Maharashtra Breaking News LIVE: राज्य, देश तसेच जगभरातील महत्त्वाच्या घडामोडींचा आढावा वाचा एका क्लिकवर...

Maharashtra Breaking News Live Updates: राज्य, देश तसेच जगभरातील महत्त्वाच्या घडामोडींचा आढावा वाचा एका क्लिकवर...

Background

राज्यात सध्या मोठ्या घडामोडी घडत आहेत. बीडचे मस्साजोग येथील सरंपच संतोष देशमुख यांच्या हत्येप्रकरणी वाल्मिक कराडला पोलीस कोठडी देण्यात आली आहे. त्याने पोलिसांसमोर आत्मसमर्पण केले होते. दरम्यान, कराड यांच्या अटकेनंतर देशमुख हत्याप्रकरणात अनेक महत्त्वाचे खुलासे होण्याची शक्यता आहे. तर दुसरीकडे राज्यात पारा चांगलाच घसरला असून सर्वदूर थंडीचा कडाका वाडला आहे. या प्रमुख घडामोडींसह राज्यातील इतरही महत्त्वाच्या घटनांचे अपडेट्स वाचा एका क्लिकवर...

1. खातेवाटपानंतर राज्य मंत्रिमंडळाची आज पहिलीच बैठक, शंभर दिवसांचा रोड मॅप आणि प्रस्तावित एसटी भाडेवाढीवर निर्णय अपेक्षित

2. सरपंच संतोष देशमुख हत्याप्रकरणी एसआयटीची स्थापना, आयपीएस डॉ. बसवराज तेली यांच्या अध्यक्षतेखाली होणार तपास, सीआयडीचा स्वतंत्र तपास सुरूच राहणार

3. मंत्रिपद न मिळाल्यानं नाराज असलेले छगन भुजबळ परदेशवारी आटोपून आज नाशकात परतणार, सावित्रीबाई फुलेंच्या जयंतीचा उद्या कटगुणमध्ये कार्यक्रम

4. संभाजीनगरात मंत्रिपदापासून दूर राहिलेल्या अब्दुल सत्तार यांचं शक्तिप्रदर्शन...विश्वास असेपर्यंत शिंदेंना साथ, विश्वास संपल्यानंतर 'निर्णय', सत्तारांचा थेट इशारा...

5. सोशल मीडियावर आक्षेपार्ह पोस्ट करणारे रडारवर, 12 यूझर्सविरोधात गुन्हा दाखल, मुख्यमंत्र्यांची बदनामी केल्याप्रकरणी कारवाई 

10:56 AM (IST)  •  02 Jan 2025

Sindhudurg Floating Jetty : मालवणमधील दांडी समुद्र किनाऱ्यावर राज्यातील पहिली तरंगती जेटी

Sindhudurg News : महाराष्ट्रातील पहिली तरंगती जेटी सिंधुदुर्गातील मालवणमधील दांडी समुद्र किनाऱ्यावर कार्यान्वित करण्यात आली आहे. सिंधुदुर्ग किल्ला दर्शन आणि स्कुबा डायव्हिंगसाठी ही नवीन तरंगती जेटी कार्यान्वित करण्यात आली आहे. महाराष्ट्र मेरीटाइम बोर्डाकडून महाराष्ट्रातील पहिली तरंगती जेटी कार्यान्वित करण्यात आली आहे. यामुळे किल्यावर जाण्यासाठी मालवण बंदर वरून लागणारा वेळ कमी करण्यासाठी मदत होणार आहे. या नवीन तरंगती जेटी वरून 5 मिनिटात सिंधुदुर्ग किल्यावर जाता येणार आहे. तसेच, पर्यटन व्यावसायिकांना याचा फायदा होणार आहे, याबाबत माहिती बंदर विभागाचे अधिकारी अनंत गोसावी यांनी दिली आहे.

10:38 AM (IST)  •  02 Jan 2025

Sindhudurg Cashew : केंद्राच्या एक जिल्हा एक उत्पादनात सिंधुदुर्गचा काजू प्रक्रिया उ‌द्योगाचा समावेश

Sindhudurg News : केंद्रीय वाणिज्य आणि उद्योग मंत्रालयाच्या केंद्र शासनाच्या एक जिल्हा एक उत्पादनासाठी देशातील 60 जिल्ह्यांच्या नामांकनामध्ये राज्यातील 14 जिल्ह्यामध्ये सिंधुदुर्गच्या काजू प्रक्रिया उ‌द्योगाचा समावेश करण्यात आला आहे. काजू आणि काजू उत्पादनाबाबत तसेच काजू प्रक्रियाबाबत "वेंगुर्ला काजू" यांस 2018  मध्ये जीआय मानांकन मिळाले आहे. जिल्ह्यामध्ये एकूण 72000 हेक्टर क्षेत्रामध्ये काजू लागवड आहे. देशामध्ये काजू प्रक्रियामध्ये सिंधुदुर्ग जिल्ह्याचा पहिला क्रमांक आहे. त्यामुळे केंद्राच्या एक जिल्हा एक उत्पादनात सिंधुदुर्गचा काजू प्रक्रिया उ‌द्योगाचा समावेश करण्यात आला आहे.

