Eknath Shinde : सर्वांच्या साथीनं विकास करणार, सर्व घटकांना न्याय देणार; मुख्यमंत्री एकनाथ शिंदे यांची पहिली प्रतिक्रिया
Oath Ceremony : देवेंद्र फडणवीसांच्या साथीने सर्व घटकांना एकत्र घेऊन राज्याचा विकास केला जाईल असं नवनियुक्त मुख्यमंत्री एकनाथ शिंदे म्हणाले.
मुंबई: सर्वांच्या साथीने राज्याचा विकास करणार, राज्याचा विकास, आणि महाराष्ट्रातल्या सर्व घटकांना न्याय देण्याचं काम अशी पहिली प्रतिक्रिया नवनियुक्त मुख्यमंत्री एकनाथ शिंदे यांनी दिली आहे. राज्याचे 30 वे मुख्यमंत्री म्हणून त्यांनी आज शपथ घेतली.
शपथविधी झाल्यानंतर एकनाथ शिंदे म्हणाले की, हा बाळासाहेबांच्या विचारांच्या आणि धर्मवीर आनंद दिघेंच्या शिकवणीचा विजय आहे. राज्याचा विकास आणि महाराष्ट्रातल्या सर्व घटकांना न्याय देण्याचं काम मी करणार आहे. सर्वांच्या साथीने विकासाचा गाडा नेण्यात येईल. उपमुख्यमंत्री म्हणून देवेंद्र फडणवीस सोबत कायम आहे, त्यांच्या साथीने महाराष्ट्राचा विकास करू.
आज राजभवनमध्ये हा शपथविधीचा कार्यक्रम पार पडला. राज्याचे राज्यपाल भगतसिंह कोश्यारी यांनी एकनाथ शिंदे यांना मुख्यमंत्रीपदाची शपथ दिली. त्यानंतर राज्याचे उपमुख्यमंत्री म्हणून देवेंद्र फडणवीस यांनी शपथ घेतली. केंद्रीय नेतृत्वाच्या आग्रहानंतर देवेंद्र फडणवीसांनी उपमुख्यमंत्रीपदाची शपथ घेतली.
एकनाथ संभाजी शिंदे
जन्म : 6 मार्च 1964.
जन्म ठिकाण : अहिर, तालुका-महाबळेश्वर, जिल्हा-सातारा.
शिक्षण : बी.ए.
ज्ञात भाषा : मराठी, हिंदी व इंग्रजी.
वैवाहिक माहिती : विवाहित, पत्नी श्रीमती लता. अपत्ये : एकूण 1 (एक मुलगा).
व्यवसाय : उद्योग व सामाजिक कार्य. पक्ष : शिवसेना.
मतदारसंघ : 147 -कोपरी-पाचपाखाडी, जिल्हा-ठाणे.
भाजपच्या उमेदवाराला 89 हजार 300 मतांनी हरवून विजयी
शिंदे यांना पडलेली मतं - 1 लाख 13 हजार 495
भाजपच्या संजय घाडीगावकर यांना पडलेली मतं - 24 हजार 197
एकनाथ शिंदे यांची राजकीय कारकीर्द :
1997 व 2002 दोन वेळा नगरसेवक, तीन वर्षे स्थायी समिती सदस्य, चार वर्षे सभागृह नेता, महानगरपालिका ठाणे.
2004, 2009,2014,2019 चार वेळा आमदार;
2014 ते 2019 विधीमंडळ शिवसेना पक्षाचे गटनेते;
12 नोव्हेंबर 2014 ते 5 डिसेंबर 2014 विधानसभा विरोधी पक्ष नेता,
5 डिसेंबर ते नोव्हेंबर 2019 सार्वजनिक बांधकाम (सार्वजनिक उपक्रम) मंत्री; तसेच जानेवारी 2019 सार्वजनिक आरोग्य खात्याचा कार्यभार व ठाणे जिल्ह्याचे पालकमंत्री;
ऑक्टोबर 2019 मध्ये महाराष्ट्र विधानसभेवर फेरनिवड; डिसेंबर 2019 पासून शिवसेनेचे गटनेते;
नोव्हेंबर 2019 पासून नगर विकास व सार्वजनिक बांधकाम (सार्वजनिक उपक्रम) खात्याचे मंत्री.
30 जून पासून महाराष्ट्राचे 30 वे मुख्यमंत्री.
महत्त्वाच्या बातम्या
ट्रेंडिंग न्यूज
