India Pakistan Trade : पाकिस्तानचे PM म्हणाले, भारतासोबत व्यापार आवश्यक, पण काश्मीरमधील कलम 370 मागे घेतल्याशिवाय नाही

India Pakistan Trade : दहशतवाद आणि व्यापार एकत्र होऊ शकत नाही, अशी भारताची पाकिस्तानबाबत नेहमीच भूमिका राहिली आहे.

India Pakistan Trade

India Pakistan Trade : पाकिस्तानची आर्थिक स्थिती सातत्याने खालावत चालली आहे. सरकारच्या अपयशाचा फटका सर्वसामान्यांना सहन करावा लागत आहे. दरम्यान, पाकिस्तान भारतासोबत जास्तीत जास्त व्यापार वाढवण्याचा प्रयत्न करत आहे, जेणेकरून आपली अर्थव्यवस्था पुन्हा रुळावर येईल. दरम्यान, आता भारतासोबतच्या व्यापाराबाबत पाकिस्तानचे पंतप्रधान शाहबाज शरीफ यांचे वक्तव्य समोर आले आहे. मात्र यादरम्यान त्यांनी काश्मीर आणि कलम 370 बाबतही संताप व्यक्त केला आहे.

व्यवसायाची चर्चा आणि कलम 370चा उल्लेख
तुर्की वृत्तसंस्थेला दिलेल्या मुलाखतीत पंतप्रधान शाहबाज शरीफ यांनी भारतासोबतच्या सुदृढ व्यापार संबंधांचा उल्लेख केला. दोन्ही देशांमधील व्यापारामुळे दोन्ही बाजूंना फायदा होऊ शकतो, असे ते म्हणाले. शरीफ म्हणाले की, भारतासोबतच्या व्यापारातून पाकिस्तानला मोठे फायदे मिळू शकतात. पण व्यापाराबाबत बोलताना पाकिस्तानच्या पंतप्रधानांनी काश्मीरमध्ये संताप व्यक्त केला, ते म्हणाले की, काश्मीरमधील कलम 370 मागे घेतल्याशिवाय व्यापार करणे शक्य नाही. मात्र, पंतप्रधान झाल्यानंतर त्यांनी पाचहून अधिक वेळा काश्मीर आणि कलम 370चा  उल्लेख केला आहे. 

दहशतवादी हल्ल्यानंतर व्यवसायावर परिणाम
14 फेब्रुवारी 2019 रोजी पुलवामा येथे झालेल्या दहशतवादी हल्ल्याच्या एका दिवसानंतर भारताने पाकिस्तानला मोस्ट फेव्हर्ड नेशन्सच्या यादीतून वगळले होते. त्यानंतर त्याचा थेट परिणाम पाकिस्तानसोबतच्या व्यापारावर झाला. पाकिस्तानची आर्थिक स्थिती आधीच चांगली नव्हती, भारताच्या या निर्णयानंतर पाकिस्तानला आर्थिक आघाडीवर चांगलाच फटका बसला.

भारतासोबत व्यापार सुरू करण्यासाठी प्रयत्न
भारतासोबत सर्व प्रकारचा व्यापार कसा सुरू करता येईल यासाठी पाकिस्तान आता सातत्याने प्रयत्न करत आहे. त्यासाठी काही दिवसांपूर्वी पंतप्रधान शाहबाज शरीफ यांच्या अध्यक्षतेखाली झालेल्या बैठकीत पुन्हा एकदा भारतासोबत व्यापारासाठी व्यापार मंत्र्यांच्या नियुक्तीला मान्यता देण्यात आली. दरम्यान, पाकिस्तान मंत्रिमंडळाने कमर जमान यांची भारतातील व्यापार मंत्री म्हणून नियुक्ती केली. मात्र, दहशतवाद आणि व्यापार एकत्र होऊ शकत नाही, अशी भारताची पाकिस्तानबाबत नेहमीच भूमिका राहिली आहे.