सेना-भाजपचं पुन्हा 'तुझं माझं जमेना अन् तुझ्याशिवाय करमेना'

आगामी विधानपरिषद निवडणुकीसाठी सेना-भाजपच्या युतीवर शिक्कामोर्तब झालं आहे, तर पालघर आणि गोंदिया-भंडारा लोकसभा पोटनिवडणुकीबाबत अद्यापही खलबतं सुरु आहेत.

मुंबई : शिवसेना-भाजपचं पुन्हा 'तुझं माझं जमेना अन् तुझ्याशिवाय करमेना' असं सुरु झालं आहे. आगामी विधानपरिषद निवडणुकीसाठी सेना- भाजपच्या युतीवर शिक्कामोर्तब झालं आहे, तर पालघर आणि गोंदिया-भंडारा लोकसभा पोटनिवडणुकीबाबत अद्यापही खलबतं सुरु आहेत. स्थानिक स्वराज्य संस्थेच्या सहा जागांच्या विधानपरिषद निवडणुकीसाठी शिवसेना भाजपचा 50-50 फॉर्म्युला निश्चित झाला आहे. तीन जागांवर शिवसेनेचे उमेदवार जाहीर करण्यात आले आहेत, तर तीन जागांवर भाजप उमेदवार देणार आहे. नाशिक, रायगड-रत्नागिरी-सिंधुदुर्ग आणि परभणी-हिंगोलीतून शिवसेनेचे उमेदवार आहेत, तर उस्मानाबाद-लातूर-बीड, अमरावती आणि वर्धा-चंद्रपूर-गडचिरोलीतून भाजप लढणार आहे.

कोकण विधानपरिषदेत शिवसेना विरुद्ध राणे विरुद्ध तटकरे

उस्मानाबाद-लातूर-बीड मधून सुरेश धस, वर्धा-चंद्रपूर-गडचिरोलीमधून प्रदेश संघटन सचिव रामदास आंबटकर यांच्या नावाची जोरदार चर्चा आहे. अमरावतीतून प्रवीण पोटे पाटील यांचा अर्ज दाखल झाला आहे. उमेदवारी अर्ज भरण्याची शेवटची तारीख उद्या म्हणजे 3 मे असून 21 मे रोजी मतदान प्रक्रिया पार पडणार आहे. दुसरीकडे, पालघर आणि गोंदिया-भंडारा लोकसभा पोटनिवडणुकीवर अद्याप निर्णय झालेला नाही. भाजपला पाठिंबा द्यायचा की तटस्थ राहायचं याबाबत शिवसेनेत खल सुरु आहे.