Pune Porsche Car Accident : महाबळेश्वरमधील सुरेंद्र अग्रवालच्या अनधिकृत MPG क्लबवर 'बुलडोझर'; सीएम शिंदेंच्या आदेशानंतर आठ दिवसात कारवाई
Pune Porsche Car Accident : सुरेंद्र अगरवालच्या मालकीच्या बारमध्ये नियमांचं उल्लंघन केल्याचं समोर आल्यानंतर राज्य उत्पादन शुल्क विभागाने बार सुद्धा सील केला होता.
सातारा : पुण्यामध्ये दारूच्या नशेत गाडी चालवून (Pune Porsche Car Accident) दोघांना चिरडणाऱ्या अल्पवयीन मुलाचा आजोबा सुरेंद्र अगरवालचा (Surendra Agarwal) महाबळेश्वरमधील पंचतारांकित हॉटेलमधील बार सील करण्यात आल्यानंतर आता एमपीजी क्लबवर बुलडोझर चालवण्यात आला आहे. मुख्यमंत्री एकनाथ शिंदे यांनी अनियमितता आढळल्यास बुलडोझर चालवण्याचे आदेश आठ दिवसांपूर्वी दिले होते. यानंतर आता सातारा जिल्हा प्रशासनाकडून कारवाई करण्यात आली आहे.
सुरेंद्र अगरवालच्या मालकीच्या बारमध्ये नियमांचं उल्लंघन केल्याचं समोर आल्यानंतर राज्य उत्पादन शुल्क विभागाने बार सुद्धा सील केला होता. अग्रवाल कुटुंबीयांच्या मालकीचे महाबळेश्वरमध्ये पंचतारांकित हॉटेल आहे. हे हॉटेल सरकारी जमिनीवर बेकायदेशीर असल्याचे समोर आले होते. त्यामुळे अनियमितता असेल तर त्या हॉटेलवर बुलडोझर चालवावा असा थेट आदेश मुख्यमंत्री एकनाथ शिंदे यांनी दिला होता.
बारचा परवाना रद्द
सुरेंद्रकुमारच्या नावे असलेल्या महाबळेश्वरमधील बारचा परवाना रद्द करण्यात आला आहे. राज्य उत्पादन शुल्क विभागाने या हॉटेलवर धाड टाकत ही कारवाई केली होती. या प्रकरणाचा अहवाल राज्य उत्पादन शुल्क विभागाने सातारा जिल्हाधिकाऱ्यांना पाठवल्यानंतर जिल्हाधिकाऱ्यांनी आदेश दिला होता. त्यानंतर बार सील करण्यात आला होता.
सुरेंद्र अग्रवालवर आरोप काय?
चालकाला डांबून ठेवणं, दबाव टाकणे, जीवे मारण्याची धमकी या प्रकरणी सुरेंद्र अग्रवालला अटक करण्यात आली आहे.तसेच सीसीटीव्हीशी छेडछाड केल्याचा आरोपही ठेवण्यात आला आहे. जेव्हा अपघात घडला तेव्हा सुरेंद्र अग्रवालने नातवाला वाचवण्याचा प्रयत्न केला होता. गाडी तू चालवत असल्याचं पोलिसांना सांग असं त्याने ड्रायव्हर गंगाराम पुजारीला धमकावून सांगण्याचा प्रयत्न केला होता. तसेच सुरेंद्र अग्रवालने ड्रायव्हरला दोन दिवस डांबून ठेवल्याचा आरोप सुद्धा आहे.
इतर महत्वाच्या बातम्या
महत्त्वाच्या बातम्या
