वीर जवान अमर रहे! जवान संदीप मोहिते अनंतात विलीन, काळीज पिळवटून टाकणारा आक्रोश

Nashik News : शहीद जवान संदीप मोहिते यांचे पार्थिव नुकतेच मांडवड गावी दाखल झाले. यावेळी भारत माता की जय, वीर जवान अमर रहे अशा घोषणा देत त्यांना अखेरचा निरोप देण्यात आला.

Sandip Mohite ( Image Source :ABP Majha Reporter, Nashik )

Nashik Nandgaon News नांदगाव : मांडवड येथील लष्करी सेवेत असलेले जवान संदीप भाऊसाहेब मोहिते (Sandip Mohite) हे लेह लडाख (leh ladakh) येथे मशीन ऑपरेटिंग करताना गुरुवारी शहीद झाले. जवान संदीप मोहिते यांचे पार्थिव नुकतेच मांडवड (Mandwad) गावी दाखल झाले. यावेळी भारत माता की जय, वीर जवान अमर रहे अशा घोषणा देत शहीद जवान मोहिते यांना अखेरचा निरोप देण्यात आला. मोहिते कुटुंबियांनी यावेळी हंबरडा फोडला. आज सकाळी 11 वाजता शहीद जवान मोहिते यांच्या पार्थिवावर शासकीय इतमामात अंत्यसंस्कार करण्यात आले. 

जवान संदीप मोहिते हे १०५ इंजिनिअरिंग रेजिमेंटमध्ये हवालदार या पदावर कार्यरत होते. सन २००९ मध्ये ते भारतीय सैन्यदलात (Indian Army) भरती झाले होते. अपघात झाल्याने त्यांना लेह लडाखच्या सैन्यदलाच्या रुग्णालयात दाखल करण्यात आले होते. मात्र वैद्यकीय अधिकाऱ्यांनी त्यांना तपासून वीरगती प्राप्त झाल्याचे सांगितले. नांदगावचे तहसीलदार सिध्दार्थ मोरे,पोलीस निरीक्षक प्रितम चौधरी, गटविकास अधिकारी संदीप दळवी तालुका वैद्यकीय अधिकारी संतोष जगताप, दिनेश पगार, माजी सैनिक नानासाहेब काकळीज यांनी संदीप मोहिते यांच्या निवासस्थानी जात घटनेची माहिती दिली.

2009 पासून होते सैन्य दलात

संदीप मोहिते हे 2009 साली सैन्यदलात (Indian Army) भरती झाले. त्यांनी पुणे (Pune) येथील प्रशिक्षण केंद्रात प्रशिक्षण पूर्ण झाल्यानंतर चंदीगड,अरुणाचल प्रदेश,पठाणकोट, येथे सेवा बजावली. याच दरम्यान साऊथ सुडान येथे विदेशात शांतीसैनिक म्हणून शांतीसेनेत त्यांनी काम केले होते. आता ते लेह लडाख येथे कार्यरत होते, अशी माहिती त्यांचे सैन्यदलातील सहकारी दिपक सोमवंशी (Dipak Somwanshi) यांनी दिली आहे. 

गेल्या आठ वर्षांपूर्वी मामाची मुलगी मनिषा यांच्याशी त्यांचा विवाह झाला होता. सकाळीसच पती-पत्नीमध्ये भ्रमणध्वनी वरुन संभाषण झाले होते. त्यांच्या पश्चात देवराज (5) दक्ष (3) अशी दोन मुले असून वडील भाऊसाहेब मोहीते,आई प्रमिला मोहीते भाऊ शिवाजी मोहिते हे आपला शेतीव्यवसाय करत असून श्रीकांत मोहिते हे सैन्यदलात आहे. मांडवड (Mandwad) बारखडी शिवारात शहीद जवान मोहिते यांचे निवास्थान आहे. त्यांच्या निवासस्थानाकडे जाण्यासाठी तत्काळ रस्त्याचे काम जेसीबीद्वारे पूर्ण करण्यात आले.

इतर महत्वाच्या बातम्या