Maharashtra News Updates 26 December 2022 : देश-विदेशातील महत्त्वाच्या बातम्यांचा आढावा फक्त एका क्लिकवर...

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

Background

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील कोरोना संबंधित, राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

आदित्य ठाकरेंच्या समर्थनाअर्थ आज ठाकरे गटाचं विधीमंडळात शक्तीप्रदर्शन होणार आहे. त्याशिवाय जयंत पाटलांच्या निलंबनाविरोधात आजही विरोधक आक्रमक भूमिका घेणार आहेत. त्यामुळे अधिवेशनाचा दुसरा आठवडा वादळी होण्याची शक्यता आहे. कर्नाटक सरकारविरोधात महाराष्ट्र एकीकरण समितीचे आज धरणे आंदोलन होणार आहे. यासह आज दिवसभरात घडणाऱ्या महत्त्वाच्या बातम्या खालीलप्रमाणे. 

आदित्य ठाकरेंच्या समर्थनाअर्थ आज ठाकरे गटाचं विधीमंडळात शक्तीप्रदर्शन

आदित्य ठाकरेंच्या समर्थनाअर्थ आज ठाकरे गटाचं विधीमंडळात शक्तीप्रदर्शन होणार आहे. त्यामुळे अधिवेशनाचा दुसरा आठवडा वादळी होण्याची शक्यता आहे. ठाकरे गटाचे प्रमुख उद्धव ठाकरे, खासदार संजय राऊत, पक्षाचे सचिव मिलिंद नार्वेकर आणि युवा सेना सचिव वरुण सरदेसाई नागपूरात दाखल झाले आहेत. गेल्या आठवड्यात दिशा सालियन मृत्यू प्रकरणात शिंदे-फडणवीस सरकारने आदित्य ठाकरेंना घेरण्याचा प्रयत्न केला होता. विधीमंडळाच्या हिवाळी अधिवेशनात ठाकरे गटाची ताकद वाढवण्यासाठी उद्धव ठाकरेंसह सगळे प्रमुख नेते नागपुरात दाखल झाले आहेत. संजय राऊत म्हणाले की, नागपूर येथे उध्दव ठाकरे आणि मी बरेच बॅाम्ब फोडणार आहोत. आम्ही पाठीत खंजीर खुपसणारे नाही, आमची सेना लेचापेचा, पळपुट्यांची नाही.  धमक्या द्या , तडीपारी करा तरीही आमची सेना बुलंद आहे. फेब्रुवारीपर्यंत काहीही करून घ्या. नंतर तुम्ही नसणार. अली बाबा चाळीस चोर फेब्रुवारीनंतर नसणार, असंही ते म्हणाले. आम्ही बलिदान दिले. रक्त सांडले.तुम्ही काय केले टेंडर काढली, भूखंड खाल्ले, असा आरोप त्यांनी केला. 

कर्नाटक सरकारविरोधात महाराष्ट्र एकीकरण समितीचे आज धरणे आंदोलन

मराठीद्वेषी कर्नाटक सरकार आणि कानडी पोलीस प्रशासनाच्या निषेधार्थ सोमवारी मध्यवर्ती महाराष्ट्र एकीकरण समितीकडून धरणे आंदोलन करण्यात येणार आहे. जिल्हाधिकारी कार्यालयासमोर एकदिवसीय धरणे आंदोलन करण्यात येणार आहे. बेळगावमधील मराठी भाषिक आणि महाराष्ट्र एकीकरण समितीचे कार्यकर्ते बेळगावहून दुचाकीवरून कोल्हापूरला येणार आणि कोल्हापूरात ठिय्या देणार.  कर्नाटक पोलिस अडवू शकतात हे लक्षात घेऊन एकत्र बेळगावहून निघणार नाहित तर टप्प्याटप्प्याने कोल्हापूरात येणार.   

