मनसे, वंचितनंतर आता आणखी एक पक्ष स्वबळावर लढणार, महायुतीतील घटक पक्षाची 288 जागांवर लढण्याची तयारी पूर्ण
Akola News : महायुतीचा निर्णय होईल त्यावेळी होईल, सध्यातरी आपण 288 जागांवर लढण्याची तयारी सुरू केल्याची माहिती रासपचे अध्यक्ष आणि आमदार महादेव जानकर यांनी दिली.
अकोला : मनसे, वंचित नंतर आता राज्यातील महायुतीतील एक पक्ष स्वबळावर लढण्याची चाचणी करतोय. महादेव जानकर यांच्या राष्ट्रीय समाज पक्षानं राज्यातील 288 विधानसभा मतदारसंघातही चाचपणी सुरू केली आहे. महायुतीचा घटक असलो तरी स्वबळावर लढण्यासाठी तयारी पूर्ण झाल्याची माहिती महादेव जानकर यांनी दिली. ते अकोल्यात माध्यमांशी संवाद साधत होते.
महादेव जानकर यांच्या राष्ट्रीय समाज पक्षाचा 21 वा वर्धापन दिन सोहळा गुरूवारी अकोल्यात साजरा होत आहे. त्या दृष्टीने जानकर यांनी स्वबळाच्या दृष्टीने केलेल्या वक्तव्याला आता राजकीय महत्त्व प्राप्त झालं आहे. पक्षाच्या राज्य कार्यकारिणीने संसदीय मंडळाला स्वबळावर लढण्याची शिफारस केली तर पक्ष त्या निर्णयासोबत असेल असं जानकर म्हणाले.
वंचित लोकांना मुख्य प्रवाहात आणण्यासाठी निवडणूक लढवणार
राज्यातील जे वंचित आणि उपेक्षित लोक आहेत त्यांना मुख्य प्रवाहात आणण्यासाठी आपला पक्ष निवडणूक लढवत असल्याचं महादेव जानकर म्हणाले. ते म्हणाले की,
राजकारणाच्या माध्यमातून उपेक्षित लोकांना अपेक्षित ठिकाणी घेऊन जाणार आहे. फुले शाहू आंबेडकरांच्या विचारधारेवर काम करणारा आमचा पक्ष आहे. गरीब लोकांना मुख्य प्रवाहात आणण्यासाठी प्रयत्न करणार. तसेच वंचित समाजाला संधी देण्यासाठी काम करणार.
विधानसभेच्या 288 जागांवर निवडणूक लढण्याचा निर्णय जर रासपच्या राज्य कार्यकारिणीने घेतला तर सगळ्या जागा लढवून असं महादेव जानकर म्हणाले. महायुतीमधून निवडणूक लढवायची असेल तर त्या संदर्भात युतीचा निर्णय नंतर घेतला जाईल. पण सध्या तरी 288 जागांवर निवडणूक लढवण्याची तयारी सुरू असल्याची माहिती महादेव जानकर यांनी दिली.
महादेव जानकर-अमोल मिटकरी भेट
दरम्यान, महादेव जानकर यांनी राष्ट्रवादी अजित पवार गटाचे आमदार अमोल मिटकरी यांची त्यांच्या न्यू तोष्णीवाला भागातील निवासस्थानी भेट घेतली. या दोन्ही नेत्यांमध्ये दीड तास बंददाराआड चर्चा झाली.
50 जागा द्या अन्यथा...
या आधीही महादेव जानकरांनी महायुतीकडून 50 जागांची मागणी केली होती. राष्ट्रीय समाज पक्ष महायुतीमध्येच आहे, महायुतीने सन्मानजनक जागा द्याव्यात अशी मागणी त्यांनी केली. महायुतीत राष्ट्रीय समाज पक्षाला 50 जागा मिळाव्यात अन्यथा महाराष्ट्रात 288 जागा लढवणार असा इशारा महादेव जानकर यांनी दिली होता. शिवाय त्यांनी मुंबईतील गोवंडी आणि मागाठाणे या मतदारसंघांवर त्यांनी दावा ठोकलाय. विशेष म्हणजे सध्या मागठाणे विधानसभेत शिवसेना शिंदे गटाचे प्रकाश सुर्वे आमदार आहेत.
ही बातमी वाचा:
महत्त्वाच्या बातम्या
ट्रेंडिंग न्यूज
