Rahul Narvekar : राहुल नार्वेकरांची विधानसभा अध्यक्षपदी निवड होताना ठाकरे गटाची कृती सर्वांच्या नजरेत भरली, 20 पैकी एकही जण सभागृहात उपस्थित राहिला नाही

Shiv Sena UBT : राहुल नार्वेकर यांची आज एकमताने विधानसभेच्या अध्यक्षपदी निवड करण्यात आली आहे. मात्र, विधानसभेत अध्यक्षांची निवड होत असताना शिवसेना ठाकरे गटाचा एकही आमदार सभागृहात उपस्थित राहिला नाही.

Rahul Narvekar and Uddhav Thackeray

Source : ABP Majha

मुंबई : विधानसभेच्या अध्यक्षपदी (Maharashtra Vidhan Sabha Speaker) पुन्हा एकदा राहुल नार्वेकर (Rahul Narvekar) यांची निवड झाली आहे. महाविकास आघाडीकडून विधानसभेच्या अध्यक्षपदासाठी एकही उमेदवारी अर्ज दाखल करण्यात आला नाही. त्यामुळे राहुल नार्वेकर यांची आज एकमताने विधानसभेच्या अध्यक्षपदी निवड करण्यात आली आहे. मात्र, विधानसभेत अध्यक्षांची निवड होत असताना शिवसेना ठाकरे गटाचा (Shivsena UBT) एकही आमदार सभागृहात उपस्थित राहिला नाही, यामुळे राजकीय वर्तुळात चर्चांना उधाण आले आहे. 

विधानसभा अध्यक्ष म्हणून राहुल नार्वेकर यांची निवड करावी यासाठी मुख्यमंत्री देवेंद्र फडणवीस (Devendra Fadnavis) यांनी प्रस्ताव मांडला. अनिल पाटील (Anil Patil) यांनी अनुमोदन दिले. यानंतर राहुल नार्वेकर यांची आवाजी मतदानाने एकमताने विधानसभा अध्यक्षपदी निवड करण्यात आली आहे. 

ठाकरेंचे सर्व आमदार गैरहजर

राहुल नार्वेकरांची निवड होत असताना ठाकरे गटाचे आमदार गैरहजर असल्याचे दिसून आले. शिवसेना पक्षाचा निकाल देताना ठाकरे गटाने राहुल नार्वेकर यांच्यावर अनेक आरोप केले होते. शिवसेनेतील बंडखोरीनंतर शिवसेना आमदार अपात्रता प्रकरणात निकाल देताना राहुल नार्वेकर यांनी एकनाथ शिंदेंसह 16 आमदारांना पात्र ठरवले होते. तसेच एकनाथ शिंदे यांच्या नेतृत्वाखालील पक्ष अधिकृत शिवसेना असल्याचा देखील निर्णय त्यांनी घेतला होता. हा निर्णय घेताना राहुल नार्वेकर यांनी निवडणूक आयोगाचा आधार घेतला होता. यानंतर शिवसेना ठाकरे गटाने राहुल नार्वेकर यांच्या निर्णयावर आक्षेप घेत त्यांच्यावर आरोप केले होते. राहुल नार्वेकर यांनी चुकीचा निर्णय घेतल्याचा हल्लाबोल ठाकरे गटाने घेतला होता. आता राहुल नार्वेकर यांची पुन्हा एकदा विधानसभा अध्यक्षपदी निवड होत असताना शिवसेना ठाकरे गटाचे सर्व आमदार गैरहजर असल्याचे दिसून आले. 20 पैकी एकही जण सभागृहात उपस्थित राहिला नाही. त्यामुळे ठाकरे गटाने केलेल्या कृतीची चर्चा आता राजकीय वर्तुळात रंगली आहे.  

काय म्हणाले देवेंद्र फडणवीस? 

मुख्यमंत्री देवेंद्र फडणवीस सभागृहात बोलताना म्हणाले की, राहुल नार्वेकर यांची विधानसभा अध्यक्षपदी फेरनिवड झाली याबाबत मी तमाम विधानसभा सदस्यांच्या वतीने आणि राज्याच्या 12 कोटी जनतेच्या वतीने अभिनंदन करतो. विरोधी पक्षाचे आभार मानतो. काही अपवाद वगळता अध्यक्षांची बिनविरोध निवड करण्याची परंपरा आहे. त्या परंपरेचा मान राखत आपल्या निवडीला विरोधी पक्षाच्या सदस्यांचे आणि गटनेत्यांचे आभार मानतो, असं त्यांनी म्हटले.

इतर महत्त्वाच्या बातम्या