कोकणात आज आणि उद्या पावसाचा यलो अलर्ट, मुंबई, ठाण्यात उन्हाच्या झळा कायम

Maharashtra Weather Forecast : मुंबई, ठाणे, पालघर आणि रायगडमध्ये पुढील 48 तासांत उष्णतेची लाट येण्याचा अंदाज आहे. तर काही भागात पावसाची शक्यता आहे.

Maharashtra Weather Update Today

मुंबई : राज्यासह देशात सध्या वातावरणात मोठा बदल पाहायला मिळत आहे. एकीकडे केरळमध्ये मान्सून दाखल झाला असून मान्सून आता कर्नाटककडे कार्गक्रमण करताना दिसत आहे. तर दुसरीकडे महाराष्ट्रात कुठे ऊन तर कुठे पावसाचा खेळ सुरु आहे. कोकणासह मराठवाड्यात बऱ्याचशा भागात मान्सूनपूर्व पावसाने हजेरी लावली आहे. मुंबई, ठाणे, पालघर आणि रायगडमध्ये पुढील 48 तासांत उष्णतेची लाट येण्याचा अंदाज आहे. तर काही भागात पावसाची शक्यता आहे.

कोकणात आज आणि उद्या पावसाचा यलो अलर्ट

1 जूनपासून संपूर्ण राज्यात तुरळक ठिकाणी पावसाची शक्यता आहे. पुढील 24 तासात मुंबई, ठाणे, पालघर, रायगड भागात तापमान उष्ण आणि दमट राहण्याची शक्यता आहे. तर काही ठिकाणी पावसाची हजेरी पाहायला मिळेल. कोकणात आज आणि उद्या पावसाचा यलो अलर्ट देण्यात आला आहे. रत्नागिरी आणि सिंधुदुर्ग या भागात आज आणि उद्या मेघगर्जना आणि सोसाट्याच्या वाऱ्यासह पाऊस पडण्याची अंदाज हवामान विभागाने वर्तवला आहे. यावेळी 40 ते 50 किमी ताशी वेगाने वाऱ्यासह पाऊस पडण्याची शक्यता आहे. त्यामुळे या भागात पावसाचा यलो अलर्ट देण्यात आला आहे.

कोंकणातील जिल्ह्यांमध्ये तुरळक क्षेत्रात उष्ण आणि दमट परिस्थिती राहण्याची शक्यता आहे.

विदर्भातील जिल्ह्यांमध्ये तुरळक क्षेत्रात उष्णतेची लाट येण्याची शक्यता आहे.

तपशीलवार जिल्हानिहाय हवामान अंदाज व चेतावणीसाठी कृपयाhttps://t.co/jw7yrf8Es5 भेट घ्या. pic.twitter.com/9o1ETNoiBC

— Regional Meteorological Center,Mumbai (@RMC_Mumbai) May 31, 2024

कुठे ऊन, कुठे पाऊस

मुंबईसह ठाणे जिल्ह्यात येत्या दोन दिवसात काही तुरळक ठिकाणी हलक्या पावसाच्या सरी कोसळण्याचा अंदाज आहे. रायगड, रत्नागिरी, सिंधुदुर्ग, या भागातही पावसाचा अंदाज आहे. धुळे, नंदुरबार, जळगाव, नाशिक, अहमदनगर, पुणे या या भागात कोरडे वातावरण राहण्याचा अंदाज आहे. विदर्भात उष्णतेच्या लाटेला यलो अलर्ट देण्यात आला आहे. कोल्हापूर, सातारा, सांगली, सोलापूरमध्येही पावसाची शक्यता आयएमडीने वर्तवली आहे.

मुसळधार ते अति मुसळधार पावसाचा इशारा

सध्या उत्तर भारतात उष्णतेची तीव्र लाट पाहायला मिळत आहे. मात्र, नागरिकांना किंचित दिलासा मिळण्याची शक्यता आहे. भारतीय हवामान खात्याने वर्तवलेल्या अंदाजानुसार, दिल्लीसह गाझियाबाद, नोएडा आणि फरीदाबादमध्ये काही तास पाऊस पडण्याची शक्यता आहे. अरुणाचल, आसाम, मेघालय, सिक्कीम या ईशान्येकडील राज्यांमध्ये मुसळधार ते अति मुसळधार पाऊस पडू शकतो. आयएमडीने या भागात मुसळधार ते अति मुसळधार पावसाचा इशारा दिला आहे. याशिवाय अंदमान निकोबार आणि केरळमध्ये मुसळधार पावसाचा इशारा देण्यात आला आहे.

महत्त्वाच्या इतर बातम्या :