Sangli Crime : नात्याचा मुडदा पाडला! प्रॉपर्टीच्या वादातून नातवांनी स्वत:च्या वृध्द आजीला टॉवेलने गळा आवळून संपवलं; सांगलीत थरकाप
संपत्तीच्या वादातून नातवांनी स्वत:च्या वृध्द आजीचा टॉवेलने गळा आवळून खून केल्याची घटना खानापूर तालुक्यातील पारेमध्ये घडली. सखुबाई संभाजी निकम (वय 80) असे मृत झालेल्या दुर्दैवी आजीचे नाव आहे.
सांगली : सांगली जिल्ह्यात (Sangli Crime) संपत्तीच्या वादातून रक्ताच्या नात्याचा मुडदा पाडल्याची धक्कादायक घटना घडली आहे. संपत्तीच्या वादातून नातवांनी स्वत:च्या वृध्द आजीचा टॉवेलने गळा आवळून खून (Grandchildren Strangled Grandmother with a Towel) केल्याची घटना खानापूर तालुक्यातील पारेमध्ये घडली. सखुबाई संभाजी निकम (वय 80) असे मृत झालेल्या दुर्दैवी आजीचे नाव आहे. पोलिसांनी (Sangli Police) आजीच्या एका अल्पवयीन नातवासह दुसरा नातू आशिष सतीश निकम, सून रेणुका सतीश निकम या तिघांना अटक केली आहे.
चिंचणी येथील सतीशशेठ निकम यांचा सोने-चांदी गलाई व्यवसाय आहे. त्यांची विटा, चिंचणी (मं.) यासह विविध ठिकाणी प्रॉपर्टी आहे. यातील अर्धा हिस्सा सतीश यांचे जावई कुणाल पाटील यांच्या नावावर करण्यासाठी त्यांची पारे येथील बहीण संगिता रामचंद्र साळुंखे यांनी भाऊ सतीश यांना सांगितले होते. त्याचा राग संशयित नातू आशिष, त्याचा अल्पवयीन भाऊ व सून रेणुका यांना होता.
आतीच्या घरी जाऊन आजीचा गळा दाबला
हा राग मनात धरून संशयित तिघांनी 19 फेब्रुवारी रोजी संगीता साळुंखे यांच्या पारे गावातील घरी जाऊन त्यांना तू तूझ्या भावाला बोलावून घेऊन 48 तासांच्या आत सदरची प्रॉपर्टी फिरवून दे, नाहीतर तुला व म्हातारीला (सखुबाई) यांना 48 तासानंतर दाखवितो, अशी धमकी देऊन हे तिघेही विट्याला निघून गेले. त्यानंतर मंगळवारी सकाळी साडे अकराच्या सुमारास हे तिघेही सतीश यांची बहीण संगिता यांच्या पारे येथील घरी गेले. त्यावेळी सखुबाई या मुलगी संगिताच्या घरी होत्या. या तिघांनी पुन्हा त्याठिकाणी वाद घालण्यास सुरूवात केली.
त्यानंतर आजी सखुबाई यांना एका खोलीत नेऊन आतून दरवाजा बंद करून त्यांचा टॉवेलने गळा आवळून खून केला. त्यानंतर हे तिघेही संशयित त्यांच्या विटा येथील घरी आले. या घटनेची माहिती मिळताच उपअधीक्षक विपुल पाटील, पोलिस निरीक्षक शरद मेमाणे यांच्यासह पोलीस पथक घटनास्थळी दाखल झाले. त्यानंतर पंचनामा करून सखुबाई यांचा मृतदेह उत्तरीय तपासणीसाठी विटा ग्रामीण रूग्णालयात आणण्यात आला.
याप्रकरणी विटा पोलीसांनी मयत सखुबाई यांचा अल्पवयीन नातवासह दुसरा नातू आशिष, सून रेणुका निकम या तिघांना रात्री उशिरा अटक केली. या घटनेची विटा पोलीसांत नोंद झाली असून पोलीस निरीक्षक शरद मेमाणे पुढील तपास करीत आहेत.
इतर महत्वाच्या बातम्या
महत्त्वाच्या बातम्या
