Sharad Koli vs Gulabrao Patil : दादागिरी मोडणार, गुलाबराव पाटील यांना हरवणार, शरद कोळींचा निर्धार
Jalgaon News : युवा सेनेचे राज्य विस्तारक शरद कोळी यांनी मंत्री गुलाबराव पाटील यांना त्यांच्याच मतदारसंघातून आव्हान दिलं आहे. 2024 च्या विधानसभा निवडणुकीत पराभव करण्याचा निर्धार त्यांनी केला.
Jalgaon News : पाणीपुरवठा मंत्री गुलाबराव पाटील (Gulabrao Patil) यांचा 2024 च्या विधानसभा निवडणुकीत (Vidhan Sabha Election 2024) पराभव करण्याचा निर्धार, ठाकरे गटाचे युवासेना नेते शरद कोळी (Sharad Koli) यांनी केला. महाप्रबोधन यात्रेत जिल्हाबंदी असलेले शरद कोळी हे आज धरणगाव (Dharangaon) पोलीस ठाण्यात हजर झाले. त्यावेळी त्यांनी पत्रकारांशी संवाद साधला.
युवा सेनेचे राज्य विस्तारक असलेले शरद कोळी यांनी मंत्री गुलाबराव पाटील यांना त्यांच्याच मतदारसंघातून आव्हान दिलं आहे. शरद कोळी हे आज धरणगाव पोलीस ठाण्यात दाखल गुन्ह्यात अटकपूर्व जामिनासाठी आले होते. यादरम्यान त्यांनी पत्रकारांशी बोलताना 2024 ची निवडणूक ही मंत्री गुलाबराव पाटील यांच्या विरोधात लढणार असल्याचा निर्धार केला.
गुलाबरावांचं राजकारण दादागिरीचं
मंत्री गुलाबराव पाटील यांचे 30 ते 40 वर्षाचं राजकारण हे दादागिरीच्या जीवावर चालले आहे. मंत्रिपदाचा दुरुपयोग करत मंत्री गुलाबराव पाटील यांनी माझ्यावर खोटा गुन्हा दाखल केला, असा आरोप शरद कोळी यांनी केला. धरणगाव आणि जळगाव जिल्ह्यातील दादागिरी मोडून काढण्यासाठी मंत्री गुलाबराव पाटील यांच्या विरोधात दंड थोपटणार असून, जळगाव ग्रामीण मतदार संघातून आमदारकीची निवडणूक लढवणार असल्याचं शरद कोळी यांनी जाहीर केलं.
शरद कोळी नेमकं काय म्हणाले?
2024 मध्ये गुलाबरावांना ना भूतो ना भविष्य त्यांना मुळासकट उपटून काढणार. यांची दादागिरी मोडून काढण्यासाठी आम्ही शहीद झालो तरी चालेल, पण आम्ही आता थांबणार नाही. 30-40 वर्षापासून इथे दादागिरी चालू आहे. कोळी समाजाच्या जीवावर, शिवसेनेच्या जीवावर निवडून येऊन दादागिरी सुरु आहे. पण एकच सांगतो, तुम्ही मंत्रिमंडळाचा गैरवापर करुन, गोरगरिबांना त्रास देताय, ही दादागिरी मोडून काढणार. त्यासाठी 2024 मध्ये मी गुलाबरावांविरुद्ध निवडणुकीला उभं राहणार, त्यांचा पराभव करणार, असा निर्धार शरद कोळी यांनी बोलून दाखवला.
शरद कोळींची धरणगाव पोलीस ठाण्यात हजेरी
युवासेनेचे राज्य विस्तारक शरद कोळी यांनी महाप्रबोधन यात्रेतील धरणगाव येथील भाषणात मंत्री गुलाबराव पाटील यांच्याबद्दल आक्षेपार्ह वक्तव्य केल्याचा आरोप करत त्यांच्यावर गुन्हा दाखल झाला होता. याप्रकरणी शरद कोळी यांनी आज धरणगाव पोलीस ठाण्यात हजेरी लावली. सुषमा अंधारे (Sushma Andhare) यांची महाप्रबोधन यात्रेतील सभा धरणगावात पार पडली होती. या सभेत मंत्री गुलाबराव पाटील यांच्या विरुद्ध वक्तव्य केल्याचा आरोप करत, शरद कोळी यांच्याविरुद्ध गुन्हा दाखल करण्यात आला होता. यानंतर त्यांना जळगाव जिल्हा बंदी सुद्धा करण्यात आली होती.
बाईक रॅलीने स्वागत
दरम्यान, शरद कोळी यांच्या समर्थनार्थ दुचाकी रॅली काढून त्यांचं जंगी स्वागत करण्यात आलं. यावेळी उद्धव ठाकरे गटाच्या वतीने शक्तीप्रदर्शन करण्यात आलं. दुचाकीवर वरूनच रॅलीत सहभागी होत, शरद होळी यांनी धरणगाव पोलीस स्टेशन गाठले. यादरम्यान धरणगाव शहरातील चौकात उद्धव ठाकरे गटाचे शिवसेनेचे सहसंपर्कप्रमुख गुलाबराव वाघ, माजी नगराध्यक्ष निलेश चौधरी, महानगरप्रमुख शरद तायडे यांच्यासह पदाधिकाऱ्यांच्यावतीने जल्लोषात स्वागत करण्यात आले. यावेळी जोरदार घोषणाबाजीही करण्यात आली. पदाधिकारी तसेच वकील यांच्यासोबत पायी चालतच शरद कोळी यांनी धरणगाव पोलीस स्टेशन गाठले या ठिकाणी त्यांच्या अटकपूर्व जामीनाची कार्यवाही करण्यात आली.
VIDEO : Sharad Koli on Gulabrao Patil: दादागिरी मोडणार, गुलाबराव पाटील यांना Jalgaon Rural मध्ये हरवणार
महत्त्वाच्या बातम्या
ट्रेंडिंग न्यूज
