हेरिटेज इमारत 'एस्प्लनेड मेन्शन' दुरुस्तीसाठी रिकामी करण्यास मुदतवाढ

मुंबई सत्र न्यायालयाच्या अगदीच शेजारी असलेली 'एस्प्लनेड मेन्शन' ही इमारत साल 2011 मध्ये मोडकळीस आलेली धोकादायक इमारत म्हणून महापालिकेने घोषित केली होती.

मुंबई : मुंबई सत्र न्यायालयाशेजारील धोकादायक 'एस्प्लनेड मेंशन' इमारत रिकामी करण्यासाठी सर्वोच्च न्यायालयाने भाडेकरुंना पंधरा दिवसांची मुदतवाढ दिली आहे. त्यामुळे आता 30 मेपर्यंत ही इमारत रिकामी करुन प्रशासनाकडे दुरुस्तीसाठी द्यावी लागणार आहे. अत्यंत धोकादायक अवस्थेत पोहोचलेली 'एस्प्लनेड मेंशन' येत्या 15 मेपर्यंत खाली करण्याचे निर्देश मुंबई उच्च न्यायालयाने महापालिकेला दिले होते. तसंच म्हाडाला तातडीने या इमारतीच्या दुरुस्तीचं काम सुरु करण्याचे निर्देशही दिले आहेत. या हेरिटेज इमारतीच्या दुरुस्तीसाठी अंदाजे 30 कोटींचा खर्च अपेक्षित आहे. काही दिवसांपूर्वीच महापालिकेने या इमारतीतील 154 वर्ष जुनं असलेलं आर्मी कँटीन रेस्टॉरंट तात्काळ बंद करण्याचे निर्देश दिले होते. मुंबई सत्र न्यायालयाच्या अगदीच शेजारी असलेली 'एस्प्लनेड मेन्शन' ही इमारत साल 2011 मध्ये मोडकळीस आलेली धोकादायक इमारत म्हणून महापालिकेने घोषित केली होती. तरीही वर्षभरापूर्वीपर्यंत या इमारतीत अनेक वकिलांची कार्यलयं सुरु होती. काही महिन्यांपूर्वी या इमारतीचा स्लॅब कोसळल्यानंतर जवळपास सर्व वकिलांनी तिथून काढता पाय घेतला. रेस्टॉरंटचा तर अवघ्या काही महिन्यांपूर्वीच आपली कात टाकून चकाचक मेकओव्हर करण्यात आला होता. आपला दुर्दैवाने जर काही दुर्घटना घडली तर उगाच जीवितहानी नको, म्हणून हायकोर्टाने ही इमारत तातडीने रिकामी करुन तिच्या दुरुस्तीचं काम हाती घेण्याचे निर्देश दिले आहेत. याप्रकरणी 4 जूनला हायकोर्टात सुनावणी होणार आहे.