Shirish Valsangkar: डॉ. वळसंगकर कर्मचाऱ्याकडून धमकी मिळाल्याने तणावाखाली; आर्थिक व्यवहार, कागदोपत्र अन् कामावरून काढल्यानंतर धमकी, नेमकं काय घडलं होतं?
Shirish Valsangkar: आत्महत्येपूर्वी डॉ. वळसंगकर यांनी एक चिठ्ठी लिहलेली होती, यामध्ये मनीषा मुसळे-माने हिच्यामुळेच टोकाचे पाऊल उचलत असल्याचा आरोप त्यांनी केला आहे.
सोलापूर: सोलापुरातील प्रसिद्ध न्युरो फिजिशीयन डॉ. शिरीष वळसंगकर यांच्या आत्महत्येप्रकरणी मोठी बातमी समोर आली आहे. डॉ. वळसंगकर यांना आत्महत्येला प्रवृत्त केल्याप्रकरणी एका महिलेविरोधात गुन्हा दाखल करण्यात आला आहे. वळसंगकर यांच्या हॉस्पिटलमध्ये प्रशासकीय अधिकारी म्हणून काम करणाऱ्या मनीषा मुसळे-माने या महिलेच्या विरोधात गुन्हा दाखल करण्यात आला आहे. आत्महत्येपूर्वी डॉ. शिरीष वळसंगकर यांनी एक चिठ्ठी लिहलेली होती, यामध्ये मनीषा मुसळे-माने हिच्यामुळेच टोकाचे पाऊल उचलत असल्याचा आरोप त्यांनी केला आहे. पोलिस सूत्रांकडून मिळालेल्या माहितीनुसार रात्री 10 च्या सुमारास पोलिसांनी या प्रकरणी गुन्हा दाखल केला असून रात्रीच न्यायालयाची परवानगी घेऊन आरोपी महिलेला अटक करण्यात आली आहे. या घटनेमुळे एकच खळबळ उडाली होती.
संबधित महिला वळसंगकरांच्या हॉस्पिटलमध्ये प्रशासकीय अधिकारी
डॉक्टर शिरीष वळसंकर यांना आत्महत्येसाठी प्रवृत्त केल्याप्रकरणी एका महिलेवरती गुन्हा दाखल करण्यात आला आहे. रुग्णालयातील प्रशासकीय अधिकारी मनीषा मुसळे-मानेला पोलिसांकडून अटक करण्यात आली आहे. आत्महत्या करण्यापूर्वी वळसंकरांनी आपल्या सुसाईड नोटमध्ये या महिलेच्या नावाचा उल्लेख केलेला आहे. न्यायालयाच्या परवानगीनेच संबंधित महिलेला काल शनिवारी रात्री अटक करण्यात आलेली आहे.
सुसाईड नोटमध्ये काय उल्लेख?
डॉक्टर शिरीष वळसंगकर हे सोलापुरातील प्रसिद्ध डॉक्टर होते. हजारो लोकांच्या मेंदूवरती शस्त्रक्रिया करणारे वळसंकर यांनी स्वतःच्या मेंदूत गोळी झाडून आत्महत्या केली. या घटनेमुळे अनेक तर्क वितर्क लावले जात होते. मात्र, या प्रकरणात नवीन माहिती समोर आल्याने खळबळ उडाली आहे. डॉक्टर शिरीष वळसनकर यांच्याच हॉस्पिटलमध्ये प्रशासकीय अधिकारी म्हणून काम करत असलेल्या मनीषा मुसळे माने या महिलेच्या विरोधात आत्महत्या करण्यास प्रवृत्त केल्याप्रकरणी काल रात्री गुन्हा दाखल करण्यात आला आहे.
डॉक्टर शिरीष वळसंगकर यांनी आत्महत्या पूर्वी एक चिठ्ठी लिहिली होती अशी माहिती पोलीस सूत्रांकडून समोर आली आहे. त्यांनी त्यांच्या सुसाईड नोटमध्ये या महिलेवरती आरोप केलेले आहेत. त्या महिलेला आपण आयुष्यात उभं केलं, हॉस्पिटलची प्रशासकीय सूत्र हातात दिली. त्याच महिलेने आपल्यावरती घाणेरडे आरोप केले. हे सहन होत नसल्यामुळे आपण आपलं जीवन संपवत असल्याचं डॉक्टर शिरीष वळसंगकरांनी चिठ्ठीत उल्लेख केलेला होता. काल ही सुसाईड नोट पोलिसांना घटनास्थळावरून मिळाली आहे. पोलिसांनी या चिठ्ठीच्या आधारे मनीषा मुसळे-माने हिला तिच्याविरुद्ध आत्महत्येस प्रवृत्त केल्याप्रकरणी गुन्हा दाखल करण्यात आला आहे. अर्थात रात्री उशिरा हा गुन्हा दाखल करण्यात आला आहे. हे प्रकरण संवेदनशील असल्यामुळे त्याचबरोबर रात्री महिलांना अटक करता येत नाही त्यामुळे पोलिसांनी न्यायालयाची विशेष परवानगी घेतल्यानंतर रात्री अकरा वाजता या महिलेला अटक केली आहे. आज पोलीस रिमांडसाठी पुन्हा या महिलेला कोर्टात हजर करणार आहेत.
धमकी मिळाल्याने तणावाखाली असल्याची चर्चा
डॉ. वळसंगकरांना रुग्णालयातील सर्व आर्थिक व्यवहार हे कागदोपत्रांवरती हवे होते. त्यासाठी त्यांचा आग्रह देखील होता, पण आजकाल रुग्णांकडून उपचाराची रक्कम कोणतीही नोंद न करता स्वीकारली जात होती. यासंदर्भात त्यांनी आक्षेप नोंदवला होता. पण त्यांचं कोणी ऐकत नव्हतं. जी महिला कर्मचारी अशी रक्कम स्वीकारत होती, तिला डॉ. वळसंगकरांनी कामावरून देखील काढलं होतं. पण नंतर या महिला कर्मचाऱ्याने कामावरून काढल्यानंतर आत्महत्या करण्याची धमकी डॉक्टरांना दिली होती. तिच्या धमकीवरून डॉक्टरांना पोलिसांत तक्रार दाखल करण्याचा सल्ला दिला होता. मात्र, डॉक्टरांना ते मान्य नव्हते. या प्रकरणामुळे डॉक्टर तणावाखाली होते.
महत्त्वाच्या बातम्या
