Sangli Crime : 'तू माझ्या बहिणीच्या मागे का लागला आहेस?' विचारत प्रेमप्रकरणातून तरुणाला संपवलंच; मिरज तालुक्यातील धक्कादायक घटना

Sangli Crime : संशयित आरोपींना न्यायालयासमोर उभे केले असता न्यायालयाने चार दिवसाची पोलीस कोठडी सुनावली आहे. मयत ओंकार देसाई हा खासगी नोकरी करत होता.

Sangli Crime

सांगली : सांगली जिल्ह्यातील (Sangli Crime) मिरज तालुक्यातील बामणोली दत्तनगरमध्ये प्रेमप्रकरणातून तरुणाचा निर्घृण खून झाल्याची घटना घडली. ओम श्रीधर देसाई (वय 19 रा. दत्तनगर, बामणोली) असे त्या तरुणाचे नाव असून प्रेमप्रकरणातून तरुणाचा धारदार शस्त्राने वार करून निर्घृण खून करण्यात आला. रविवारी रात्री सव्वादहा वाजण्याच्या सुमारास दत्तनगर मधील खुल्या जागेत हा खून झाला. चौघा हल्लेखोरांनी हा खून केल्याचे प्राथमिक तपासात स्पष्ट झाले आहे. 

आरोपींना चार दिवसांची पोलिस कोठडी

संशयित ओंकार निलेश जावीर (वय 20), रोहित बाळासाहेब केंगार (18), सोहम शहाजी पाटील (20), ज्ञानेश्वर पाटील (20, रा. चौघेही दत्तनगर,बामणोली) यांच्याविरोधात गुन्हा नोंद करण्यात आला आहे. पोलिसांनी सोहम आणि ओंकारला अटक केली आहे. संशयित आरोपींना न्यायालयासमोर उभे केले असता न्यायालयाने चार दिवसाची पोलीस कोठडी सुनावली आहे. 

'तू माझ्या बहिणीच्या मागे का लागला आहेस?'

कुपवाड एमआयडीसी पोलिस ठाण्यात मयत ओंकार देसाई याचा भाऊ आदेश देसाई यांनी याबाबत फिर्याद दिली. फिर्यादी आणि पोलिसांनी दिलेल्या माहितीनुसार मयत ओंकार देसाई हा खासगी नोकरी करत होता. रविवारी रात्री साडेनऊ वाजण्याच्या सुमारास ओंकार हा जेवण करून कुटुंबीयांसोबतच होता. दहा वाजण्याच्या सुमारास संशयित ओंकारने मयत ओमला दत्तनगर येथील खुल्या जागेत फोन करून बोलावून घेतले. ओंकारने ओमल 'तू माझ्या बहिणीच्या मागे का लागला आहेस?' असा जाब विचारला.

चाकू व कोयत्याने पोटात व डोक्यावर वार

यावेळी दोघांमध्ये शाब्दिक वादावादी झाली. त्यावेळी ओंकारसोबत असलेल्या सोहम,  ज्ञानेश्वर व अन्य एकाने चाकू व कोयत्याने पोटात व डोक्यावर चौघांनी वार करून गंभीर जखमी केले व हल्लेखोर पसार झाले. त्यामुळे ओम रक्ताच्या थारोळ्यात कोसळला. ओमला त्याच्या भावाने सांगलीच्या शासकीय रुग्णालयात उपचारासाठी दाखल केले, पण डॉक्टरांनी उपचारापूर्वीच ओमला मयत घोषित केले. 

खुनाची माहिती मिळताच कुपवाड पोलिस तत्काळ घटनास्थळी पोहोचले. कुपवाडचे सहाय्यक निरीक्षक अविनाश पाटील यांनी पथकासह घटनास्थळी भेट दिली. ओमच्या खुनामागे प्रेमप्रकरण असल्याचे प्राथमिक तपासात स्पष्ट झाले. त्यानुसार काही तासांतच स्थानिक गुन्हे अन्वेषण शाखेकडून 2 आरोपींच्या मुसक्या आवळण्यात यश आले. ज्ञानेश्वर पाटील व अनोळखी एक अशा संशयित आरोपींचा शोध चालू असल्याचे पोलिसांनी सांगितले. अधिक तपास सहाय्यक पोलिस निरीक्षक अविनाश पाटील हे करीत आहेत.

इतर महत्वाच्या बातम्या