Maharashtra News Updates 30 November 2022 : Nagpur Crime: नागपूर पोलिसांची सेंट्रल जेलमध्ये मोठी कारवाई

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

Background

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

प्रतापगडावर शिवप्रताप दिनानिमित्त मुख्यमंत्री एकनाथ शिंदे आणि उपमुख्यमंत्री देवेंद्र फडणवीस उपस्थित राहणार आहे. शिवप्रताप दिनानिमित्त विविध कार्यक्रमाचं आयोजन करण्यात आलं आहे. यासाठी सकाळी 10 वाजता मुख्यमंत्री शिंदे हे प्रतापगड येथे पोहोचणार आहे.  मुख्यमंत्र्यांच्या हस्ते प्रतापगडावरील मुख्य बुरुजावर ध्वजारोहण करण्यात येणार आहे.  

राज ठाकरे यांचा कोकण दौरा

मनसे अध्यक्ष आज कोकण दौऱ्यावर असणार आहे. सकाळी 10 वाजता राज ठाकरे कोल्हापूरच्या अंबाबाईचं दर्शन घेतील.  संध्याकाळी 5 वाजता ते सावंतवाडी येथे पोहोचतील आणि कुडाळ येथे मुक्काम करतील.

नवाब मलिकांच्या जामीनावर आज मुंबई सत्र न्यायालय देणार निर्णय

प्रकृती अस्वस्थ्यामुळे न्यायलयीन कोठडीत असलेल्या नवाब मलिकांवर गेल्या काही महिन्यांपासून कुर्ल्यातील रूग्णालयात उपचार सुरू आहेत. ईडीनं त्यांना गोवावाला कंपाऊंडमधील जमीन खरेदीच्या व्यवहारात केलेल्या मनी लॉड्रिंग प्रकरणी अटक केली होती. दाऊद इब्राहिमच्या टोळीसोबत केलेल्या व्यवहारातून दहशतवादाला अर्थसहाय्य केल्याचाही आरोप मलिकांवर आहे. त्यांच्या जामीनावर आज मुंबई सत्र न्यायालयात सकाळी 11 वाजता सुनावणी सुरु होईल. 

महाविकास आघाडीची बैठक

हिवाळी अधिवेशनाच्या पार्श्वभूमीवर काँग्रेस, राष्ट्रवादी, ठाकरे गटाची बैठक होणार आहे. ही बैठक अजित पवारांच्या दालनात सकाळी 11 वाजता होणार आहे. 

अनिल परब यांचे निकटवर्तीय सदानंद कदम हे आज ईडी कार्यालयात जबाब देण्यासाठी उपस्थित राहतील

मुंबई- माजी मंत्री अनिल परब यांचे निकटवर्तीय सदानंद कदम आणि दापोलीच्या सरपंचांना ईडीच्या अधिकाऱ्याने समन्स बजावले होते. त्यांना आज ईडी कार्यालयात जबाब देण्यासाठी उपस्थित रहायचं आहे. दापोली रिसॉर्ट, मनी लाँड्रिंग आणि दापोली येथे दाखल झालेल्या फसवणुकीच्या गुन्ह्यासंदर्भातली चौकशी करण्यात येणार असल्याची सूत्रांची माहिती आहे. 

राज्यात गोवरचा वाढत प्रभाव, उपाययोजनांसाठी आज होणार बैठक   

मुंबई- राज्यात गोवरची साथ मोठ्या झपाट्याने वाढतीये. या बाबत चर्चा करण्यासाठी बैठक होणार आहे. नेमकी साथ आटोक्यात आणण्यासाठी राज्य सरकार काय प्रयत्न करतंय, कशा प्रकारची स्ट्रॅटेजी आखलेली आहे. यावर आरोग्य मंत्री तानाजी सावंत यांची पत्रकार परिषद दुपारी 12 वाजता होणार आहे.

महाराष्ट्र राज्य कुस्तीगीर परिषदेचे अध्यक्ष संजयकुमार सिंह यांची पत्रकार परिषद

पुणे- अस्थायी समिती महाराष्ट्र राज्य कुस्तीगीर परिषदेचे अध्यक्ष संजयकुमार सिंग यांची पत्रकार परिषद होणार आहे. संजयकुमार सिंग हे भारतीय कुस्ती महासंघाकडून नियुक्त समितीचे अध्यक्ष आहेत. बाळासाहेब लांडगे यांच्या नेतृत्वाखालील कुस्तीगीर परिषद बरखास्त करण्यात आल्यानंतर ही अस्थाई समिती स्थापन करण्यात आलीय. या समितीकडून यावेळच्या महाराष्ट्र केसरी कुस्ती स्पर्धा 11 ते 15 जानेवारी दरम्यान होणार असल्याचं नक्की करण्यात आलंय. सह्याद्री कुस्ती संकुल, वारजे, दुपारी 12 वाजता