अमोल मिटकरी स्वच्छतागृहाबाबत नवे पुरावे देणार

राष्ट्रवादी काँग्रेसचे आमदार अमोल मिटकरी यांनी गेल्या आठवड्यात नागपुरातील आमदार निवासातील कॅन्टीनमधील भांडी स्वच्छतागृहात धुवून त्याच भांड्यांमध्ये लोकांना चहापान दिले जात असल्या संदर्भात व्हिडिओ ट्विट केले होते. सार्वजनिक बांधकाम विभागाने मुख्यमंत्र्यांच्या आदेशानंतर त्याची चौकशी केली. ते व्हिडिओ त्या ठिकाणचे नसल्याचे उघड झाले. आता अमोल मिटकरी यांनीही ते व्हिडिओ आमदार निवासातील नाही, तर विधानभवन परिसरातील असल्याचा नवा दावा पुढे केला आहे. आज ते त्यासंदर्भात नवीन पुरावे समोर आणणार आहेत. त्यानंतर आमदार मिटकरी आणि सार्वजनिक बांधकाम विभाग यांच्यातील कलगीतुरा कोणत्या दिशेने जाईल हे स्पष्ट होईल. 

23:39 PM (IST)  •  26 Dec 2022

दोन लाख बक्षीस असलेल्या नक्षलवाद्यास अटक

गडचिरोली: दोन लाखाचे बक्षीस असलेल्या एका जहाल नक्षलवाद्यास अटक करण्यात गडचिरोली पोलीस दलास यश आले आहे. वत्ते ऊर्फ प्रदीप वंजा वड्डे, वय 40 वर्षे, रा. नेलगुंडा, तह. भामरागड, असे अटक केलेल्या नक्षलवाद्याचे नाव आहे. भामरागड उपविभाग अंतर्गत येत असलेल्या पोलीस मदत केंद्र धोडराज हद्दीतील नेलगुंडा गावात जहाल नक्षलवादी लपून बसल्याची माहिती गडचिरोली पोलिसांना मिळाली. या माहितीच्या आधारे गडचिरोली पोलीस दलाच्या विशेष अभियान पथकाने त्याला अटक केली. त्याच्यावर 03 पोलीस खुनासहीत 8 खुन, 3 चकमक, 1 दरोडा व इतर 1 असे एकुण 13 गुन्हे दाखल आहेत.  अशा अनेक गुन्ह्रामध्ये त्याचा सहभाग असून, सदर नक्षलवाद्यास गडचिरोली पोलीस दलाने अटक केलेली असून, पुढील तपास गडचिरोली पोलीस दल करीत आहे.  1997 साली तो नक्षलमध्ये भरती होवुन, सध्या भामरागड दलममध्ये सदस्य या पदावर कार्यरत होता. त्याच्यावर महाराष्ट्र शासनाने 02 लाख रुपयाचे बक्षीस जाहीर केले होते.

22:39 PM (IST)  •  26 Dec 2022

नांदेड कृषी विभागाच्या कला व क्रीडा महोत्सवात कृषी अधिकाऱ्याचा हवेत गोळीबारी

नांदेड येथे 24 डिसेंबर पासून कृषी विभाग नांदेडकडून कला व क्रीडा महोत्सवाचे आयोजन करण्यात आले आहे.24 डिसेंबर रोजी जिल्हाधिकारी डॉ. अभिजित राऊत यांच्या हस्ते या कला महोत्सवाचे उदघाटन करण्यात आले. ज्यात तीन दिवसीय या महोत्सवात खोखो, कबड्डी, क्रिकेट, हॉलीबॉल सारखे मैदानी खेळ घेण्यात आले. दरम्यान आज शेवटच्या दिवशी नांदेड शहरातील कुसुम सभागृहात सांस्कृतिक कार्यक्रमाचे आयोजन करण्यात आले होते.त्या दरम्यान कृषी विभागातील एका अधिकाऱ्यांने गाण्यावर ठेका धरत जवळच्या पिस्तूलातून हवेत गोळीबार केलाय. तर संपूर्ण स्टेजवर सदर कृषी अधिकारी कृषी अधीक्षक रविशंकर चवलदे यांच्या समक्ष हजारो कर्मचाऱ्या समोर खुल्या कार्यक्रमात पिस्तुल हातात घेऊन नाचताना आणि मीरवताना दिसत आहे.दरम्यान सदर अधिकारी हा भोकर कृषी विभागातील सहाय्यक कृषी अधिकारी काकडे असल्याची माहिती मिळतेय.

