Maharashtra News Updates: मुख्यमंत्र्यांना बदनाम करण्यासाठी ठाकरे गटाचेच कार्यकर्ते रोशनी शिंदेला मारतील, तिला संरक्षण द्यावे : मीनाक्षी शिंदे

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

Background

Maharashtra News LIVE Updates : दिवसभरातील ताज्या घडामोडी, महत्त्वाचे अपडेट्स, देशभरासह राज्यातील राजकीय, सामाजिक, आर्थिक, क्रीडा तसेच इतर अपडेट्स या लाईव्ह ब्लॉगमध्ये...

आज दिवसभरात मोठ्या घडामोडी घडणार आहेत. दख्खनचा राजा जोतिबाची आज यात्रा आहे. जोतिबाच्या चैत्र यात्रेचा आज मुख्यदिवस असून साधारणपणे 10 लाख भाविक दर्शनासाठी येण्याची शक्यता आहे. तर, दुसरीकडे ठाण्यातील राजकीय वातावरण तापणार आहे. मविआकडून ठाणे पोलीस आयुक्त कार्यालयावर टाळे ठोको आंदोलन होणार आहे. जाणून घेऊयात आज दिवसभरातील घडामोडी...

दिल्ली 

- संसदेचं अर्थसंकल्पीय अधिवेशन संपण्यासाठी दोन दिवस राहिलेले असताना आज सुद्धा संसदेत गोंधळाची शक्यता आहे. कामकाजाच्या राहिलेल्या दिवसांसाठी विरोधी पक्षांची बैठक होणार आहे.

- 14 विरोधी पक्षांनी दाखल केलेल्या याचिकेवर आज सुप्रिम कोर्टात सुनावणी होणार आहे. या याचिकेत विरोधी पक्षांनी सीबीआय आणि ईडी सारख्या संस्थाचा विरोधी पक्षांच्या नेत्यांना टार्गेट करण्यासाठी वापरला जात असल्याच म्हंटलं आहे.

- राउज एवेन्यू कोर्टात आज मनीष सिसोदियांच्या जामीन अर्जावर सुनावणी होणार आहे. मनी लॉड्रींग प्रकरणी मनीष सिसोदिया अटकेत आहेत.

कोल्हापूर 

- दख्खनचा राजा जोतिबाची आज यात्रा आहे. जोतिबाच्या चैत्र यात्रेचा आज मुख्यदिवस असून साधारणपणे 10 लाख भाविक दर्शनासाठी येण्याची शक्यता आहे. महाराष्ट्रासह कर्नाटक, आंध्रप्रदेश या राज्यातून सुद्धा मोठ्या प्रमाणात भाविक येत असतात. मानाच्या सासनकाठ्या जोतिबाच्या डोंगरावर दाखल झाल्यात. यात्रेसाठी होणारी गर्दी लक्षात घेत पोलिसांनी पार्किंग व्यवस्था, दर्शन रांगा अशी मोठी तयारी केली आहे. 

ठाणे 

-  शिवसेना ठाकरे गट आणि महाविकास आघाडीचा आज पोलीस आयुक्त कार्यालयावर टाळे ठोको मोर्चा. ठाकरे गटाच्या युवा सेनेची पदाधिकारी रोशनी शिंदे मारहाण प्रकरणी ठाकरे गट आक्रमक झाला आहे. आज आदित्य ठाकरेंच्या नेतृत्वाखाली दुपारी शिवाजी मैदान येथून मोर्चा निघणार आहे. या मोर्चात राष्ट्रवादी काँग्रेसचे नेते जितेंद्र आव्हाड सहभागी होणार आहेत.

मुंबई 

- राजू शेट्टी यांच्या नेतृत्वाखाली आझाद मैदानावर आज मोर्चा काढण्यात येणार आहे. ऊस तोडणी सातशे रुपये करण्यात यावी, ऊस तोडणी मशीन मालकांसाठी लवाद स्थापन करण्यात यावा तसेच प्रलंबित अनुदान देण्यात यावे या प्रमुख मागण्यांसह अन्य मागण्यासाठी महाराष्ट्र राज्य ऊस तोडणी मशीन मालक संघटनेतर्फे आज आझाद मैदानावर मोर्चाचे आयोजन करण्यात येणार आहे.

- ईडी तपास करत असलेल्या प्रकरणात राष्ट्रवादीचे नेते हसन मुश्रीफ यांनी दाखल केलेल्या जामीन अर्जावर आज मुंबई सत्र न्यायालय आपला निकाल जाहीर करणार आहे.