आज राष्ट्रीय क्रीडा पुरस्कारांचं वितरण 

आज दिल्लीला राष्ट्रपतींच्या हस्ते राष्ट्रीय क्रीडा पुरस्कारांचं वितरण केलं जाणार आहे. नेमबाज प्रशिक्षक सुमा शिरुर आणि रोहित शर्माचे प्रशिक्षक दिनेश लाड यांना यावेळी द्रोणाचार्य पुरस्कारानं सन्मानित करण्यात येणार आहे, राष्ट्रपती भवन, दुपारी 4 वाजता 

मुंबई महानगरपालिका प्रभाग 227 की 236 यावर आज मुंबई उच्च न्यायालयात होणार सुनावणी

मुंबई- मुंबई महानगरपालिका प्रभाग 227 की 236 यावर आज मुंबई उच्च न्यायालयात होणार सुनावणी. शिवसेना उद्धव बाळासाहेब ठाकरे गटाचे नगरसेवक राजू पेडणेकर यांनी प्रभाग रचनेत 236 प्रभाग असावे याकरिता केली आहे याचिका. शिंदे सरकारने 236 वरून पुन्हा 227 ची प्रभाग रचना केली होती.

शेतकरी दिंडीच्या तयारीसाठी शरद पवार यांच्या अध्यक्षतेखाली बैठक होणार 

मुंबई- राष्ट्रवादीकडून काढण्यात येणाऱ्या शेतकरी दिंडीच्या तयारीसाठी राष्ट्रवादीचे अध्यक्ष शरद पवार यांच्या अध्यक्षतेखाली बैठक होणार आहे. शेतकरी दिंडीमध्ये राष्ट्रवादीचे सर्व वरिष्ठ नेते सहभागी होणार. शेवटच्या दिवशी शरद पवार यात्रेला संबोधित करणार, यशवंतराव चव्हाण सेंटर, दुपारी 4 वाजता. 

23:22 PM (IST)  •  30 Nov 2022

साकीनाका जंक्शनचे रुंदीकरण, मोठी वाहतूक कोंडी होणार कमी

अंधेरी घाटकोपर आणि अंधेरी कुर्ला मार्गावर प्रवास करणाऱ्या प्रवाश्यांना दिलासा देणारी बातमी आहे.गेले अनेक वर्षे या मार्गावर साकीनाकावरून अंधेरीकडे येणाऱ्या मार्गावर मोठी वाहतूक कोंडी निर्माण होत असे. त्यातून आता काही अंशी सुटका होणार आहे.साकीनाका जंक्शनवर वाहतुकीला अडथळा ठरणारे काही हॉटेल आणि दुकाने मुंबई मनपाने निष्कासित केली आहेत. स्थानिक आमदार दिलीप लांडे यांनी वारंवार या रस्त्याच्या रुंदीकरणाची मागणी लावून धरली आहे.यातूनच आज पालिकेने कुर्ला अंधेरी मार्गावर साकीनाका जंक्शन वरही कारवाई केली आहे.यामुळे कुर्ल्याकडून अंधेरी ला येताना आता सिग्नल लागण्याची गरज लागणार नाही आणि थेट वाहने अंधेरीच्या दिशेने जातील आणि यामुळे या जंक्शनवर वाहतूक कोंडी मोठ्या प्रमाणत कमी होणार आहे.नागरिकांनी ही या कारवाईचे स्वागत केले आहे.

23:18 PM (IST)  •  30 Nov 2022

Nagpur Crime: नागपूर पोलिसांची सेंट्रल जेलमध्ये मोठी कारवाई

नागपूर पोलिसांची सेंट्रल जेलमध्ये मोठी कारवाई... गोपनीय माहितीच्या आधारावर करण्यात आलेल्या या कारवाईत नागपूर पोलिसांना जेलमधील काही गुन्हेगार जेलच्या आतूनच आपले गुन्हेगारी कार्य चालवत असल्याचे उघड झाले आहे... जामिनावर सुटलेल्या काही गुन्हेगारांच्या मार्फत जेल मध्ये कैदेत असलेल्या सराईत गुन्हेगारांसाठी अमली पदार्थ जेलच्या आत पाठवले जात असल्याचे उघड झाले आहे... धक्कादायक बाब म्हणजे जेलचे बाहेरून जेलमध्ये अमली पदार्थ नेण्यासाठी जेल प्रशासनातील काही कर्मचारी मदत करत असल्याचेही या कारवाईत उघड झाले आहे...

