Sambhaji Raje Chhatrapati : संभाजीराजे आज नेमकी काय भूमिका घेणार? राजकीय वर्तुळाचं लक्ष
संभाजीराजे पुढची आपली भूमिका आज (12 मे) जाहीर करणार आहेत. त्यामुळे ते नेमकी कोणती भूमिका घेणार याकडे सर्वांचे लक्ष लागले आहे.
Sambhaji Raje Chhatrapati News : संभाजीराजे छत्रपती यांच्याबाबत सध्या राजकीय वर्तुळात जोरदार चर्चा सुरु आहे. त्यांचा राज्यसभेचा कार्यकाळ नुकताच संपला आहे. त्यानंतर संभाजीराजे पुढची आपली भूमिका आज (12 मे) जाहीर करणार आहेत. त्यामुळे ते नेमकी कोणती भूमिका घेणार याकडे सर्वांचे लक्ष लागले आहे. संभाजीराजे आज पुण्यात दुपारी 12 वाजता पत्रकार परिषद घेणार आहेत. त्यामध्ये ते आपली भूमिका जाहीर करणार आहेत.
दरम्यान, संभाजीराजे छत्रपती यांना आपल्या पक्षात घेण्यासाठी अनेकांची धडपड सुरु आहे. कोल्हापूरचे पालकमंत्री सतेज पाटील यांनी संभाजीराजे छत्रपती यांनी काँग्रेसमध्ये यावं त्यांचे स्वागत करु, असे जाहीरपने सांगितले आहे. तर ग्रामविकासमंत्री हसन मुश्रीफ यांनी देखील राष्ट्रवादी काँग्रेसमध्ये संभाजीराजे यांचे स्वागत करु असे म्हटले आहे. मात्र, आता संभाजीराजे छत्रपती काय भूमिका घेणार हे आजची पत्रकार परिषद झाल्यानंतरच समजणार आहे.
3 मे रोजी खासदार पदाचा कार्यकाळ संपल्यानंतर लवकरच माझी पुढील दिशा जाहीर करणार असल्याचे संभाजीराजे छत्रपती यांनी सांगितले होते. त्यानंतर त्यांच्या भूमिकेकडे सर्वांचे लक्ष लागले आहे. त्यामुळे आज संभाजीराजे कोणत्या राजकीय पक्षात प्रवेश करणार की, स्वतःचे अस्तित्व राज्यात निर्माण करणार हे पाहणे महत्वाचे ठरणार आहे. राजकारणात उतरायचंय ते आता निश्चित आहे. पुढे काय करायचं हे माझ्या डोक्यात ठरलेलं आहे, फक्त ते जाहीर नंतर करणार, असल्याचे संभाजीराजे यांनी सांगितले होते. दिल्लीचे राजकारण करणार की महाराष्ट्राचे राजकारण या प्रश्नावर संभाजीराजे म्हणाले होते की, दोन्ही मला आवडतं. राजकारणात आता उतरायचंय हे आता निश्चित आहे. मग दिल्ली असो किंवा महाराष्ट्र असो, दोन्हीत मी रमतो असे संभाजीराजे म्हणाले होते. दोन्हीकडे माझे संपर्क वाढलेले आहेत. महाराष्ट्र माझ्याकडे बघतो की शिवाजी महाराज, शाहू फुले, आंबेडकरांचे विचार घेऊन दिल्लीत जायला पाहिजे. तर दिल्लीतल्या लोकांची इच्छा आहे शिवाजी महाराज, शाहूंचा वंशज इथे आला आहे, इथे त्याची ताकद वाढायला हवी असे ते म्हणाले होते.
एकीकडे संभाजीराजे महाविकास आघाडीसोबत जाण्याची शक्यता वर्तवण्यात येत आहे, तर दुसरीकडे त्यांनी नुकतीच त्यांनी भाजप नेते आणि विधानसभेचे विरोधी पक्षनेते देवेंद्र फडणवीस यांचीही भेट घेतली आहे. राष्ट्रपती नियुक्त खासदार म्हणून संधी मिळण्यात फडणवीस यांचंही योगदान असल्याने आपण त्यांचे आभार मानण्यासाठी ही भेट घेतली असल्याचं संभाजीराजेंनी स्पष्ट केलं होतं. त्यामुळे त्यांच्या भूमिकेबाबत विविध तर्क-वितर्क लढवले जात आहेत.
महत्त्वाच्या बातम्या:
महत्त्वाच्या बातम्या
