Markadwadi Election : बॅलेटसाठी बुलेट झेलू पण मतदान घेणारच, मारकडवाडीत बॅलेट पेपरवरील निवडणुकीसाठी उत्तम जानकर पोहोचले
Markadwadi Voting : मारकडवाडीमध्ये ग्रामस्थांकडून 3 डिसेंबर रोजी बॅलेट पेपरवर मतदान घेण्यात येणार आहे. त्याला प्रशासनाने विरोध करत जमावबंदीचा आदेश जाहीर केला आहे.
सोलापूर : गाव एकत्रित येऊन त्यांच्या खर्चाने बॅलेट पेपरवर जर मतदान घेत असेल तर शासनाला त्यावर आक्षेप घेण्याचे कारण काय असा सवाल करत मंगळवारी कुठल्याही परिस्थितीत ग्रामस्थ मारकडवाडी येथे मतदान करणारच असा इशारा नवनियुक्त आमदार उत्तम जानकर यांनी दिला. प्रशासनाने दबावात येऊन अंतरवाली सराटीप्रमाणे आमच्यावर लाठी हल्ला केला किंवा गोळ्या जरी झाडल्या तरी आम्ही गावात मतदान घेणारच असंही ते म्हणाले.
माळशिरस तालुक्यातील मारकडवाडी या ठिकाणी मंगळवारी बॅलेट पेपरवर मतदान होणार आहे. पण प्रशासनाने त्याला विरोध करत गावात जमावबंदीचा आदेश लागू केला आहे. त्यानंतर आमदार उत्तम जानकर हे मारकडवाडीमध्ये पोहोचले आहेत.
हा उद्रेक महाराष्ट्रभर पसरणार
प्रशासनाने आमच्यावर गोळ्या झाडल्या, लाठी चार्ज केला तर त्याचा उद्रेक होईल आणि तो महाराष्ट्रभर पसरेल असा इशारा उत्तम जानकर यांनी दिला. मंगळवारी मारकडवाडी येथे बॅलेट पेपरवर मतदान होत आहे. मात्र प्रशासनाने त्यावर आक्षेप घेत 2 डिसेंबर ते 5 डिसेंबर पर्यंत या गावात जमावबंदीचे आदेश दिले आहेत. मारकडवाडीतील उत्तम जानकर गटाच्या 20 ते 25 लोकांना पोलिसांनी नोटीस बजावली आहे.
सध्या या गावाला पोलीस छावणीचे स्वरूप प्राप्त झाले आहे. गावात पोलिसांचा फौजफाटा दाखल होताच नूतन आमदार उत्तम जानकर हे मारकडवाडी येथे दाखल झाले. त्यामुळे जमावबंदी लागू असतानाही शेकडो ग्रामस्थ जानकर यांच्यासोबत गावात जमा झाले आहेत. ग्रामस्थ मतदानावर ठाम असल्याने गावातील तणाव वाढला आहे. आता प्रशासन यावर काय भूमिका घेणार हे मंगळवारीच स्पष्ट होणार आहे.
मतदान बॅलेट पेपरवर घेण्याचा निर्णय
विधानसभेच्या निवडणुकीत झालेल्या मतदानात उत्तम जानकर यांना केवळ 843 मते तर विरोधी भाजप उमेदवार राम सातपुते यांना 1003 मते मिळाल्याचं समोर आलं. यापूर्वी झालेल्या 2009, 2014, 2019 सालच्या विधानसभा निवडणूक आणि पाच महिन्यापूर्वी झालेल्या लोकसभा निवडणुकीत गावाचे 80 टक्के मतदान जानकर यांच्या गटाला झाल्याचे पुरावे जोडले आहेत.
यावेळी निवडणुकीत मोठे घोटाळे झाल्याचा आक्षेप घेत हे तपासण्यासाठी पुन्हा 3 डिसेंबर रोजी बॅलेट पेपरवर चाचणी मतदान घेण्याचा ठराव गावाने केला. यासाठी शासकीय कर्मचारी मिळावेत, अशी मागणी करीत संपूर्ण खर्च भरण्यास गाव तयार असल्याचे निवेदन तहसीलदारांना या आधी देण्यात आले आहे. पण प्रशासनाने त्याला नकार दिला आहे.
ही बातमी वाचा:
महत्त्वाच्या बातम्या
