Nandurbar News: तीन कोटी रुपये खर्च करून बांधलेला जलशुद्धीकरण प्रकल्प धूळ खात पडून, तळोदावासियांना शुद्ध पेयजलाची प्रतीक्षा

Nandurbar News: राजकीय इच्छाशक्तीचा अभाव आणि  राजकारणाची पोळी भाजण्यासाठी केली जाणारी विकास कामे यामुळे या प्रकल्पाची दूरवस्था झाल्याचा आरोप शिवसेना ठाकरे गटाने केला आहे

Feature Photo

 नंदुरबार :  एक दोन नव्हे तर तब्बल तीन कोटी खर्च करुन बांधण्यात आलेले तळोदा नगरपालिकेचा जल शुद्धीकरण केंद्र तब्बल सहा वर्षांपासून धूळ  खात पडून आहे. राजकीय अनास्थेच्या कचाट्यात सापडलेल्या या जलशुद्धीकरण केंद्राची अतिशय दूरवस्था झाली असून कोट्यावधींची उधळण करुन देखील तळोदावासियांना शुद्ध पिण्याचे पाणी मिळत नाही. बोअरिंगच्या पाण्याने संपूर्ण शहराची तहान भागवावी लागत आहे. 

तब्बल तीन कोटी रुपये खर्च

खानदेशातील सर्वात जुनी नगरपालिका म्हणून तळोदा शहराची ओळख आहे. स्वातंत्र्यपूर्व काळात निर्मिती झालेली तळोदा नगरपालिका स्वातंत्र्यांनंतरही इथल्या शहरवासीयांच्या मुलभूत गरजा पूर्ण करण्यास असमर्थ ठरत असल्याचे विदारक चित्र समोर आले आहे. तळोदा पालिकेने बांधलेले जलशुद्धीकरण केंद्र , कॉंग्रेस राष्ट्रवादीच्या सरकारमध्ये मंजूर झालेला तळोदा पालिकेचा जलशुद्धीकरण केंद्राचा महत्वाकांशी प्रकल्प 2017 मध्ये पुर्णत्वास आला. तब्बल तीन कोटी रुपये खर्चून बांधण्यात आलेल्या या जलशुद्धीकरण केंद्रात अत्याधुनिक यंत्रसामग्री बसविण्यात आली.  सोबत शहराला  शुद्ध पाणी पुरवण्यासाठी पाईपलाईन देखील टाकण्यात आल्या. मात्र आज जलशुद्धीकरण केंद्र पूर्ण झाले असून सहा वर्षाहून अधिकचा काळ लोटत आला तरी यात कणभर देखील पाणी शुद्ध झाले नाही. धूळ खात पडलेल्या या जलशुद्धीकरण केंद्राची दुर्दशा झाली आहे. फक्त तळोद्यातील राजकीय इच्छाशक्तीचा अभाव आणि  राजकारणाची पोळी भाजण्यासाठी केली जाणारी विकास कामे यामुळे या प्रकल्पाची दूरवस्था झाल्याचा आरोप शिवसेना ठाकरे गटाने केला आहे.

कुपनलिकेच्या पाण्यामुळे पोटाचे आजार

विशेष म्हणजे गेली सहा वर्षे पालिकेत भाजपाची सत्ता होती. मात्र त्यांची सत्ता असून देखील गुजरातच्या भाजपा सरकारने तापी नदीपात्रीतून पाणी उचलण्यास परवानगी नाकारल्यानेच या जलशुद्धीकरण केंद्रात पाणीच आले नाही. अशातच आता पुन्हा तळोदा शहर पाणी पुरवठासाठी 28 कोटींच्या निधीला मंजुरी देण्यात आली. त्यामुळे आता या प्रकल्पाचा किती वापर होईल आणि याच्या दुरुस्तीसाठी किती निधी लागेल याबाबत मात्र साशंकताच व्यक्त होत आहे. आज तळोदा शहरातील नागरिकांच्या पाण्याची तहान शहरातील साठहून अधिक कुपनलिकेद्वारे भागवली जात आहे. शहरात जागोजागी केलेल्या कुपनलिकेतून तळोदावासियांना कसेबसे पाणी तर मिळते मात्र या कुपनलिकेच्या पाण्याने लहान मुलांसह ज्येष्ठांनादेखील पोटाच्या आजारांना मोठ्या प्रमाणात सामोरे जावे लागत असल्याचे नागरिकांचे म्हणणे आहे. 

पैसे मोजून नागरिक पिण्याचे पाणी विकत घेत असताना पालिकेकडून मात्र पाणीपट्टीची वसूली

याबाबत तळोदा पालिकेच्या प्रशासकांसोबत बोलण्यासाठी तीनदा गेले असता एकदाही येथे कोणीही अधिकारी मिळालाच नाही आणि जे मिळाले ते माहिती देण्यास टाळाटाळ करत असल्याचे दिसून आले. कोट्यावधी रुपये पाण्यात जाण्याचा प्रकार म्हणजे तळोद्याचा जलशुद्धीकरण प्रकल्प आहे. एकीकडे तळोदावासीय खाजगी व्यापाऱ्यांकडून पैसे मोजून पिण्याचे पाणी विकत घेत असताना दुसरीकडे पालिका मात्र पाणीपट्टीची वसूली करतच आहे. मग अशा कोट्यावधी रुपये खर्चून बांधलेल्या योजन अशाच पडून राहणार असेल तर हर घर नल योजना कशी यशस्वी होणार असा सवाल नागरिक उपस्थित करत आहे.

हे ही वाचा :