Corona warriors | कोरोनावर मात केलेल्या पुण्यातील वरिष्ठ अधिकाऱ्याचे अनोखे स्वागत

पुणे पोलिस दलातील 25 अधिकारी आणि कर्मचाऱ्यांना कोरोनाची लागण झाली आहे. यातील 13 कर्मचाऱ्यांना आतापर्यंत डिस्चार्ज देण्यात आला आहे. तर 12 कर्मचाऱ्यांवर अद्यापही उपचार सुरू आहेत.

पुणे : पंचवीस दिवसानंतर कोरोनातून मुक्त झालेल्या एका पोलीस कर्मचाऱ्यावर वरीष्ठ अधिकाऱ्यांनी पुष्पवर्षाव करीत त्याचे स्वागत केले. पुण्यातील फरासखाना पोलीस ठाण्यात कार्यरत असणाऱ्या सचिन खुटे यांना 24 एप्रिल रोजी कोरोनाची लागण झाल्याचे निष्पन्न झाले होते. त्यानंतर त्यांना लवळे येथील सिम्बॉयोसिस महाविद्यालयात तयार करण्यात आलेल्या आयसोलेशन सेंटरमध्ये ठेवण्यात आले होते. त्यांच्यावर झालेल्या यशस्वी उपचारानंतर ते कोरोनामुक्त झाले. यावेळी डिस्चार्ज देताना पोलीस दलातील वरिष्ठ अधिकारी उपस्थित होते. या सर्वांनी सचिन खुटे यांच्यावर पुष्पवर्षाव करीत त्यांचे स्वागत केले.

पुण्यात आतापर्यंत ;चार हजाराहून अधिक कोरोनाबाधित रुग्ण सापडले आहेत. पुणे पोलिस दलातील 25 अधिकारी आणि कर्मचाऱ्यांना कोरोनाची लागण झाली आहे. यातील 13 कर्मचाऱ्यांना आतापर्यंत डिस्चार्ज देण्यात आला आहे. तर 12 कर्मचाऱ्यांवर अद्यापही उपचार सुरू आहेत. पुण्यातील फरासखाना पोलिस ठाण्यात कार्यरत असणाऱ्या दिलीप लोंढे या पोलीस कर्मचाऱ्याचा काही दिवसांपूर्वीच उपचार सुरू असताना मृत्यू झाला आहे.

पुणे पोलीस दलातील ज्या कर्मचाऱ्यांचे वय 50 च्या पुढे आहे, आणि ज्या महिला कर्मचाऱ्यांच्या घरात लहान मुलं आहेत अशा कर्मचाऱ्यांना फील्ड ड्युटी न देण्याचा निर्णय पुणे पोलिसांनी या पूर्वीच घेतला आहे. याशिवाय ज्या कर्मचाऱ्यांची सेवानिवृत्ती जवळ आली आहे तसेच कर्मचाऱ्यांना काही आजार आहेत अशा कर्मचाऱ्यांना अधिकची रजा दिली आहे. शिवाय कोरोनासोबत दोन हात करणाऱ्या पोलिसांना दहा हजाराचा रिवॉर्ड दिला जाणार आहे. हे बक्षीस पोलिस कल्याण निधीतून त्यांच्या खात्यात वर्ग होणार आहे. तर आगाऊ रक्कम म्हणून एक लाख रुपये बिनव्याजी संबंधित पोलिसांना दिले जाणार आहेत.

गेल्या 24 तासांत महाराष्ट्रातल्या 60 पोलिसांना कोरोनाची लागण झाली आहे. एकूण 1 हजार 388 पोलीस कोरोनाच्या विळख्यात आहे.  पिंपरीत आज 4 पोलिसांचे कोरोनाचे अहवाल पॉझिटिव्ह आले आहेत.

Covid 19 Test Bus | पुण्यातील कंटेनमेंट झोन मधील नागरिकांची वैद्यकीय तपासणीसाठी विशेष बस | ABP Majha संबंधित बातम्या :