Aurangabad: औरंगजेबाचं थडगं नेस्तनाबूत करण्याची घोषणा सभेत करणार का?; मनसेचा सवाल

औरंगाबादच्या नामांतराच्या मुद्यावरून पुन्हा एकदा मनसेकडून शिवसेनेला डिवचण्याचा प्रयत्न करण्यात आला आहे.

mns on shiv sena

Aurangabad News: मुख्यमंत्री उद्धव ठाकरे यांची उद्या औरंगाबादमध्ये जाहीर सभा होणार आहे. या सभेत औरंगाबादच्या नामांतराचा मुद्दा सर्वाधिक आघाडीवर राहणार असल्याचे बोलले जात आहे. मात्र त्यापूर्वी याच मुद्यावरून मनसेकडून शिवसेनेला डिवचण्याचा प्रयत्न करण्यात आला आहे. 'औरंगाबादचे संभाजीनगर कधी होणार मुख्यमंत्री महोदय?' असा सवाल मनसे नेते गजानन काळे यांनी उपस्थित केला आहे. 

मनसे नेते गजानन काळे यांनी ट्वीट करत म्हटले आहे की, "होय.. संभाजीनगर असे म्हणत बॅनरबाजी करायची.. मी संभाजीनगर म्हणतोय ना असं सभेत म्हणायच, एवढं करून झालं का? औरंगाबादचे संभाजीनगर कधी होणार मुख्यमंत्री महोदय?, संभाजीनगरला असलेलं औरंगजेबाचं थडगं नेस्तनाबूत करायची घोषणा सभेत होणार का?, भाषणाची स्क्रिप्ट बारामतीवरून आल्यावर अवघड वाटतंय सगळं' अशी टीका काळे यांनी केली आहे. त्यामुळे शिवसेना-मनसेमध्ये पुन्हा एकदा एकमेकांवर टीका केली जाण्याची शक्यता आहे.  

होय..संभाजीनगर असे म्हणत बॅनरबाजी करायची..मी संभाजीनगर म्हणतोय ना असं सभेत म्हणायच,एवढं करून झालं का?औरंगाबादचे संभाजीनगर कधी होणार मुख्यमंत्री महोदय?

संभाजीनगरला असलेलं औरंगजेबाचं थडगं नेस्तनाबूत करायची घोषणा सभेत होणार का?भाषणाची स्क्रिप्ट बारामतीवरून आल्यावर अवघड वाटतंय सगळं.

— Gajanan Kale (@GajananKaleMNS) June 7, 2022

आणखी एक टीझर....

उद्धव ठाकरेंच्या सभेपूर्वी शिवसेनेकडून आतापर्यंत अनेक टीझर जारी करण्यात आले आहेत. त्यातच आता सभेच्या एक दिवस आधी सुद्धा आणखी एक टीझर जारी करण्यात आला आहे. या टीझरमध्ये बाळासाहेबांनी औरंगाबादच्या नामांतराची केलेली मागणीचा भाषण दाखवण्यात आला आहे. सोबतच, लाखोचा भगवा गजर, आपलं संभाजीनगर...सिंहगर्जना घुमणार खरे हिंदुत्व काय? हे संभाजीनगर सांगणार,भगवी पताका फडकणार हिंदुत्वाचाझेंडा उंच राहणार,प्रखर हिंदुत्वासाठी भगव्या एल्गारासाठी हिंदुत्वाचा नारा दुमदुमणार सर्वत्र भगवे वादळ घुमणार,शिवबंधन दृढ राहणार हिंदुत्व चेतवणार,हिंदुत्वाचा गजर चलो संभाजीनगर...असे टीझरमध्ये म्हटल आहे.

भाजप पदाधिकाऱ्यांना पोलिसांकडून नोटीसा 

मुख्यमंत्री उद्धव ठाकरेंच्या सभेपूर्वी भाजपच्या प्रमुख पदाधिकारी व कार्यकर्त्यांना पोलिसांकडून नोटीसा पाठवण्यात आल्या आहेत. नोटीस देण्यात आलेल्या सर्वांना आज दुपारी सिटी चौक पोलीस ठाण्यात हजर राहण्यास सांगण्यात आले होते. तर पाण्याच्या मुद्यावरून आंदोलन करू नयेत म्हणून पोलिसांकडून दबाव आणला जात असल्याचा भाजपकडून आरोप करण्यात आला आहे. त्यामुळे उद्धव ठाकरेंच्या सभेपूर्वी शिवसेना-भाजप पुन्हा एकदा आमने-सामने येण्याची शक्यता आहे.