Mahesh Landge : भाजप आमदार महेश लांडगे प्रोटोकॉल तोडतात, त्यांना शहराध्यक्षांचं वावडं? पदाधिकाऱ्यांनी थेट प्रदेशाध्यक्षांकडेच केली तक्रार

Mahesh Landge : : भाजपचे आमदार महेश लांडगे यांना शहराध्यक्ष शंकर जगताप यांचे वावडे आहे का? असा सवाल उपस्थित करत पदाधिकाऱ्यांनी मोठं पाऊल उचललं आहे.

Mahesh Landge and Chandrashekhar Bawankule

Source : Facebook / PTI

पिंपरी चिंचवड : भाजपचे आमदार महेश लांडगे (Mahesh Landge) यांना शहराध्यक्ष शंकर जगताप (Shankar Jagtap) यांचे वावडे आहे का? असा प्रश्न उपस्थित करत भाजप चिटणीस सचिन काळभोरांनी (Sachin Kalbhor) थेट प्रदेशाध्यक्ष चंद्रशेखर बावनकुळे (Chandrashekhar Bawankule) यांच्याकडे शिस्तभंगाची कारवाई करण्याची मागणी केली आहे. यामुळे भाजपमधील (BJP) अंतर्गत धुसपूस समोर आले आहे.  

भाजप चिटणीस सचिन काळभोर यांनी म्हटले आहे की, आमदार महेश लांडगे हे शहराध्यक्ष शंकर जगताप यांचा उल्लेख टाळतात. त्यांचा फोटो कुठेही वापरत नाही. पक्षाच्या बैठकीला देखील ते हजर राहत नाहीत, अशा पद्धतीने महेश लांडगे हे प्रोटोकॉल तोडतात, त्यामुळे त्यांच्यावर शिस्तभंगाची कारवाई करावी, अशी मागणी प्रदेशाध्यक्ष चंद्रशेखर बावनकुळे यांच्याकडे आम्ही करणार असल्याची माहिती त्यांनी दिली आहे. 

महेश लांडगे प्रोटोकॉल तोडतात

पिंपरी-चिंचवड महानगरपालिका हद्दीत तीन विधानसभा मतदारसंघ आहेत. चिंचवड व पिंपरी विधानसभा मतदारसंघात सांस्कृतिक, धार्मिक, राजकीय कार्यक्रमासाठी भाजपचे कार्यकर्ते शंकर जगताप यांचे शहराध्यक्ष म्हणून फोटो फ्लेक्स छापतात. त्यामुळे चिंचवड व पिंपरी विधानसभा मतदारसंघात सामान्य नागरिकांना शंकर जगताप परिचित आहेत. तर भोसरी विधानसभा मतदारसंघात शंकर जगताप यांच्या जाहिरात बोर्ड तसेच फ्लेक्सवर पिंपरी चिंचवड शहर अध्यक्ष म्हणून प्रोटोकॉल नियमानुसार फोटो छापला जात नाही किंवा टाळले जाते. त्यामुळे या मतदारसंघात संघात शंकर जगताप हे शहराध्यक्ष आहेत की नाही? याची कल्पनाही सामान्य नागरिकांना नाही. लोकसभा निवडणुकीत शहराध्यक्ष शंकर जगताप यांचे फोटो जाहिरात बोर्डवर छापण्यात आले नव्हते. तसेच महेश लांडगे शंकर जगताप यांचे फोटो लावण्यात टाळाटाळ करतात, असे सचिन काळभोर यांनी म्हटले आहे.  

महेश लांडगेंवर शिस्तभंगाची कारवाई करावी

येत्या विधानसभा निवडणुकीत आमदार महेश लांडगे हे शहराध्यक्ष शंकर जगताप यांचे फोटो फ्लेक्सवर लावणार की नाही? प्रदेशाध्यक्ष चंद्रकांत बावनकुळे व उपमुख्यमंत्री देवेंद्र फडणवीस यांनी आमदार महेश लांडगे यांना वैयक्तिक पातळीवर लेखी पत्राद्वारे समज पत्र द्यावे. त्यांच्यावर शिस्तभंगाची कारवाई करावी, अशी मागणी सचिन काळभोर यांनी केली आहे. आता यावर महेश लांडगे काय बोलणार? याकडे सर्वांचे लक्ष लागले आहे.

आणखी वाचा