Eknath Shinde: फडणवीसांच्या बैठकीला एकनाथ शिंदेंची पुन्हा दांडी, राजकीय वर्तुळात चर्चांना उधाण
Eknath Shinde: नगरविकास खात्याशी संबंधित होत्या, त्यामुळे एकनाथ शिंदे यांनी उपस्थित राहणे अपेक्षित होते. मात्र, शिंदेंच्या दांडीने नेत्यांनी पुन्हा एकदा भुवया उंचावल्या आहेत.
मुंबई: राज्याचे उपमुख्यमंत्री एकनाथ शिंदे (Eknath Shinde) यांनी काल ( बुधवारी, ता- 12) मुख्यमंत्री देवेंद्र फडणवीस (Devendra Fadnavis) यांनी बोलावलेल्या बैठकीला दांडी मारली. देवेंद्र फडणवीस यांनी बोलावलेल्या नगरविकास विभागाशी संबंधित बैठकीलाच शिंदे (Eknath Shinde) अनुपस्थित राहिल्याने पुन्हा एकदा चर्चांना उधाण आलं आहे. त्यामुळे पुन्हा एकदा त्यांच्या नाराजीविषयी जोरदार चर्चा सुरू झाली आहे. याआधी एक मंत्रिमंडळ बैठक तसेच 100 दिवसांच्या आढावाच्या बैठकीलाही उपमुख्यमंत्री शिंदे (Eknath Shinde) उपस्थित नव्हते. त्याबरोबर पुणे, नाशिक, नागपूर आणि छत्रपती संभाजीनगर या शहरांच्या विकास प्राधीकरणाची बैठक दुपारी 1 वाजता सह्याद्री अतिथीगृह येथे होणार होती. तर 12.30 वाजता नगरविकास विभागांतर्गत येणाऱ्या नाशिक महापालिका सांडपाणी प्रक्रिया प्रकल्पाबाबतही बैठक होती. या बैठका नगरविकास खात्याशी संबंधित होत्या, त्यामुळे एकनाथ शिंदे यांनी उपस्थित राहणे अपेक्षित होते. मात्र, शिंदेंच्या दांडीने नेत्यांनी पुन्हा एकदा भुवया उंचावल्या आहेत.
मुख्यमंत्री देवेंद्र फडणवीस यांनी काल (बुधवारी, ता- 12) पुणे, नाशिक, नागपूर आणि छत्रपती संभाजीनगर आदी विकास प्राधिकरणांच्या घेतलेल्या बैठकांना उपमुख्यमंत्री एकनाथ शिंदे गैरहजर होते. शिवसेनेच्या मंत्र्यांनी देखील वेगवेगळ्या कारणांवरून आपली नाराजी मंगळवारी मंत्रिमंडळ बैठकीवेळी व्यक्त केल्यानंतर मुख्यमंत्र्यांनी बुधवारी ही बैठक आयोजित केली होती. परंतु शिंदे यांच्या गैरहजेरीमुळे पुन्हा उलटसुलट चर्चा सुरू झाल्या आहेत.
उदय सामंत यांनी पत्राद्वारे व्यक्त केली नाराजी
शिंदेसेनेचे काही आमदार मंत्री अनेक कारणांवरून नाराज आहेत, अशा चर्चा गेल्या काही दिवसांपासून राजकीय वर्तुळात आहेत, अशातच उद्योग खात्यातील अनेक निर्णय प्रशासकीय पातळीवर परस्पर घेतले जात असल्याने मंत्री उदय सामंत यांनी खात्याचे प्रधान सचिव आणि ‘एमआयडीसी’च्या मुख्य कार्यकारी अधिकाऱ्यांना पत्र लिहून नाराजी व्यक्त केल्याची माहिती समोर आली आहे. मंत्री म्हणून आपल्या अधिकारांवर गदा येत असून महत्त्वाच्या बाबी व निर्णयांचे प्रस्ताव आपल्या संमतीसाठी ठेवावेत, अशा सूचना सामंत यांनी दिल्याची माहिती आहे. त्याचबरोबर परिवहनमंत्री प्रताप सरनाईक यांना अंधारात ठेवून व त्यांच्याकडे कार्यभार न देता एसटीच्या अध्यक्षपदाचा कार्यभार परिवहन खात्याच्या अतिरिक्त मुख्य सचिवांकडे देण्यात आला आहे. यासह अन्य मुद्द्यांवर शिवसेनेच्या मंत्र्यांनी मंगळवारी मंत्रिमंडळ बैठकीतच नाराजी व्यक्त केली होती, त्याचबरोबर पालकमंत्री पदाचा प्रश्न देखील अद्याप सुटला नसल्याने काही आमदारांमध्ये नाराजीचा सुर आहे.
या पार्श्वभूमीवर नगरविकास खात्याशी संबंधित बैठकीला शिंदे अनुपस्थित राहिल्याची चर्चा आहे. तर मुख्यमंत्री फडणवीस व उपमुख्यमंत्री अजित पवार, महसूल मंत्री चंद्रशेखर बावनकुळे यांच्यासह संबंधित मंत्री, पालकमंत्री या बैठकांना उपस्थित होते. त्यामुळे शिंदेंची गैरहजेरी चर्चेचा विषय ठरली आहे.
कोणत्या कारणांमुळं अनुपस्थित!
शहरांशी संबंधित विकास प्राधिकरणे नगरविकास विभागाअंतर्गत येतात आणि एकनाथ शिंदे हे या खात्याचे मंत्री असल्याने त्यांची उपस्थिती आवश्यक होती. त्याचबरोबर बैठकीचा निरोप एकनाथ शिंदेंना मंगळवारी दुपारी मिळाला. परंतु आपले पूर्वनियोजित कार्यक्रम असल्याचे सांगून उपमुख्यमंत्री एकनाथ शिंदे हे या बैठकांना अनुपस्थित राहिल्याचे सांगितले जात आहे. या बैठकांना न जाता शिंदे मलंगगड उत्सवास उपस्थित राहिले होते.
महत्त्वाच्या बातम्या