 

22:34 PM (IST)  •  26 Dec 2022

केडीएमसी उभारणार आता स्वतःचीच जलतपासणी प्रयोगशाळा

दूषित पाण्यामुळे आपल्याला दरवर्षी विविध आजारांना सामोरं जावं लागतं. काविळ, मलेरिया टायफॉइड, गॅस्ट्रोसारखे आजार पसरण्याचा सर्वाधिक धोका असतो. या पार्श्वभमीवर कल्याण डोंबिवली महापालिका प्रशासनाने एक महत्वपूर्ण निर्णय घेतला आहे. दूषित पाण्यामुळे होणाऱ्या आजारांना आळा घालण्यासाठी केडीएमसी प्रशासनाने आता स्वतःचीच सुसज्ज अशी जल तपासणी प्रयोगशाळा उभारण्याची तयारी सुरू केल्याची माहिती पालिका प्रशासनाने दिली .

कल्याण डोंबिवली या दोन्ही शहरांची संख्या सुमारे पंधरा लाखांहून अधिक झाली आहे . एवढ्या मोठ्या लोकसंख्येला पाणी पुरवठा करणे आणि त्यातही नागरिकांना होणाऱ्या पाण्याची गुणवत्ता कायम राखणे हे केडीएमसी प्रशासनासमोरील मोठे आव्हान आहे. नागरिकांना पुरवले जाणारे पाणी हे कितपत शुद्ध आहे, त्यामध्ये काही विषाणूंचा प्रादुर्भाव तर नाही ना आदी गोष्टी तपासण्यासाठी दर एक दिवसाआड पाण्याचे नमुने गोळा करून कोकण भवन येथील शासनमान्य प्रयोगशाळेत पाठवले जातात. मात्र त्याचे अहवाल येण्यासाठी साधारणपणे दोन ते तीन दिवसांचा अवधी लागत असल्याने पाण्याच्या गुणवत्तेची माहिती मिळण्यासाठी केडीएमसी प्रशासनाला वाट पाहावी लागते. विशेषतः पावसाळ्यात साथीचे आजार पसरण्याची शक्यता असल्याने केडीएमसी प्रशासनाला पाणी पूरवठयाबाबत अधिक सतर्क राहावे लागते. मात्र पाण्याच्या गुणवत्तेचे अहवाल प्राप्त होण्यास लागणारा विलंब पाहता केडीएमसी प्रशासनाने आता स्वतःचीच सुसज्ज प्रयोगशाळा उभारण्याची तयारी सुरू केल्याची माहिती शहर अभियंता अर्जुन अहिरे यांनी दिली. तसेच केडीएमसीकडून आतापर्यंत केला जाणारा पाणीपुरवठा हा शुद्धच असतो. मात्र त्याच्या वेळोवेळी केल्या जाणाऱ्या तपासण्या, दूषित पाण्याद्वारे आजार पसरवणाऱ्या विषाणूंची माहिती, पाण्यातील क्लोरीनसह इतर घटकांचे प्रमाण योग्य आहे की नाही याबाबत वेळेत मिळणे आवश्यक आहे. त्यामुळे केडीएमसीकडून ही सुसज्ज प्रयोगशाळा उभारण्यात येणार आहे