10:21 AM (IST)  •  02 Jan 2025

Wardha Accident : दुचाकीचा भीषण अपघात, माजी खासदार रामदास तडस यांची अपघातग्रस्ताला मदत

Wardha News : वर्ध्याच्या हिंगणघाट मार्गावरील धोतरा जवळ अपघातात गंभीर जखमी झालेला दुचाकीचालक प्रज्वल ढगे हा रस्त्यावर पडून असल्याचे माजी खा. रामदास तडस यांना दिसले. रक्तबंबाळ अवस्थेत पडून असणाऱ्या प्रज्वलला रामदास तडस यांनी क्षणाचाही विलंब न करता आपल्या गाडीत बसवत हिंगणघाटच्या उपजिल्हा रुग्णालयात नेले. याच काळात त्यांनी संबंधित अधिकाऱ्यांना फोन करून उपचारासाठी तयार राहण्याच्या सूचना केल्या. उपजिल्हा रुग्णालयात प्राथमिक उपचार केला. तब्येत स्थिर असल्यानं त्याला नागपूर इथं पुढील उपचारासाठी हलविण्यात आलं. माजी खा. रामदास तडस यांच्या कार्यतत्परतेमुळे प्रज्वलचा जीव वाचल्याने नातेवाईकानी रामदास तडस यांचे आभार मानले.

10:18 AM (IST)  •  02 Jan 2025

Ahilyanagar Crime News : 17 लाखांची लूट करणारे जेरबंद

Ahilyanagar News : वाटमारी करुन 17 लाख रुपये लुटणाऱ्या एका अल्पवयीन आरोपीसह तीन जणांना अहिल्यानगरच्या स्थानिक गुन्हे शाखेने जेरबंद केलं आहे. 30 डिसेंबर रोजी राहुरी तालुक्यातील ब्राह्मणी येथील अनिल बनसोडे हे दुधाच्या पैशाचा भरणा करण्यासाठी कारमधून 17 लाख रुपये घेऊन जात असताना अज्ञात चार जणांनी त्यांची कार रस्त्यात अडवली आणि मारहाण करत जवळ असलेले सर्व 17 लाख रुपये लुटले. या प्रकरणाचा समांतर तपास स्थानिक गुन्हे शाखेकडे दिल्याने स्थानिक गुन्हे शाखेच्या पथकाने घटनेची माहिती घेत सूत्र फिरवले. मिळालेल्या माहितीच्या आधारे नगर शहरातील एमआयडीसी परिसरातून तीन जणांना ताब्यात घेतला आहे. यांच्याकडे कसून चौकशी केल्यानंतर लूट केल्याची कबुली दिली आहे. लुटीत वापरलेली मोटरसायकल 3 लाख रुपये रोख, असा 4 लाख एक हजार रुपयांचा मुद्देमाल पोलिसांनी जप्त केला आहे. या प्रकरणाची पोलीस आता कसून चौकशी करत आहेत.

10:03 AM (IST)  •  02 Jan 2025

Dharashiv Electricity Issue : धाराशिव जिल्ह्यातील नारंगवाडी इथं सौर प्रकल्प, मात्र शेतकऱ्यांना वीज मिळेना

Dharashiv News : मुख्यमंत्री सौर कृषी वाहिनी प्रकल्प 2.0 अंतर्गत वाशिम जिल्ह्यातील उंबरठा आणि धाराशिव जिल्ह्यातील नारंगवाडी इथं सौर प्रकल्प उभारण्यात आले. मुख्यमंत्री देवेंद्र फडणवीस यांच्या हस्ते नुकतच या प्रकल्पाचे लोकार्पणही करण्यात आले. या प्रकल्पामुळे शेतकऱ्यांना दिवसा वीज उपलब्ध होणार असल्याचं सांगण्यात आले. त्यामुळे शेतकऱ्यांमध्ये आनंदाचं वातावरण होतं.  मात्र, नारंगवाडी इथं अद्याप शेतकऱ्यांना दिवसा वीज मिळत नाही. शेती पिकांना पाणी देण्यासाठी शेतकऱ्यांची रात्रपाळी सुरूच आहे. धाराशिवचे जिल्हाधिकारी सचिन ओम्बासे यांनी नारंगवाडी येथील सौर प्रकल्पाला भेट दिली. त्यावेळी शेतकऱ्यांनी जिल्हाधिकारी यांच्याकडे आपली कैफियत मांडली.