- राष्ट्रवादीचे नेते हसन मुश्रीफ यांचे निकटवर्तीय चंद्रकांत गायकवाड यांना ईडीने समन्स पाठवले आहे. चंद्रकांत गायकवाड यांना बुधवारी ईडी कार्यालयात हजर राहावे लागणार आहे. सोमवारी ईडीने गायकवाड निवासस्थानावर छापा टाकला आणि सर्च ऑपरेशनही केले

-  राज्य मंत्रिमंडळाची बैठक सकाळी 11 वाजता मंत्रालय येथे होणार आहे. अर्थसंकल्पीय अधिवेशन संपल्यानंतर ही पहिलीच मंत्रीमंडळ बैठक आहे. त्यामुळे महत्वाचे निर्णय होऊ शकतात.

अमरावती 

- हनुमान जन्मोत्सव हा अमरावतीत खूप मोठ्या थाटात साजरा केला जात आहे. एकीकडे खासदार नवनीत राणा यांचं सामूहिक हनुमान चालीसा पठण होणार तर दुसरीकडे काँग्रेसने हनुमान जन्मोत्सवाच्या पूर्व संध्येला भव्य मिरवणूक आयोजित केली आहे. हनुमान जन्मोत्सव मिरवणूकीत पाच ढोल पथक, उज्जैन महाकाल येथील प्रसिध्द झांच पथक, बाभूळगाव येथील संदल, पाच डिजे, पाच वारकरी दिंडी, पाच ढोल पथक आणि हरियाणा वरून हनुमानजी यांचे आकर्षण अवतार असे असून राजकमल चौक येथे हनुमंत रायाची आरती करून मोठ्या प्रमाणात हनुमान चालीसाचे पठण केले जाणार आहे.

पुणे 

- आरटीई प्रवेश प्रक्रियेत अंतर्गत देण्यात येणाऱ्या प्रवेशाची ऑनलाईन सोडत आज निघणार आहे. 

 नाशिक 

-  नाशिक शहरात महत्वपूर्ण बैठक. पाणीकपात संदर्भात बैठकीत चर्चा होणार आहे.

 अहमदनगर 

- श्री काळभैरवनाथ सेवा मंडळाच्या वतीने यात्रेनिमित्त आज पारनेर येथे बैलगाडा शर्यतीचे आयोजन करण्यात आलंय. या स्पर्धेसाठी प्रथम बक्षिस 1,11,000 रुपये, द्वितीय बक्षिस 71,000, तृतीय बक्षिस 51,000, चतुर्थ बक्षीस 31,000 रुपये असणार आहे.

- शेवगाव तालुका वंचित बहुजन आघाडीच्यावतीने विविध प्रश्नांसाठी तहसील कार्यालयावर एल्गार मोर्चाचे आयोजन करण्यात आलंय. 

यवतमाळ

- भारत राष्ट्र समिती (बीआरएस) चे नेते शंकर अण्णा धोंडगे पाटील यांची आज पत्रकार परिषद होणार आहे. जिल्ह्यातील तेलंगणा सीमेलगत असलेले पांढरकवडा, घाटंजी, झरीजामनि या भागात बीआरएसचा प्रभाव वाढत आहे.

21:32 PM (IST)  •  05 Apr 2023

सचिन वाझेची जेलमधून सुटका नाहीच, माफीचा साक्षीदार या नात्याने जेलमधून सुटका मागत केलेला अर्ज मुंबई सत्र न्यायालयाने फेटाळला

No Relief For Sachin Waze : राज्याचे माजी गृहमंत्री अनिल देशमुख यांच्याविरोधातील भ्रष्टाचाराच्या प्रकरणात माफीचा साक्षीदार बनलेल्या सचिन वाझेची जेलमधून सुटका करण्याची मागणी मुंबई सत्र न्यायालयाने फेटाळून लावली आहे. मुंबई सत्र न्यायालयातील विशेष सीबीआय कोर्टाचे न्यायाधीश एस.एच. गवलानी यांच्यापुढे वाझेच्या या अर्जावर सुनावणी झाली. सचिन वाझेने या प्रकरणात माफीचा साक्षीदार होण्याकरता तयारी दर्शवली होती. त्याला सीबीआयने ना हरकत दिल्यावर कोर्टानेही मान्यता दिलेली आहे. याच पार्श्वभूमीवर जर आपण कारागृहात राहिलो तर मग माफीचा साक्षीदार होण्याचा उद्देश नष्ट होऊ शकतो, असा युक्तिवाद वाझेकडून या अर्जाद्वारे कोर्टाकडे करण्यात आला होता. या प्रकरणात मुख्य आरोपी असलेल्या अनिल देशमुखांसह त्यांचे निकटवर्तीय संजीव पालांडे आणि कुंदन शिंदे यांना जामीन मंजूर झाला आहे. मात्र आपल्याला अजूनही आरोपीच समजलं जातंय असा दावा वाझेनं या अर्जातून केला होता. मात्र सचिन वाझेला याप्रकरणी एक आरोपी म्हणून अटक केली होती. त्यामुळे आता जोपर्यंत तो दोषमुक्त किंवा निर्दोष सुटत नाही तोपर्यंत त्याला आरोपीच समजलं जाईल अशी भूमिका घेत सीबीआयने या अर्जाला केलेल्या विरोध केला होता. जो ग्राह्य धरत विशेष सीबीआय कोर्टानं वाझेचा हा अर्ज फेटाळून लावला.