21:54 PM (IST)  •  26 Dec 2022

वसईत अंदाजे सहा कोटीचा रक्त चंदन साठा जप्त

वालीव पोलीस ठाण्याच्या हद्दीतील कामण-भिंवडी रोड वरुन एक कंटेनर संशयास्पद माल घेवून जाणार असल्याची माहिती वालीव पोलिसांना मिळाली. वालीव पोलीस ठाण्याच्या अंतर्गत असलेली कामण चौकीतील पोलीस कर्मचा-यांनी पहाटेच्या सुमारास गस्त लावून, एका संशयास्पद कंटेनरला अडवून, चौकशी केली असता. त्या कंटेनरमध्ये अंदाजे ३० ते ३५ घन मिटर चंदनाचा साठा पोलिसांना आढळून आला. कंटेनर मध्ये पुढे कांद्याच्या गोणी तर मागे रक्तचंदनाच्या लाकडाचे ओडंके होते. आंतरराष्ट्रीय बाजारात या रक्तचंदनाची अंदाजे सहा कोटी एवढी किंमत आहे.  मांडवी वन विभागाने रक्त चंदनाची पुष्टी करुन, पंचनामा सुरु केला आहे.  

हे रक्तचंदन आंध्र प्रदेशातून आल्याच अंदाजे पोलिसांनी व्यक्त केला आहे. हे रक्तचंदन मुंबईतून भिवंडी मार्गे नावाशिवा बंदरातून आंतरराष्ट्रीय बाजारात नेणार असल्याची माहिती पोलीस सूत्रांनी दिली आहे. सध्या वालीव पोलीस आणि वनविभागाचे अधिकारी या रक्तचंदना बाबात अधिक तपास करत आहेत. 

21:51 PM (IST)  •  26 Dec 2022

रोहित पवारांच्या बारामती एग्रो कारखान्याला क्लीनचिट देणाऱ्या अधिकाऱ्याचे निलंबन

 रोहित पवारांच्या मालकीचा असणारा बारामती ऍग्रो हा कारखाना गळीत हंगामा आधी सुरू केल्याची तक्रार आमदार राम शिंदे यांनी साखर आयुक्तांकडे केली होती. त्या तक्रारीची दखल घेत चौकशीसाठी साखर आयुक्त शेखर गायकवाड यांनी एक सदस्यीय समिती नेमली होती. या चौकशीसाठी द्वितीय विशेष लेखा परीक्षक वर्ग एक दर्जाच्या अधिकाऱ्यांची निवड करण्यात आली होती. अजय देशमुख अस चौकशी करणाऱ्या अधिकाऱ्यांचे नाव होतं. 2022/23 चा गळीत हंगाम हा 15 ऑक्टोबर रोजी सुरू होणार होता. परंतु रोहित पवारांनी त्यांचा बारामती ऍग्रो हा कारखाना 10 ऑक्टोबर रोजी सुरू केल्याची तक्रार आमदार राम शिंदे यांनी साखर आयुक्तांकडे केली होती. अजय देशमुख यांनी इंदापूर तालुक्यातील शेटफळगढे येथील बारामती ऍग्रो या साखर कारखान्याची पाहणी केली. कारखान्यावर मेंटेनन्सचे काम सुरू होते. उसाने भरलेले ट्रॅक्टर उभे होते. परंतु कारखाना सुरू नसल्याचा आवहाल अजय देशमुख यांनी साखर आयुक्ताना दिला आणि बारामती एग्रो कारखान्याला क्लीन चिट दिली. त्या अहवालाला आव्हान देत आमदार राम शिंदे यांनी सरकार विभागाकडे तक्रार दिली. अजय देशमुख यांची सहकार विभागाने चौकशी सुरू केली. राम शिंदे यांनी तक्रारीत दिलेल्या पुराव्यांची चौकशी अजय देशमुख केली नसल्याचे प्रथमदर्शनी समोर आले. तसेच अजय देशमुख यांनी शासनाची दिशाभूल करणारा आवहाल दिल्याचे समोर आल्याने अजय देशमुख यांना आज निलंबित करण्यात आले आहे. अजय देशमुख यांची खातेअंतर्गत चौकशीला समोर जावं लागणार आहे..