Nashik Teachers Constituency Election 2024 : शिक्षक मतदारांना भेटवस्तू अन् पैसे वाटप? आचारसंहिता कक्ष अलर्ट मोडवर

Nashik Teachers Constituency Election 2024 : काही उमेदवारांकडून मतदारांना भेटवस्तू देऊन आमिष दाखविले जात असल्याच्या तक्रारीवरून आचारसंहिता कक्ष अलर्ट मोडवर आला आहे.

Kishor Darade, Sandeep Gulve, Mahendra Bhavsar and Vivek Kolhe

Nashik Teachers Constituency Election 2024 : नाशिक शिक्षक मतदारसंघाच्या निवडणुकीसाठी आज प्रचाराची सांगता होणार असून 26 जून रोजी मतदान पार पडणार आहे. नाशिकची निवडणूक अनेक कारणांनी चर्चेत आली आहे. शिवसेना ठाकरे गटाच्या नेत्या सुषमा अंधारे यांनी शिंदे गटाने पैसे वाटप केल्याचा आरोप केला आहे. तर शिक्षणतज्ञ हेरंब कुलकर्णी यांनी महिला मतदारांना नथ आणि पुरुष मतदारांना कपडे वाटत असल्याचा दावा केला असून त्यांनी याबाबत निवडणूक आयोगात तक्रारही दिली आहे. या पार्श्वभूमीवर आता नाशिक शिक्षक मतदार संघ निवडणुकीत आचारसंहिता कक्ष अलर्ट मोडवर आल्याचे दिसून येत आहे. 

नाशिक शिक्षक मतदारसंघात महायुतीकडून शिवसेना शिंदे गटाचे किशोर दराडे (Kishor Darade) आणि अजित पवारांच्या राष्ट्रवादीचे महेंद्र भावसार (Mahendra Bhavsar) निवडणुकीच्या रिंगणात असल्याने महायुतीत बिघाडी झाल्याचे चित्र आहे. महाविकास आघाडीकडून शिवसेना ठाकरे गटाने संदीप गुळवे (Sandeep Gulve) यांना उमेदवारी दिली आहे. तर विवेक कोल्हे (Vivek Kolhe) हे अपक्ष निवडणूक लढवत आहे. नाशिकच्या चौरंगी लढतीकडे संपूर्ण राज्याचे लक्ष लागले असून या निवडणुकीत कोण बाजी मारणार? याकडे सर्वांचे लक्ष लागले आहे.  

आचारसंहिता कक्ष अलर्ट मोडवर 

हेरंब कुलकर्णी यांनी दिलेल्या तक्रारीनंतर नाशिक शिक्षक मतदारसंघ निवडणुकीत आचारसंहिता कक्ष सतर्क झाले आहे. काही उमेदवारांकडून मतदारांना भेटवस्तू देऊन आमिष दाखविले जात असल्याच्या तक्रारीवरून आचारसंहिता कक्ष अलर्ट मोडवर आला आहे. आचारसंहिता कक्ष प्रमुखाचे शिक्षण उपसंचालक आणि नाशिक विभागातील जिल्हाधिकारी यांना तक्रारीचे पत्र पाठवण्यात आले होते. जळगाव जिल्ह्यातील तक्रार असली तरी इतर जिल्ह्यातील जिल्हाधिकाऱ्यांना सतर्क राहण्याचे आवाहन करण्यात आले आहे. आचारसंहिताचा भंग झाल्यास कारवाई करण्याच्या सूचनाही देण्यात आल्या आहेत. 

काय म्हणाले हेरंब कुलकर्णी?

नाशिक शिक्षक मतदारसंघाच्या निवडणुकीत पुरुष शिक्षक असेल तर रेमंड कंपनीचे सफारीचे कापड आणि महिला शिक्षक असेल तर नथ दिली जात आहे. त्या भेट वस्तूंचे फोटो सोशल मीडियात फिरत आहेत. जळगाव जिल्ह्यात तर थेट शाळेवर जाऊन असे वाटप करण्याची हिंमत झाल्याची माहिती समोर येत आहे. त्यामुळे निवडणूक आयोगाने याची दखल घेऊन कारवाई करावी, अशी मागणी हेरंब कुलकर्णी यांनी केली होती.

जिल्हानिहाय मतदार संख्या

नंदुरबार :- 5 हजार 393

धुळे :- 8 हजार 159

जळगाव :- 13 हजार 122

अहमदनगर :-  17 हजार 392

नाशिक :- 25 हजार 302

एकूण मतदार :- 69 हजार 368

आणखी वाचा