Lockdown Live Update | सात दिवसांच्या धार्मिक कार्यक्रमामुळे गावावर विघ्न, छोट्याशा गावात 155 कोरोनाबाधित

Maharashtra Lockdown LIVE Updates: महाराष्ट्रात कोरोना रुग्णांचं प्रमाण दिवसेंदिवस वाढताना दिसत आहे कोरोनाच्या पार्श्वभूमीवर राज्यातील काही शहरांमध्ये पुन्हा कडक निर्बंध लादण्यात आले आहेत. राज्यात कोणत्या भागात, शहरात काय काय निर्बंध घालण्यात आले आहेत, याबाबत प्रत्येक अपडेट्स या लाईव्ह ब्लॉगमध्ये...

Background

मुंबई : राज्यात कोरोना रुग्णांचं प्रमाण दिवसेंदिवस वाढताना दिसत आहे कोरोनाच्या पार्श्वभूमीवर राज्यातील काही शहरांमध्ये पुन्हा कडक निर्बंध लादण्यात आले आहेत. राज्यांनी मुख्यमंत्री  उद्धव ठाकरे  यांनी जनतेशी संवाद साधून योग्य ती खबरदारी घेण्याचं आवाहन केल. तसेच सर्व राजकीय, शासकीय, धार्मिक आणि सामाजिक कार्यक्रमांना काही दिवस बंदी घालण्यात येणार असल्याचं मुख्यमंत्र्यांनी जाहीर केलं.

 

पुणे

पुण्यात रात्री 11 ते सकाळी सहापर्यंत पुन्हा संचारबंदी करण्याचा निर्णय घेतला आहे. शाळा, महाविद्यालय, कोचिंग क्लासेस 28 फेब्रुवारीपर्यंत बंद करण्याचा निर्णय घेण्यात आला आहे. मायक्रो कंटेन्मेंट झोन लागू करण्याचा विचार असून त्याबाबत लवकरच निर्णय घेण्यात येत आहे. विवाह सोहळ्यास किंवा समारंभास होणारी गर्दी लक्षात घेता, यावरही कडक निर्बंध लावण्याचा निर्णय घेण्यात आला असून लग्न, समारंभास केवळ 200 जणांची उपस्थितीच असावी लागेल, अन्यथा कायदेशीर कारवाई करण्यात येणार आहे. शहरातील हॉटेल्स, रेस्टॉरंट रात्री 11 वाजेपर्यंत मर्यादित.

 

राजकीय, धार्मिक, सामाजिक कार्यक्रमांना काही दिवस बंदी : मुख्यमंत्री उद्धव ठाकरे

 

नाशिक

नाशिकमध्ये आजपासून रात्री 11 ते पहाटे 5 या वेळेत संचारबंदी लागू करण्यात आली आहे. मास्क न वापरल्यास 1 हजार रुपयांचा दंड आकारण्यात येईल. तसेच आठ दिवसांत स्थिती नियंत्रणात आली नाही तर कडक निर्णय घ्यावे लागतील, असंही छगन भुजबळ यांनी सांगितलं.

 

Corona Virus: शक्य असेल तिथं 'वर्क फ्रॉम होम' सुरु ठेवा; मुख्यमंत्री उद्धव ठाकरे आग्रही

 

नागपूर

आठवडी बाजार 7 मार्चपर्यंत बंद तर मुख्य बाजार पेठ शनिवार व रविवारी बंद राहणार. 7 मार्च पर्यंत सर्व शाळा महाविद्यालय कोचिंग क्लासेस बंद राहतील. हॉटेल, रेस्टोरेंट 50 टक्के क्षमतेने चालतील, रात्री 9 नंतर हॉटेल बंद केले जातील. सर्व राजकीय, धार्मिक, सामाजिक कार्यक्रम 7 मार्चपर्यंत बंद राहतील. मंगल कार्यालय 25 फेब्रुवारी नंतर 7 मार्च पर्यंत बंद राहणार. त्यामुळे 50 पेक्षा कमी लोकांच्या उपस्थितीत घरी लग्न करता येईल. मंगल कार्यालयमध्ये 7 मार्चपर्यंत लग्न होणार नाही. नवीन हॉटस्पॉट शोधून कंटेंमेंट झोन निश्चित केले जाणार आहेत.

 

नांदेड

शहरात पाचवी ते आठवी पर्यंतच्या शाळा बंद करण्याचा निर्णय घेण्यात आला आहे. कोरोनाचा नवीन विषाणूचा प्रादुर्भाव रोखण्यासाठी नागरिकांनी मास्क, सॅनिटायजर आणि योग्य अंतर या त्रिसूत्री नियमांची अंमलबजावणी काटेकोरपणे करावी असं आवाहन जिल्हाधिकाऱ्यांनी केलंय.

