलर मर्चंटस को ऑपरेटिव्ह बँकेवर कारवाई केली होती. आज नियमांचं पालन न करणाऱ्या बँकांना दंड ठोठावण्यात आला आहे.

आरबीआयचा तीन बँकांना दणका

रिझर्व्ह बँक ऑफ इंडियानं बँकिंग नियमांचं पालन करताना काही त्रुटी ठेवल्यानं कोटक महिंद्रा बँक,आयडीएफसी फर्स्ट बँक आणि पंजाब नॅशनल बँकेवर लाखो रुपयांचा दंड ठोठावला आहे.

आरबीआयनं कोटक महिंद्रा बँकेला कर्ज प्रणाली संदर्भातील मार्गदर्शक सूचनांशिवाय कर्ज आणि अॅडव्हान्स , वैधानिक आणि काही प्रतिबंधांवर काही दिशा निर्देशांचं पालन न केल्या प्रकरणी 61.4 लाख रुपयांचा दंड लावला आहे.

आयडीएफसी फर्स्ट बँकेवर केवायसी नियमांचं पालन न केल्या प्रकरणी 38.6 लाख रुपयांचा दंड ठोठावण्यात आला आहे.

पंजाब नॅशनल बँकेला ग्राहक सेवेसंदर्भातील काही मार्गदर्शक सूचनांचं पालन न केल्यानं 29.6 लाखांचा दंड ठोठावण्यात आला आहे. या तीन बँकांच्या प्रकरणात आरबीआयनं नियमाक शिस्तीच्या पालनात त्रुटी ठेवल्यानं दंड ठोठावल्याचं म्हटलं.

आरबीआयनं कालच अहमदाबादमधील कलर मर्चंटस को-ऑपरेटिव्ह बँकेचा परवाना रद्द केला होता. बँकेची आर्थिक स्थिती डबघाईला आल्यानं ही कारवाई करण्यात आली होती.