21:27 PM (IST)  •  05 Apr 2023

गडचिरोली जिल्ह्यातील कुरखेडा तालुक्यात कंटेनर-टिप्पर समोरासमोर धडकले, दोघांचा जागीच मृत्यू

Gadchiroli Accident : कंटेनर आणि टिप्परची समोरासमोर धडक झाल्याने दोघांचा जागीच मृत्यू झाल्याची घटना गडचिरोलीच्या कुरखेडा तालुक्यातील डोंगरगाव पाटी इथे घडली. बुधवारी दुपारी कोरची-कुरखेडा मार्गावर कंटेनर महाराष्ट्रात येत होता, तर टिप्पर छत्तीसगडकडे जात होते. डोंगरगावजवळ पाटीजवळील घाटात या दोन्ही वाहनांचा समोरासमोर अपघात झाला. ही धडक एवढी जबरदस्त होती की टिप्पर रस्त्याच्या मधोमध उलटला तर कंटेनरच्या समोरील भागाचे मोठे नुकसान झाले. दरम्यान, याचवेळी त्या ठिकाणाहून दोन दुचाकी समोरासमोर आल्याने दुचाकीवरील दोघांचा जागीच मृत्यू झाला तर एक जण गंभीर जखमी झाला आहे. तिघांनाही कुरखेडा ग्रामीण रुग्णालयात हलवण्यात दाखल करण्यात आले होते. अपघातानंतर काही काळ या मार्गावरील वाहतूक विस्कळीत झाली होती.

20:58 PM (IST)  •  05 Apr 2023

Pune News: आमदार महेश लांडगे यांना मागितली 30 लाखाची खंडणी; व्हॉट्सअॅपवर मेसेजद्वारे केली मागणी

Pune News:  पिंपरी चिंचवडमधील भाजपाचे आमदार महेश लांडगे यांना तीस लाखांच्या खंडणीची मागणी करण्यात आलीये. न दिल्यास जीवे मारण्याची धमकी देण्यात आलीय. लांडगे यांच्या कार्यालयातील मोबाईल नंबरच्या व्हाट्सएपवर मेसेज आला. त्या मेसेजमध्ये तीस लाखांची रक्कम पाठवण्यासाठी बँक खाते नंबर तसेच पैसे न दिल्यास जीवे मारण्याची धमकी देण्यात आली. आमदार लांडगे यांनी नागरिकांच्या समस्या सोडवण्यासाठी परिवर्तन हेल्पलाईन सुरू केलीये. त्यासाठी नागरिकांना पुरविण्यात आलेल्या नंबरवर मंगळवारी सायंकाळी हा मेसेज आला.

20:46 PM (IST)  •  05 Apr 2023

Bhandara News: तीन हजारांच्या लाचेसह पोलीस शिपायाला अटक; भंडारा लाच लुचपत प्रतिबंधक विभागाची कारवाई.....

Bhandara News:  जुगार अड्ड्यावर करण्यात आलेल्या कारवाईतून दुचाकी सोडण्यासाठी भंडाऱ्यातील कारधा पोलीस ठाण्यातील पोलीस अंमलदार सचिन गजानन बुधे याने 5 हजारांची लाच मागितली. त्यातील 3 हजारांची लाच स्वीकारताना भंडारा लाचलुचपत प्रतिबंधक विभागाच्या पथकाने अंमलदार शिपाई सचिन बुधे याला कारधा पोलीस ठाण्यातच रंगेहाथ अटक केली. या कारवाईनं पोलीस विभागात खळबळ उडाली आहे. 

20:46 PM (IST)  •  05 Apr 2023

Bhandara News: तीन हजारांच्या लाचेसह पोलीस शिपायाला अटक; भंडारा लाच लुचपत प्रतिबंधक विभागाची कारवाई.....

Bhandara News:  जुगार अड्ड्यावर करण्यात आलेल्या कारवाईतून दुचाकी सोडण्यासाठी भंडाऱ्यातील कारधा पोलीस ठाण्यातील पोलीस अंमलदार सचिन गजानन बुधे याने 5 हजारांची लाच मागितली. त्यातील 3 हजारांची लाच स्वीकारताना भंडारा लाचलुचपत प्रतिबंधक विभागाच्या पथकाने अंमलदार शिपाई सचिन बुधे याला कारधा पोलीस ठाण्यातच रंगेहाथ अटक केली. या कारवाईनं पोलीस विभागात खळबळ उडाली आहे.