 

अमरावती विभाग

अकोला, अमरावती, यवतमाळ, बुलडाणा, वाशिम जिल्ह्यात निर्बंध लागू करण्यात आले आहेत. सर्व प्रकारची दुकाने/आस्थापना सकाळी 9 ते सायंकाळी 5 पर्यंत सुरू राहतील. सर्व प्रकारची उपहारगृहे हॉटेल्स प्रत्यक्ष सुरू न ठेवता फक्त पार्सल सुविधेत परवानगी राहील. लग्नसमारंभकरिता 25 व्यक्तींना वधू-वरासह परवानगी राहील. जिल्हा बस वाहतूक करताना बसमधील असलेल्या एकूण प्रवासी श्रमतेच्या 50 टक्के प्रवासी वाहतुकीकरिता परवानगी राहील. सर्व प्रकारची शाळा, महाविद्यालय, शैक्षणिक प्रशिक्षण केंद्रे, खाजगी शिकवणी वर्ग, कोचिंग क्लासेस हे बंद राहतील. सिनेमागृहे, व्यायाम शाळा, जलतरण तलाव, मनोरंजन, उद्याने, नाट्यगृहे संबंधित ठिकाणे ही बंद राहतील.

 

Chhagan Bhujbal : छगन भुजबळ यांना कोरोनाची लागण

 

अमरावती- जिल्ह्यातील अमरावती आणि अचलपूर/परतवाडा शहरात आजपासून रात्री 8 वाजल्यापासून आठवडाभर लॉकडाऊन

 

अकोला- अकोला महापालिका क्षेत्र, अकोट आणि मुर्तिजापूर नगरपालिका क्षेत्रात २३ फेब्रुवारीपासून आठवडाभर लॉकडाऊन

 

बुलडाणा- आजपासून पुढील आदेशापर्यंत शेगाव गजानन महाराजांचं मंदिर बंद

 

पंढरपूर-विठ्ठल मंदिर बुधवार सकाळपर्यंत बंद, शहरातही संचारबंदी लागू

 

औरंगाबाद

गेल्या काही दिवसांपासून शहरात चालणारे रिक्षामध्ये क्षमतेपेक्षा जास्त प्रवासी पाहायला मिळतात. त्याच बरोबर रिक्षाचालक देखील मास्क वापरत नाहीत. त्यामुळे औरंगाबाद पोलिसांनी आता विनामास्क रिक्षाचालकांना चालवणार्‍या आणि क्षमतेपेक्षा जास्त प्रवाशांची वाहतूक करणाऱ्या रिक्षांवर कारवाई करायला सुरुवात केली आहे. एकापेक्षा अधिक वेळा एखाद्या रिक्षाला दंड झाला तर ती रिक्षा जप्त करणार असल्याचे देखील पोलिसांनी सांगितले.

18:15 PM (IST)  •  23 Feb 2021

लातूर शहरातील एमआयडीसी भागातील खासगी हॉस्टेलमधील 45 विद्यार्थ्यांना कोरोनाची लागण झाल्यानंतर प्रशासना खडबडून जागे झाले आहे. परवानगी नसतानाही शहरातील 170 पेक्षा जास्त खासगी हॉस्टेल सुरु असल्याने आता त्याच्यावर दंडात्मक कारवाई करण्यात येत आहे. काल रात्री उशिरा लातूर येथील एमआयडीसी भागातील एका खासगी हॉस्टेलमधील 40 विद्यार्थ्यांना कोरोनाची लागण झाल्याचे समोर आले आणि लातूरच्या शैक्षणिक क्षेत्रात भीतीचे वातावरण तयार झाले. प्रशासनही जागे झाले. त्यातच आज तपासणी केली असता त्याच्या हॉस्टेलमधील आणखी पाच विद्यार्थी कोरोनाग्रस्त असल्याचे आढळून आले आहे. जिल्हा प्रशासन आणि मनपाच्या पथकाने केलेल्या संयुक्त पथकाने शहरातील विविध 170 पेक्षा जास्त हॉस्टेलची तपासणी सुरु केली आहे. खासगी हॉस्टेल सुरु करण्याच्या बाबतीत कोणतेही निर्देश अद्याप आले नसतानाही हे हॉस्टेल सुरु असल्याचे आढळून आले आहे. आता त्यात 50 पेक्षा जास्त संख्या असल्यास आर्थिक दंड करण्यात येत आहे. यात सुधारणा नाही केल्यास फौजदारी गुन्हा दाखल करण्यात येणार असल्याचेही माहिती अधिकारी देत आहेत. लातूर शहर हे संपूर्ण राज्यात शैक्षणिक हब म्हणून ओळखले जात आहे. दरवर्षी 25 हजार विद्यार्थी येथे शिक्षणासाठी येत असतात. आता काय करावे असा प्रश्न हॉस्टेलचालकांसमोर आहे तर विद्यार्थ्यांच्या पालकांमध्ये चिंतेचं वातावरण आहे.

