Deenanath Mangeshkar Hospital : कोणतेही डिपॉझिट घेऊ नका, दीनानाथ रुग्णालय प्रकरणानंतर पुणे महापालिका अलर्ट मोडवर, सर्व खासगी रुग्णालयांना बजावली नोटीस
Deenanath Mangeshkar Hospital : दीनानाथ रुग्णालय प्रकरणानंतर खासगी रुग्णालयासंदर्भात महापालिका अलर्ट मोडवर आल्याचे पाहायला मिळत आहे.
Pune News : पुण्यात तनिषा भिसे या गर्भवती महिलेचा मृत्यू झाल्याची घटना मागच्या आठवड्यापासून चर्चेत आहे. पुण्यातील नामांकित रुग्णालय अशी ओळख असलेल्या दीनानाथ मंगेशकर रुग्णालयावर (Deenanath Mangeshkar Hospital) या प्रकरणी हलगर्जीपणाचा आरोप होतो आहे. रुग्णालयाने उपचारांसाठी १० लाख रुपये अनामत रक्कम मागितली, ती न दिल्याने उपचारांना उशीर झाला आणि तनिषा भिसे दगावल्या असा आरोप होत आहे. या प्रकरणी तीन समित्या स्थापन करण्यात आल्या होत्या त्यात राज्य शासनाच्या समितीचा अहवाल काल सादर झाला आणि त्यात रुग्णालयावर ठपका ठेवण्यात आला. तर दीनानाथ रुग्णालय प्रकरणानंतर खासगी रुग्णालयासंदर्भात महापालिका अलर्ट मोडवर आली आहे. कोणताही डिपॉझिट घेऊ नका, अशी नोटीस पुणे महानगरपालिकेकडून (Pune Municipal Corporation) सगळ्या खासगी रुग्णालयांना बजावण्यात आली आहे.
रुग्णांकडून कोणतेही डिपॉझिट घेऊ नका
दीनानाथ रुग्णालय प्रकारणानंतर खासगी रुग्णालयासंदर्भात महापालिका अलर्ट मोडवर आली आहे. रुग्णांकडून कोणतेही डिपॉझिट घेऊ नका, अशी नोटीस पुणे महानगरपालिकेकडून सगळ्या खासगी रुग्णालयांना बजावण्यात आली आहे. आधी उपचार करा आणि नंतर पैसे मागा, अशा संदर्भातले आदेश प्रत्येक खासगी रुग्णालयाला देण्यात आले आहे. पुणे महापालिकेने शहरातील सर्व खासगी रुग्णालयांना रुग्णांवरील तातडीच्या उपचारांसंदर्भात नोटीस पाठविली आहे. तातडीच्या उपचारांची गरज असलेल्या रूग्ण किंवा त्यांच्या नातेवाईकांकडून अनामत रक्कम घेऊ नये. रुग्णावर पहिल्यांदा उपचार करण्यास प्राधान्य द्यावे, असे महापालिकेने रुग्णालयांना पाठविलेल्या नोटीसमध्ये नमूद केले आहे. महापालिकेच्या या भूमिकेमुळे तातडीच्या उपचारांसाठी रुग्णालयात दाखल होणारे रूग्ण व त्यांच्या नातेवाइकांना चांगलाच दिलासा मिळण्याची शक्यता आहे.
मेडिकल निगलिजन्स आढळल्यास गुन्हा दाखल होणार
दरम्यान, दीनानाथ मंगेशकर रुग्णालय प्रकरणात मेडिकल निगलिजन्स आढळल्यास पुणे पोलीस गुन्हा दाखल करणार आहेत. या प्रकरणी ससूनच्या अधीक्षकांना पत्र लिहीत पोलिसांनी स्पष्टीकरण मागितले आहे. दीनानाथ मंगेशकर रुग्णालयात झालेल्या प्रकरणाची संपूर्ण चौकशी करून पुणे पोलिसांनी पत्र लिहिलं आहे. यात महिलेला 5.30 तास रुग्णालयात बसवून ठेवल्याची बाब समोर आली आहे. या प्रकरणी ससूनला लेखी पत्र लिहित पोलिसांनी माहिती मागवली आहे. या प्रकरणाशी संबंधित सर्व कागदपत्रे पोलिसांनी पत्रासोबत जोडली असल्याची माहिती समोर येत आहे.
आणखी वाचा
महत्त्वाच्या बातम्या
