Russia Ukraine War : रस्त्यावर मृतदेह, अन्नाच्या शोधात भटकणारे लोक; रशियाच्या हल्ल्यानंतर युक्रेनमध्ये विध्वंसाचं दृश्य

Russia Ukraine War : रशियाकडून युक्रेनवर हल्ले सुरुच आहेत. युक्रेनमधील मारियुपोलमध्ये रशियन हल्ल्यानंतर रस्त्यावर पडलेल्या मृतदेहांवरून विध्वंसाचे दृश्य स्पष्टपणे दिसत आहे.

Russia Ukraine War

Russia Ukraine War : रशिया आणि युक्रेनमधील युद्धाचा आज 14 वा दिवस आहे. युक्रेनमधील मारियुपोलमध्ये रशियन हल्ल्यानंतर रस्त्यावर पडलेल्या मृतदेहांवरून विध्वंसाचे दृश्य स्पष्टपणे दिसत आहे. अनेक दिवसांपासून उपाशी असलेले लोक आता अन्नाच्या शोधात दुकानांचे कुलूप तोडून खाद्यपदार्थ चोरत आहेत तर, तहान भागवण्यासाठी बर्फ वितळवून घेत आहेत. रशियाच्या हल्ल्याच्या आवाजाने शहर हादरले असून हजारो लोकांनी जीव वाचवण्यासाठी तळघरात आश्रय घेतला.

मारियुपोल शहराची लोकसंख्या सुमारे 4 लाख 30 हजार आहे. रशियन हल्ल्यानंतर युक्रेनमधील मानवतावादी संकट अधिक गडद होत आहे. मंगळवारीही येथे अडकलेल्या नागरिकांना दिलासा मिळाला नाही. सुरक्षित कॉरिडॉरद्वारे लोकांना बाहेर काढण्याचे आणि अन्न, पाणी आणि औषध पुरवण्याचे प्रयत्न अयशस्वी झाले. युक्रेनच्या अधिकाऱ्यांनी सांगितले की, रशियन सैन्याने काफिला शहरात पोहोचण्यापूर्वीच त्यांच्यावर गोळीबार केला.

एका वृत्तसंस्थेनुसार, तळघरात तेलाच्या दिव्याच्या उजेडात महिला आणि मुलांमध्ये रडत असताना गोमा जाना युक्रेनमधील परिस्थितीबद्दल म्हणाल्या की, 'मला माझे घर परत हवे आहे, मला माझी नोकरी परत हवी आहे. मी माझे लोक आणि माझ्या शहरातीलबद्दल दुःखी आहे.'

रशियाने युक्रेनवर हल्ला करून जवळपास दोन आठवडे उलटले आहेत. अझोव्ह समुद्रावर वसलेले मारियुपोल अनेक दिवसांपासून रशियन सैन्याने वेढले आहे. युक्रेनच्या उपपंतप्रधान इरिना वेरेशचुक यांनी सांगितले की मारियुपोल विनाशकारी परिस्थितीत आहे.

दरम्यान, युक्रेनच्या लष्कराला मदत करण्यासाठी पोलंडने अमेरिकेला आपली सर्व मिग-29 लढाऊ विमाने दिली आहेत. यूएस संरक्षण मंत्रालयाचे म्हणणे आहे की या प्रस्तावामुळे नाटो (NATO) साठी गंभीर चिंता निर्माण झाली आहे.

संयुक्त राष्ट्राच्या अधिकाऱ्यांनी सांगितले की, आतापर्यंत सुमारे 20 लाख लोकांनी युक्रेन सोडले आहे. रशियाला आर्थिक स्तरावर वेगळे पाडण्याचे प्रयत्न सुरू आहेत. अमेरिकेचे अध्यक्ष जो बायडेन यांनी रशियन तेल आयातीवर बंदी घालण्याची घोषणा केली आणि बहुराष्ट्रीय तेल आणि वायू कंपनी शेल यापुढे रशियाकडून तेल आणि नैसर्गिक वायू खरेदी करणार नाही असे सांगितले.

दरम्यान, मॅकडोनाल्ड्स, स्टारबक्स, कोका-कोला, पेप्सिको आणि अनेक टेक कंपन्या तसेच जागतिक ब्रँड्सनी युक्रेनवरील हल्ल्याच्या निषेधार्थ रशियामधील त्यांचा व्यवसाय तात्पुरता स्थगित केला आहे.

महत्त्वाच्या इतर बातम्या :

LIVE TV | मराठी बातम्या, ब्रेकिंग न्यूज, महाराष्ट्रासह देश-विदेशातील प्रत्येक घडामोड पाहा लाईव्ह - ABP Majha