अमली पदार्थ शिवाय जेलमध्ये कैदेत असलेल्या गुन्हेगारांसाठी बिर्याणी आणि इतर चमचमीत खाद्य पदार्थ तसेच थंडीच्या दिवसात गरम कपडे पाठवण्यासाठी ही जेलमधील काही भ्रष्ट कर्मचारी मदत करत असल्याचे उघड झाले आहे...यासाठी मोठे आर्थिक व्यवहार झाल्याचे पोलिसांना वाटत असून त्या दृष्टीने तपास सुरू करण्यात आले आहे...नागपूर पोलिसांनी या प्रकरणी आज सात जणांविरोधात गुन्हा नोंदवला असून त्यापैकी पाच जणांना आज रात्री उशिरा ताब्यात घेण्यात आले... त्यामुळे नागपूरातील गुन्हेगारीचा नागपूर सेंट्रल जेल एक प्रमुख केंद्र बनल्याचे या कारवाईनंतर समोर आले आहे...

21:01 PM (IST)  •  30 Nov 2022

चंद्रपुरात एका वैद्यकीय सेवेतील उच्चपदस्थ अधिकाऱ्याला हनी ट्रॅपमध्ये अडकवलं

चंद्रपुरात एका वैद्यकीय सेवेतील उच्चपदस्थ अधिकाऱ्याला हनी ट्रॅपमध्ये अडकविण्यात आल्याचं खळबळजनक प्रकरण पुढे आलं आहे. या अधिकाऱ्याला एका फ्लॅटवर बोलावून एका महिलेसोबतचे व्हिडिओ चोरून चित्रित करण्यात आले. यातील काही भाग दाखवून डॉक्टर कडून 3 लाख वसूल कऱण्यात आले मात्र अजून पैसे उकळण्याच्या उद्देशाने अश्लील चित्रफितीतल्या महिलेने आपल्या नवऱ्यासोबत मिळून खंडणीचा कट रचला. या कटात सादिक खान व इतर दोन महिलांना सामील कऱण्यात आले. सादिक खान याने पीडित अधिकाऱ्याची अश्लील चित्रफीत सार्वजनिक करण्याची धमकी दाखवून ५० लाखांच्या खंडणीची मागणी केली. मात्र पीडित डॉक्टरने पोलीस अधीक्षकांना तक्रार करत आपबीती सांगितल्यावर स्थानिक गुन्हे शाखेने चार पथके तयार करून आरोपींवर सापळा रचला. पाच लाख रुपयांचा चेक व तीस हजार रुपये रोख रक्कम घेताना पोलिसांनी आरोपी सादिक खान व इतर आरोपींना अटक केली. या प्रकरणात दोन पुरुष व तीन महिला आरोपींना अटक करत पोलिसांनी वैद्यकीय अधिकाऱ्याची हनीट्रॅप मधून सुटका केली आहे.

 

20:55 PM (IST)  •  30 Nov 2022

मराठी भाषा विभागाचे बोधचिन्ह आणि घोषवाक्य निश्चित करण्यासंदर्भातला शासन निर्णय जाहीर

मराठी भाषा विभागाचे बोधचिन्ह आणि घोषवाक्य निश्चित करण्यासंदर्भातला शासन निर्णय जाहीर झाला आहे. 

 

 

मराठी भाषा विभागाकडून मराठी भाषेचा प्रचार ,प्रसार आणि संवर्धनाच्या दृष्टीने मराठी भाषा संवर्धन पंधरवडा, वाचन प्रेरणा दिन, मराठी भाषा गौरव दिन अशा विविध उपक्रमांचे आयोजन केले जाते

 

 हे विविध उपक्रम लोकांपर्यंत अधिक प्रभावीपणे पोहोचण्यासाठी आकर्षक भित्तिपत्रके ,पताका यांचा वापर केला जातो ...तसेच या उपक्रमाची माहिती विविध जाहिरात द्वारे लोकांपर्यंत पोहोचली जाते 

 

आता भितीपत्रके जाहिराती प्रभावीपणे लोकांपर्यंत पोहोचण्यासाठी मराठी विभागाचे बोधचिन्ह आणि घोषवाक्य बनवण्याची बाब विभागाकडे विचाराधीन होती 

 

त्यामुळे आता या विभागाने या नव्या बोधचिन्ह आणि बोधवाक्य याचा वापर करण्यास शासन निर्णयाद्वारे मान्यता दिली आहे

20:09 PM (IST)  •  30 Nov 2022

शिवशक्ती, भीमशक्ती आणि लहू शक्तीचे ठाकरेंकडून संकेत

शिवशक्ती भीम शक्ती आणि लहू शक्ती जर एकत्र आली तर देशात एक मोठी ताकद आपण उभी करू शकतो. आणि आता मी अनुभवतोय आहे कि गद्दार मूठभर सुद्धा नाहीत आणि निष्ठावान डोंगराएवढे आहेत, असे उद्धव ठाकरे म्हणाले.