एक्स्प्लोर

संघर्षकन्यांना रक्षाबंधन भेट, धनंजय मुंडे घर बांधून देणार

By : एबीपी माझा वेब टीम | Updated at : 18 Aug 2016 10:06 AM (IST)

उस्मानाबाद: उस्मानाबादच्या संघर्षकन्यांना रक्षांबधनाच्या दिवशी मोठी भेट मिळाली आहे. राष्ट्रवादी काँग्रेसचे नेते आणि विधान परिषदेतील विरोधी पक्षनेते धनंजय मुंडे यांनी निकिता आणि पूजा या बहिणींना घर बांधून देण्याची घोषणा केली आहे. इतकंच नाही तर त्यांनी गोवर्धनवाडीतील जागी 22 तारखेला येवून घराचं काम सुरू करणार असल्याचं धनंजय मुंडेंनी सांगितलं. एबीपी माझाने या संघर्षकन्यांची बातमी दाखवल्यानंतर, समाजातील अनेक संवेदनशील हात मदतीला आले. निकिता आणि पूजाच्या शिक्षणाची जबाबदारी अभिनेत्री अलका कुबल यांनी उचलली आहे. निकिता - पूजाची संघर्षगाथा निकिता 4 वर्षांची असताना वडिलांचं अपघाती निधन झालं. कणखर आईनं निकिता आणि पूजा या दोन्ही लेकींसोबत आई-वडिलांचं घर गाठलं. मोलमजुरी करुन घर चालत होतं. पण तितक्यात नियतीनं दुसरा धक्का दिला. निकिता आठवीत असताना त्यांची आईही गेली.

परिस्थितीशी दोन हात करणाऱ्या उस्मानाबादच्या संघर्षकन्या

बहिणीसह घराची जबाबदारी निकीतावर आली. पण अवघ्या 13 व्या वर्षी निकितानं मोठा निर्णय घेतला. आधीच परिस्थितीशी झुंजणाऱ्या आजी-आजोबांवर ओझं न होण्याचा. या निर्णयासरशी निकितानं आपलं मूळ घर गाठलं. हा मोठा निर्णय निभावताना निकिताला छोट्या बहिणीच्या शिक्षणाची आबाळ करायची नव्हती. त्यामुळे घरातलं प्रत्येक काम निकितानं आपल्या अंगावर घेतलं आहे. बहिणीला शाळेत सोडून परतलेली निकिता पुन्हा कामं आवरुन आपल्या शाळेत जाते. दिवसभर शाळा... तीही आठवड्यातले तीन दिवस... उरलेले चार दिवस ती शेतात राबते. मजुरी करण्यापासून निकितानं बहिणीला दूर ठेवलं. वह्या पुस्तकं हातात धरायच्या वयात पोरीनं खुरपं जवळ केलं. मजुरीमुळे शाळेत खाडे पडू लागले. तिला शाळेतून काढणार असल्याचं शिक्षकांनी ठरवलं, पण पुढे परिस्थिती समजली आणि त्यांनी निर्णयापासून माघार घेतली. निकिता मितभाषी आहे, पण पोरीला शिकायची उर्मी आहे. आयुष्यानं दुर्दैवाचं इतकं दान पारड्यात टाकलं. सुदैवाने तिला मैत्रिणी चांगल्या मिळाल्या. मैत्रिणी तिला गृहपाठाच्या वह्या देऊन मदत करतात. नियतीनं अजाणत्या वयापासूनच या पोरांची परीक्षा पहायचं ठरवलं. नियती आपल्या पायात काटे पेरत आहे, याचं भानही या पोरांना नाही. ते फक्त वाट तुडवत आहेत. नव्या प्रकाशाच्या दिशेनं.