उपराष्ट्रपतींसाठी मतदान करुन परतताना भीषण अपघात, काँग्रेस खासदार थोडक्यात बचावले; हायवेवर पोलीस धावले
दिल्ली येथे उपराष्ट्रपतीपदासाठीच्या निवडणुकीत मतदान करून ते विमानाने मुंबईला पोहोचले. तेथे कार्यालयीन काम पूर्ण केल्यानंतर आपल्या वाहनाने भंडाऱ्याकडे परतत होते.
मुंबई : देशाच्या उपराष्ट्रपतीपदासाठी 8 सप्टेंबर रोजी मतदान घेण्यात आले, त्यामध्ये महाराष्ट्राचे राज्यपाल आणि भाजप एनडएचे उमेदवार सीपी राधाकृष्णन विजयी झाले आहेत. या निवडणुकीसाठी सर्वच राज्यातील खासदार दिल्ली दरबारी हजर झाल होते. महाराष्ट्रातील सर्वच 48 खासदार देखील मतदानासाठी दिल्लीत उपस्थित होते. उपराष्ट्रपतीपदाची ही निवडणूक आटोपून मुंबईमार्गे भंडाऱ्याकडे परतत असताना काँग्रेस खासदार डॉ. प्रशांत पडोळे (Prashant padole) यांच्या वाहनाला आज पहाटे भीषण अपघात (Accident) झाला. यावेळी त्यांच्यासोबत त्यांचे स्वीय सहायक आणि बाकी सहकारी सुद्धा होते. नागपूर बायपासवरील उमरेड फाट्याजवळ सकाळी सहाच्या सुमारास घडलेल्या या अपघातात थोडक्यात जीवितहानी टळली. खासदार पडोळे किरकोळ जखमी झाले असून त्यांच्या फॉर्च्युनर (एमएच 36 एपी 9911) गाडीचे मोठे नुकसान झाले आहे.
दिल्ली येथे उपराष्ट्रपतीपदासाठीच्या निवडणुकीत मतदान करून ते विमानाने मुंबईला पोहोचले. तेथे कार्यालयीन काम पूर्ण केल्यानंतर आपल्या वाहनाने भंडाऱ्याकडे परतत होते. तेव्हा नागपूर बायपासवरील उमरेड फाट्याजवळ अचानक समोरून आलेल्या वाहनामुळे चालकाचे कारवरील संतुलन बिघडले आणि जोरदार धडक बसली. हायवेवरील हा अपघात भीषण असला तरी डॉ. प्रशांत पडोळे यांच्यासह वाहनातून प्रवास करीत असलेले त्यांचे सहकारी सुखरूप आहेत. घटनेच्यावेळी खासदार स्वतः वाहनात उपस्थित होते. या घटनेची माहिती कळताच त्यांच्या समर्थकांनी काळजी व्यक्त करत अपघाताची व खासदारांच्या प्रकृतीची माहिती घेण्यास सुरुवात केली होती. सुदैवाने सर्वजण सुखरुप असल्याचे समजताच त्यांच्या समर्थकांनी व मतदारसंघातील नागरिकांनी सुटकेचा निश्वास टाकला.
भंडारा-गोंदिया लोकसभा क्षेत्रातील बराचसा भाग नक्षलप्रभावित आहे. अशा परिस्थितीत खासदारांना अद्याप शासकीय सुरक्षा व्यवस्था न देणे ही मोठी शोकांतिका असल्याची भावना व्यक्त होत आहे. भाजप सरकारकडे वारंवार मागणी करूनही सुरक्षा न मिळाल्याने या अपघातानंतर पुन्हा प्रश्नचिन्ह उभे राहिले आहे. सरकारला आता तरी जाग येईल का? असा सवाल कॉंग्रेस कार्यकत्यांनी केला आहे. या अपघातानंतर प्रशासनाने बोध घेऊन भंडारा-गोंदिया लोकसभा क्षेत्रातील दौऱ्यात पोलीस सुरक्षा बळकट करण्याचे आवाहन जनतेतून होत आहे. दरम्यान, अपघातानंतर स्थानिक पोलीस प्रशासनाने घटनास्थळी धाव घेतली. वाहन रस्त्याच्या कडेला हलवण्यात आले असून पुढील चौकशी सुरू आहे. खासदार डॉ. पडोळे यांच्यावरील जखमा सौम्य असल्याने त्यांना तातडीने उपचार देण्यात आले.
हेही वाचा
महत्त्वाच्या बातम्या
