Eknath Shinde Deputy CM oath: नाथांचा नाथ एकनाथ शिंदेंनी घेतली उपमुख्यमंत्रिपदाची शपथ, शिवसैनिक भारावले
Eknath Shinde Maharashtra DCM: एकनाथ शिंदे यांनी राज्याचे उपमुख्यमंत्री म्हणून पद आणि गोपनीयतेची शपथ घेतली. एकनाथ शिंदे आता देवेंद्र फडणवीस यांच्या नेतृत्त्वाखाली काम करतील.
मुंबई: शिवसेनेचे पक्षप्रमुख आणि राज्याचे माजी मुख्यमंत्री एकनाथ शिंदे यांनी गुरुवारी मुंबईतील आझाद मैदानात संपन्न झालेल्या महायुती सरकारच्या शपथविधी सोहळ्यात राज्याच्या उपमुख्यमंत्रिपदाची शपथ घेतली. महायुतीच्या या शपथविधी सोहळ्याला (Mahayuti Oath Taking Ceremony) विविध राज्यांचे मुख्यमंत्री, अनेक मान्यवर, बॉलीवूड सेलिब्रिटी आणि भाजपचे राज्यभरातील कार्यकर्ते उपस्थित होते.
तत्पूर्वी आज सकाळपासून एकनाथ शिंदे हे उपमुख्यमंत्रिपदाची शपथ घेणार की नाही, याबाबत संभ्रम होता. एकनाथ शिंदे (Eknath Shinde) यांनी गृहमंत्रीपदाची मागणी लावून धरली होती. मात्र, भाजप गृहखाते शिवसेनेला सोडण्यास तयार नाही. त्यामुळे एकनाथ शिंदे हे मंत्रिमंडळात सामील व्हायचे की नाही, या विचारात होते. मात्र, एकनाथ शिंदे हे मंत्रिमंडळात नसल्यास चुकीचा राजकीय संदेश जाऊ शकतो, ही बाब ध्यानात घेऊन भाजपचे नेते एकनाथ शिंदे यांच्या मनधरणीसाठी प्रयत्नशील होते. परंतु, एकनाथ शिंदे यांनी मंत्रिमंडळात सहभागी व्हायचे की नाही, हा सस्पेन्स शेवटपर्यंत कायम ठेवला होता. अखेर शपथविधीसाठी अवघे दोन तास शिल्लक असताना एकनाथ शिंदे यांच्याकडून उपमुख्यमंत्रिपदाची शपथ घेण्याचा निर्णय घेण्यात आला होता. त्यानंतर शिवसेनेचे शिष्टमंडळ राजभवनात गेले आणि त्यांनी राज्यपालांकडे एकनाथ शिंदे यांच्या उपमुख्यमंत्रिपदाच्या शपथविधीचे पत्र सुपूर्द केले होते.
एकनाथ शिंदे यांनी आजच उपमुख्यमंत्रिपदाची शपथ घ्यावी, यासाठी देवेंद्र फडणवीस यांनी जातीने प्रयत्न केले होते. त्यांनी बुधवारी वर्षा बंगल्यावर दोनवेळा जाऊन एकनाथ शिंदे यांची भेट घेतली होती. वर्षा बंगल्यावरील अँटी-चेंबरमध्ये उभय नेत्यांमध्ये चर्चा झाली होती. यावेळी देवेंद्र फडणवीस यांनी एकनाथ शिंदे यांच्या गृहमंत्रीपदाच्या मागणीचा भाजप नेतृत्त्वाकडून विचार केला जाईल, असे सांगितले. आपल्याला एकत्र मिळवून सरकार चालवायचे आहे. आपण कोणालाही साईड कॉर्नर करणार नाही. आपल्याला सगळ्यांना घेऊन पुढे जायचे आहे. तुम्ही आज शपथ घेतली नाही तर चुकीचा अर्थ काढला जाईल, असे फडणवीसांनी एकनाथ शिंदे यांना सांगितले. याशिवाय, शिवसेनेच्या सगळ्या आमदारांकडून काल रात्रीपासून एकनाथ शिंदे यांची समजूत काढण्याचे प्रयत्न सुरु होते. तुम्ही मंत्रिमंडळात असणे महत्त्वाचे आहे. तुमच्याशिवाय आम्हीदेखील मंत्रिमंडळात बसणार नाही, अशी निर्वाणीची भूमिका शिवसेनेच्या आमदारांनी घेतली. या सगळ्यानंतर एकनाथ शिंदे यांनी उपमुख्यमंत्रिपदाची शपथ घेण्याचा निर्णय घेतला होता.
#WATCH | Shiv Sena's Eknath Shinde takes oath as Deputy CM of Maharashtra pic.twitter.com/G33WOBOLbw
— ANI (@ANI) December 5, 2024
आणखी वाचा
महत्त्वाच्या बातम्या
