'विंडोज 7'चा सपोर्ट बंद करणार, मायक्रोसॉफ्टची घोषणा

14 जानेवारी 2020 पासून 'मायक्रोसॉफ्ट' विंडोज 7 चा सपोर्ट बंद करण्यात येणार आहे. याचा अर्थ विंडोज 7 चे अपडेट्स तुम्हाला मिळणार नाहीत.

मुंबई : 'विंडोज 7' चे कॉम्प्युटर आणि लॅपटॉप कायमचे बंद होणार आहेत. प्रसिद्ध कंपनी मायक्रोसॉफ्टने Windows 7 चा सपोर्ट बंद करण्याची घोषणा केली आहे. मेनस्ट्रीम सपोर्ट बंद करण्याची घोषणा मायक्रोसॉफ्टकडून करण्यात आली आहे. एका वर्षानंतर म्हणजेच 14 जानेवारी 2020 पासून विंडोज 7 चा सपोर्ट बंद करण्यात येणार आहे. याचा अर्थ विंडोज 7  चे अपडेट्स तुम्हाला मिळणार नाहीत. या अपडेट्समध्ये सिक्युरिटी फिक्स आणि पॅचेस यांचाही समावेश आहे. या दोन्हीमुळे संगणकाची सुरक्षा होत असते. मायक्रोसॉफ्टने गेल्या वर्षी जून महिन्यातच विंडोज 7 चा अधिकृत फोरम सपोर्ट बंद केला होता. सात जुलै 2009 रोजी मायक्रोसॉफ्टने Windows 7 सादर केलं होतं. विंडोज 7 नंतर Windows 8 , Windows 8.1 आलं. जुलै 2015 मध्ये Windows 10 लाँच करण्यात आलं. सध्या विंडोज 10 वापरणाऱ्या यूझर्सची संख्या 70 कोटींहून जास्त आहे. आता कंपनी Windows 7 Extended Security Updates विकणार आहे. ही सुविधा सुरु ठेवायची असल्यास त्यासाठी पैसे मोजावे लागतील. इंटरप्राइजेस युजर्स अनेक वर्षांपासून विंडोज 7 चा वापर करत असल्यामुळे त्याचा वापर एकदम बंद करणं कठीण आहे.  सामान्य ग्राहकांना हे अपडेट मिळणार नाहीत. यापूर्वी मायक्रोसॉफ्टने Windows XP आणि Vista चाही सपोर्ट बंद केला आहे.