जेलमध्ये इंद्राणीचा नवा उद्योग, भगवदगीतेचा इंग्रजी अनुवाद

मुंबई : शीना बोरा हत्या प्रकरणातील प्रमुख आरोपी इंद्राणी मुखर्जी सध्या तुरुंगात आहे. तुरुंगात बसून आपण भगवद्गीतेतील सातशे श्लोकांचा इंग्रजीत अनुवाद केल्याची माहिती तिने कनिष्ठ कोर्टात दिली. आपण इंग्रजी अनुवाद केलेल्या श्लोकांचं प्रकाशन करण्यात यावं, अशी विनंती इंद्राणीने न्यायाधीशांकडे केली. पुस्तकाच्या विक्रीतून आलेलं अर्ध उत्पन्न इस्कॉनला दान करण्याचा तर उर्वरित रक्कम भायखळा जेलमधील परित्यक्तांना देण्याचा मानस तिने बोलून दाखवला. इंद्राणीनं जुन्या पाचशेच्या नोटांच्या स्वरुपातील 50 हजारांची रक्कम बँकेत जमा करण्याची परवानगी मागितली होती. जेलबाहेर असलेल्या कोणाच्या तरी मदतीने जुन्या नोटा बँकेत भरु देण्याची परवानगी तिने मागितली होती. गेल्या सुनावणीदरम्यान तिला परवानगी देऊन ही रक्कम बँकेत जमा केली गेली. दुसरीकडे पीटर मुखर्जी सध्या आत्मचरित्र लिहित आहेत. त्याचं लेखन पूर्ण करण्यासाठी इंटरनेटविना लॅपटॉप किंवा इलेक्ट्रॉनिक टाईपरायटर देण्याची मागणी त्यांनी केली आहे. आपण दररोज चार तास लेखन करुन लॅपटॉप पुन्हा तुरुंग प्रशासनाकडे देऊ, असं आश्वासन पीटर यांनी दिलं. त्याचप्रमाणे भाचीच्या लग्नासाठी बंगळुरुला उपस्थित राहू देण्याची परवानगीही त्यांनी मागितली होती. एप्रिल 2012 मध्ये शीना बोराची हत्या झाली होती. या प्रकरणी गेल्या वर्षी पोलिसांनी इंद्राणी, तिचा पहिला पती संजीव खन्ना आणि चालक श्यामवर राय याला अटक केली. हे सर्व जण सध्या न्यायालयीन कोठडीत आहेत.

संबंधित बातम्या :

50 हजारांच्या जुन्या नोटा बँकेत भरु द्या, इंद्राणी मुखर्जीचा अर्ज