Jagdish Mulik On Jitendra Awhad: "बरं झालं मुंब्र्याच्या औरंग्यानं गरळ ओकली"; जगदीश मुळीकांचा जितेंद्र आव्हाडांवर पलटवार
Jagdish Mulik : भाजप शहराध्यक्ष जगदीश मुळीक (Jagdish Mulik) यांचे भावी खासदार असे पोस्टर लावण्यात आले होते. त्यावरुन राष्ट्रवादीचे नेते जितेंद्र आव्हाड यांनी समाचार घेतला होता. त्यावर आता जगदीश मुळीक यांनीदेखील पलटवार केला आहे.
Jagdish Mulik : भाजप शहराध्यक्ष जगदीश मुळीक (Jagdish Mulik) यांचे भावी खासदार असे पोस्टर लावण्यात आले होते. त्यावरुन राष्ट्रवादीचे नेते जितेंद्र आव्हाड यांनी समाचार घेतला होता. त्यावर आता जगदीश मुळीक यांनी देखील पलटवार केला आहे. मुळीकांनी जितेंद्र आव्हाड यांच्या नावाचा उल्लेख औरंगजेब करत त्यांना प्रत्युत्तर दिलं आहे. जगदीश मुळीकांनी ट्वीट करत आव्हाडांवर चांगलाच निशाणा साधला आहे. त्यासोबतच वाढदिवस साजरा करणार नसल्याचं निवेदन असलेलं बॅनरही त्यांनी पोस्ट केलं आहे.
आतिक शेख या तरुणाने जगदीश मुळीक यांना शुभेच्छा देणारे पोस्टर लावले होते. या पोस्टरवरुन विरोधकांनी जोरदार टीका केली होती. राष्ट्रवादीने भाजपला चांगलंच सुनावलं होतं. जितेंद्र आव्हाड यांनी मुळीकांवर या बॅनरवरुन टीका केली होती. "10 दिवसांचे सुतक तर संपू द्या, मग लावा बॅनर, का तुम्ही वाटच बघत होतात? आणि म्हणता आम्ही इतर पक्षांपेक्षा वेगळे आहोत. हाच का तुमचा वेगळेपणा... बापट साहेबांच्या घरच्यांचे अश्रू अजून वाहत आहेत. तोवरच तुम्ही बॅट पॅड घालून तयार.." असं त्यांनी ट्वीट केलं होतं. ते ट्वीट मुळीकांच्या चांगलंच जिव्हारी लागल्याचं दिसत आहेत. त्यांनीदेखील ट्वीट करत टीका केली आहे.
जगदीश मुळीक यांनी ट्वीटमध्ये काय लिहिलंय?
जगदीश मुळीक यांनी ट्वीट करुन आव्हाडांवर पलटवार केला आहे. जितेंद्र आव्हाड यांचा उल्लेख थेट औरंगजेब म्हणून केला आहे. 'बरं झालं मुंब्र्याच्या औरंग्यानं गरळ ओकली. या हिंदुद्वेष्ट्याकडून संस्कार शिकण्याइतकी वाईट वेळ आमच्यावर आलेली नाही. फेकन्यूजवर पोसलेल्या या माणसानं फोटोची साधी खातरजमा करायचे कष्ट घेतले नाहीत! प्रसिद्धीसाठी देशद्रोही, महाराष्ट्रद्रोही बनणाऱ्या जितुद्दीनला आता जनतेनं पुरतं ओळखलं आहे.", असं त्यांनी ट्वीटमध्ये लिहिलं आहे.
त्यासोबतच मुळीक यांनी वाढदिवसांसंदर्भात कार्यकर्त्यांना निवेदन केलेल्या बॅनरचा फोटोदेखील जोडला आहे. त्यात माझ्या वाढदिवसादिनी अर्थात 1 एप्रिल रोजी दरवर्षी आपण मला भरभरून शुभेच्छा देता, विविध समाजपयोगी उपक्रमाचे आयोजन करता आपल्या या सदिच्छा मला आजवर निश्चितच पाठबळ देत आल्या आहेत. त्याबद्दल आपले मनापासून धन्यवाद... लोकनेते स्व. गिरीशभाऊ बापट यांच्या निधनामुळे 1 एप्रिल रोजी असणारा वाढदिवस साजरा न करण्याचा निर्णय घेतला असून सर्वांनी याची नोंद घ्यावी. वाढदिवसाचे सर्व कार्यक्रम आणि उपक्रम रद्द करण्यात आले आहेत, असं विनेदनामध्ये जगदीश मुळीक यांनी म्हटलं आहे.
महत्त्वाच्या बातम्या
ट्रेंडिंग न्यूज