23:33 PM (IST)  •  23 Feb 2021

बुलढाणा जिल्ह्यातील जळगाव जामोद तालुक्यातील झाड़ेगाव या छोट्याशा गावात काही दिवासांपूर्वी एक सात दिवसाचा धार्मिक कार्यक्रम गावकऱ्यांनीच आयोजित केला होता. या कार्यक्रमाला गावकऱ्यासह बाहेरगावातून काही मंडळी सामील झाली होती. परंतु कोरोनाचे कोणतेही नियम न पाळल्यामुळे गावात संसर्ग पसरला आणि बघता बघता छोट्याशा गावात 155 जणांना कोरोनाची लागण झाली. आता गावाला प्रतिबंधित गाव म्हणून घोषित करण्यात आलं असून, गावात आरोग्य पथक, महसूल आणि पोलीस कर्मचारी कामाला लागले आहेत. गावातील प्रत्येकाची टेस्ट करण्यात येत आहे. गावाची लोकसंख्या जेमतेम दोन हजाराच्या जवळपास आहे.आता अजून किती जणांचे रिपोर्ट पॉझिटिव्ह येतात हे समजेलच, पण नागरिकांनी कोरोना गेला असं समजून काळजी न घेतल्याने अख्खं गावच संकटात सापडलं आहे.

19:28 PM (IST)  •  23 Feb 2021

'कोविड 19 संसर्ग रोखण्यासाठी पुन्हा नव्याने नियमांचा प्रचार करा. लोकांपर्यंत पुन्हा नव्याने माहिती पोहोचवा. लोक नियम पाळतील याची जबाबदारी स्थानिक स्वराज्य संस्थांची असेल. लोकांना त्यांचं नुकसान काय आहे ते पटवून द्या,' अशा सूचना मुख्यमंत्री उद्धव ठाकरे यांनी कोविड-19 संसर्गाच्या आढावा बैठकीत केल्या.

18:07 PM (IST)  •  23 Feb 2021

कोरोनाच्या वाढत्या संसर्गामुळे परभणी जिल्ह्यात निर्बंध आणखी कडक करण्यात आले आहेत. परभणी जिल्ह्यातून विदर्भातील 11 जिल्ह्यात जाणाऱ्या आणि येणाऱ्या सर्व प्रवासी तसंच सार्वजनिक वाहतुकीवर निर्बंध घालण्यात आले आहेत. परभणीचे जिल्हाधिकारी दीपक मुगळीकर यांनी हे आदेश काढले आहेत. शिवाय जिल्हाभरातील धार्मिक स्थळंही पुढील आदेशापर्यंत बंद ठेवण्यात येणार आहेत. केवळ पाच जणांनाच दैनंदिन विधी पार पाडता येणार आहेत.

22:37 PM (IST)  •  22 Feb 2021

कोरोना पुन्हा फोफावू लागल्याने पिंपरी चिंचवडकरांनी काळजी घेण्याची गरज आहे. असं असताना शहराच्या प्रथम नागरिक महापौर माई ढोरे यांनीच कोरोनाच्या नियमांना हरताळ फासलय. त्यांच्या सोबतीला भाजपच्या बहुतांश नगरसेविका देखील होत्या. सिनेअभिनेत्री प्रार्थना बेहरे ही तिथं उपस्थित होती. भाजप आमदार लक्ष्मण जगतापांच्या वाढदिवसानिमित्त मिस ऍण्ड मिसेस फॅशन शो चे आयोजन करण्यात आले होते. महापौरांनी आयोजित केलेल्या स्पर्धेला सिनेअभिनेत्री प्रार्थना बेहरे उपस्थित असल्याने चांगलीच गर्दी जमली होती. मुख्यमंत्री उद्धव ठाकरेंनी गर्दीच्या कार्यक्रम घेऊ नका असं आवाहन केलं होतं. चोवीस तासांच्या आतच या आवाहनाला पिंपरी चिंचवडच्या महापौर माई ढोरे आणि भाजप नगरसेविकांनी केराची टोपली दाखवली आहे. बहुतांश महापौरांसह नगरसेविकांनी विना मास्क रॅम्प वॊक केला, तसेच सभागृहात सोशल डिस्टनसिंगचा फज्जा उडवला. आता लोकप्रतिनिधी स्वतःच नियमांना हरताळ फासतायेत म्हटल्यानंतर स्पर्धक आणि प्रेक्षकांकडून कोणती अपेक्षा केली जाणार. त्यांनी देखील तोच कित्ता गिरविल्याच दृश्यातून स्पष्ट होतंय. या कार्यक्रमाला पिंपरी चिंचवड पोलिसांची परवानगी होती. सभागृहाच्या पन्नास टक्के उपस्थिती ठेवणं अपेक्षित होतं, पण प्रत्यक्षात संख्या अधिक असल्याचं दिसून आलं. पालिकेत भाजप सत्तेत असल्याने प्रशासनाने देखील याकडे कानाडोळा केला. पण या कार्यक्रमाचे व्हिडीओ व्हायरल झाल्याने, प्रशासनाला जाग आली. पालिकेच्याच रामकृष्ण मोरे सभागृहात सुरू असलेल्या कार्यक्रमस्थळी प्रशासनाने पथक पाठविण्याची तसदी घेतली आहे. पण कारवाई होणार का याबाबत शंका आहे.