Lockdown | लाॅकडाऊनमध्ये बर्थडे पार्टी करणाऱ्या पनवेलमधील भाजप नगरसेवकावर गुन्हा

राज्यात लॉकडाऊन आणि जमावबंदी असतानाही मित्रांसोबत वाढदिवस सेलिब्रेशन करणाऱ्या भाजप नगरसेवकावर पनवेल शहर पोलीस ठाण्यात गुन्हा दाखल झाला आहे.

नवी मुंबई : एकीकडे सरकार, आरोग्य यंत्रणा, पोलीस यंत्रणा कोरोनाचा संसर्ग टाळण्यासाठी प्रयत्नशील असताना, लोकप्रतिनिधीच नियमांना केराची टोपली दाखवत असल्याचं चित्र आहे. लॉकडाऊन सुरु असताना बर्थडे पार्टी करणाऱ्या भाजपच्या नगरसेवकावर गुन्हा दाखल करण्यात आला आहे. राज्यात लॉकडाऊन आणि जमावबंदी असताना देखील मित्रांसोबत वाढदिवसाचं सेलिब्रेशन करणारा पनवेलमधील भाजप नगरसेवक अजय बहिरा यांच्यावर पनवेल शहर पोलीस ठाण्यात गुन्ह्याची नोंद झाली आहे. नगरसेवकसह त्याच्या 11 साथीदारांवरही गुन्हा दाखल झाला आहे.

नगरसेवक अजय बहिरा यांनी स्वत:च्या घरी बर्थडे पार्टीचं आयोजन केलं होतं. ते राहत असलेल्या इमारतीच्या गच्चीवर मित्रांसोबत सेलिब्रेशन करत होते. परंतु पोलिसांनी अचानक धाड टाकली असता तिथे 11 जण उपस्थित होते. यावेळी त्यांनी सोशल डिस्टन्सिंगचं पालन केलं नव्हतं. तसंच जमावबंदी असताना एकत्र येणे, मास्क न घालणे इत्यादी गुन्हे त्यांच्यावर दाखल केले आहेत.

अजय बहिरा हे पनवेलमधील प्रभाग क्रमांक 20 चे भाजप नगरसेवक आहेत. 10 एप्रिल रोजी अजय बहिरा यांचा वाढदिवस होता. लॉकडाऊन असल्याने त्यांनी घरीच बर्थडे पार्टीचं आयोजन केलं आणि मित्रांनाही आमंत्रित केलं. परंतु राज्यात संचारबदी असल्याने चारपेक्षा जास्त लोकांना एकत्र जमण्यास मज्जाव आहे. तरीही अजय बहिरा यांच्यासह 11 जण इमारतीच्या गच्चीवर पार्टी करत होते.

यावेळी संचारबंदीचे नियम पायदळी तुडवण्यात आलेच, पण सोशल डिस्टन्सिंगलाही हरताळ फासला. शिवाय कोरोनाचा प्रादुर्भाव रोखण्यासाठी मास्क वापरणं अनिवार्य असताना, कोणीही याचं पालन केलं नाही. त्यामुळे पोलिसांनी या ठिकाणी धाड टाकून नगरसेवकासह अकरा जणांवर गुन्हा दाखल केला.