Ladki Bahin Yojana: पडताळणी पूर्ण झाल्यावरच लाडक्या बहिणींना पैसे? साडेपाच लाख लाभार्थी झाले कमी, लाडक्या बहिणींना फेब्रुवारीचा हफ्ता उशिरा मिळण्याची शक्यता
Ladki Bahin Yojana: लाभार्थी महिलांच्या नावे चारचाकी आहेत, त्याची पडताळणी देखील सुरु आहे. त्यामुळे पडताळणी पूर्ण होईपर्यंत लाडक्या बहिणींना लाभ मिळणार नाही, अशी वस्तुस्थिती आहे.
पुणे: राज्यातील महायुती सरकारने सुरू केलेली 'मुख्यमंत्री लाडकी बहीण योजना' ही योजना सुरूवातीपासूनच चर्चेत आहे. या योजनेद्वारे लाभार्थी महिलांच्या बँक खात्यात दरमहा 1500 रुपये जमा केले जात आहेत. पण आता सरकारने या योजनेतील लाभार्थ्यांची पडताळणी सुरू केली असून अनेक महिलांमध्ये चिंतेचे वातावरण पसरले आहे. योजनेतील पात्र महिलांच्या घरी चारचाकी वाहन असल्याची माहिती मिळालेल्या लाभार्थ्यांच्या घरी जाऊन पडताळणी केली जाणार असून, यामुळे काही अपात्र महिलांची नावे वगळण्याची प्रक्रिया देखील सुरू झाली आहे. त्यामुळे आता या महिन्याचा लाभ पडताळणी पूर्ण होईपर्यंत लाडक्या बहिणींना मिळणार नाही अशी शक्यता वर्तवली जात आहे.
मुख्यमंत्री माझी लाडकी बहीण बहीण योजनेअंतर्गत दोन कोटी 59 लाख महिला लाभार्थी आहेत. त्यांना दरमहा तीन हजार 885 कोटी रुपये सरकारी तिजोरीतून द्यावे लागतात. यामध्ये अशा काही महिला लाभार्थी आहेत त्यांना इतरही योजनांचा लाभ मिळतो आहे. पण, आता संजय गांधी निराधार योजना, नमो शक्ती योजना व स्वतःहून लाडकी बहीण योजनेचा लाभ नाकारणाऱ्या लाभार्थीची संख्या पाच लाख 40 हजारांपर्यंत पोहोचली आहे. सध्या ज्या लाभार्थी महिलांच्या नावे चारचाकी आहेत, त्याची पडताळणी देखील सुरु आहे. त्यामुळे पडताळणी पूर्ण होईपर्यंत लाडक्या बहिणींना लाभ मिळणार नाही, अशी वस्तुस्थिती आहे.
विधानसभा निवडणुकीच्या आधी ही योजना जाहीर करण्यात आली होती, मात्र, काही महिन्यातच योजनेसंदर्भात काही तक्रारी समोर येऊ लागल्या. त्यानुसार आता निकषांनुसार किती अपात्र महिला या योजनेचा लाभ घेत आहेत, याचा शोध घेतला जात आहे. पहिल्या टप्प्यात महिला लाभार्थीकडील चारचाकी वाहनांची पडताळणी सुरु आहे. अंगणवाडी सेविकांना संबंधित महिलांच्या नावाच्या याद्या दिल्या असून पडताळणीचा अहवाल आठ दिवसांत शासनाला सादर होणार आहे. त्यानंतर उर्वरित लाडक्या बहिणींना फेब्रुवारीचे पैसे वितरित होतील. त्यासाठी मार्च महिना उजाडेल, अशी शक्यता वर्तवली जात आहे. दुसरीकडे आता लाडक्या बहिणींच्या पडताळणीमुळे मुख्यमंत्री अन्नपूर्णा योजनेचाही लाभ थांबला आहे.
त्याचबरोबर मुख्यमंत्री माझी लाडकी बहीण योजनेतील ज्या लाभार्थी महिलांच्या नावे चारचाकी वाहने आहेत, त्यांची अंगणवाडी सेविकांमार्फत पडताळणी सुरू आहे. त्यासाठी आणखी आठ-दहा दिवस लागतील. त्यानंतर त्याचा अहवाल शासनाला पाठविला जाईल आणि शासन स्तरावरून त्यासंदर्भातील निर्णय होईल, अशी माहिती समोर आली आहे.
मुख्यमंत्री लाडकी बहीण योजनेचा फटका?
मुख्यमंत्री लाडकी बहीण योजनेचा फटका बसल्याचं चित्र आहे. अर्थखात्याकडून विविध विभागाच्या खर्चाला कात्री लागली आहे.
महाराष्ट्र राज्याच्या वित्त विभागाचा सन 2024-25 सुधारित अंदाजपत्रक निश्चित करण्यात आलं आहे. राज्यातील विविध विभागांना किती निधी खर्च करण्यात यावा, संदर्भात अनुमान घालून देण्यात आलं आहे. एकूण वार्षिक तरतुदीच्या 70 टक्केच निधी खर्च करण्याच्या सूचना देण्यात आल्या आहेत. या 70 टक्क्यांपैकी निवृत्ती वेतन, शिष्यवृत्ती आणि विद्यावेतन, सहायक अनुदानित वेतन, कर्ज व वागवू रक्कम, कर्जाची परतफेड आणि अंतरलेखा हस्तांतरे या विभागांना 100 टक्के निधी हा खर्च करता येणार आहे.
बक्षीसे, विदेश प्रवास खर्च, प्रकाशने, संगणक खर्च, इतर प्रशासकीय खर्च, जनहितार्थ खर्च, लहान बांधकामे, सहाययक अनुदाने,
ननर्षमतीकरीता अनुदान, मोटार वाहने, यंत्रसामग्री, मोठी बांधकामे, गुंतिणूका यासाठी जर निधी लागणार असेल तर, 18 फेब्रुवारी पर्यंत वित्त विभागाकडे निवेदन सादर करण्यात यावे अश्या सूचना अर्थखात्याकडून करण्यात आली आहे.
महत्त्वाच्या बातम्या
