एक्स्प्लोर

अखेर एकनाथ खडसेंचा राजीनामा, सर्व मंत्रिपदं सोडली

Written By : एबीपी माझा वेब टीम | Updated at : 04 Jun 2016 06:39 AM (IST)

जळगाव/मुंबई : अनेक आरोपांच्या चक्रव्युहात अडकलेले महसूलमंत्री एकनाथ खडसे यांची अखेर उचलबांगडी झाली आहे. खडसेंनी आपल्या सर्व मंत्रिपदांचा राजीनामा दिला आहे. खडसेंनी मुख्यमंत्री देवेंद्र फडणवीस यांच्या 'वर्षा' बंगल्यावर जाऊन आपला राजीनामा सुपूर्द केला. देवगिरी या निवासस्थानावरुन खडसे एकटेच वर्षाकडे निघाले, तेव्हा त्यांच्या गाडीवरील लाल दिवा झाकलेला होता. त्यामुळे खडसे राजीनामा देेणार हे निश्चित होतं. यावेळी अर्थमंत्री सुधीर मुनगंटीवार हे सुद्धा 'वर्षा' बंगल्यावर उपस्थित होते. खडसेंनी आपल्याकडे असलेल्या महसूल कृषी, पशुसंवर्धन, राज्य उत्पादन शुल्क, दुग्धविकास आणि मस्त्यपालन, अल्पसंख्यांक विकास आणि वक्फ मंत्री ही पदं सोडली आहेत.

खडसेंच्या जागी मुनगंटीवार निश्चित, 15 जूनला शपथविधी?

एबीपी माझाच्या बातमीवर शिक्का मुख्यमंत्री देवेंद्र फडणवीस आजच एकनाथ खडसेंचा राजीनामा घेणार याबाबतची बातमी एबीपी माझाने सकाळीच दिली होती. फक्त महसूलमंत्रिपदच नाही, तर खडसेंची सर्व मंत्रिपदं काढून घेणार अशीही बातमी माझ्याच्या सूत्रांनी दिली होती. त्यावर शिक्कामोर्तब झालं. दरम्यान खडसेंचा राजीनामा घेण्याचे आदेश भाजपाध्यक्ष अमित शाह यांनी मुख्यमंत्र्यांना दिले होते. कथित पीएची लाचखोरी, दाऊदच्या कॉललिस्टमधील खडसेंचा कथित नंबर, तसंच भोसरीतील जमीन खरेदीप्रकरण या आरोपांमुळे खडसेंना विरोधकांसह सत्ताधारी शिवसेनेने घेरलं होतं. त्याचाच परिणाम म्हणून पक्षनेतृत्वाने अखेर खडसेंचा राजीनामा घेतला आहे. दिल्ली दरबारी गुरुवारी मुख्यमंत्री देवेंद्र फडणवीस आणि पंतप्रधान नरेंद मोदींमध्ये जवळपास अर्धा तास गुप्त बैठक झाली होती. या बैठकीपूर्वी फडणवीस यांनी खडसेंवरील भ्रष्टाचाराच्या आरोपांसदर्भातला अहवाल अमित शाहांकडे सोपवला होता. यानंतर खडसेंचा निर्णय विधानपरिषद निवडणुकीनंतर होईल, असं सांगण्यात येत होतं. मात्र विधानपरिषद निवडणूक बिनविरोध झाल्याने पक्षावर दबाव वाढत होता. त्यामुळे भाजपाध्यक्षांकडून मुख्यमंत्र्यांना खडसेंचा राजीनामा घेण्याचे आदेश दिले.

खडसेंचं ट्विट

अज्ञातवासात असलेले महसूलमंत्री एकनाथ खडसेंचं प्रसारमाध्यमांना शुक्रवारी दर्शन झालं. मोबाईल क्लिप आणि ट्विटरच्या माध्यमातून खडसेंनी मला शेतकऱ्यांसाठी काम करु द्या असं आवाहन केलं. माझ्याविरोधातील सगळे आरोप हा नियोजित कटाचा भाग आहे, असं म्हणत एकनाथ खडसेंनी स्वकीयांवरच निशाणा साधला होता. खडसे अज्ञातवासात असल्याचं म्हटलं जात असलं, तरी ते मुंबईतील निवासस्थानीच असल्याची खात्रीलायक सूत्रांची माहिती आहे. खडसेंनी ट्विटरवर म्हटलं आहे की, “मी मीडियाला विनंती करतो की, एक जबाबदार कृषीमंत्री म्हणून मी शेतकऱ्यांच्या प्रश्नांवर लक्ष देत आहे. तथ्यहीन आणि नियोजित आरोपांना मला उत्तरं देण्याऐवजी मला माझी कामं करु द्या.”

एकनाथ खडसेंनी सोडलेली मंत्रिपदं :

*महसूल

*कृषी

*पशूसंवर्धन

*राज्य उत्पादन शुल्क

*दुग्धविकास आणि मत्स्यपालन

*अल्पसंख्याक विकास आणि वक्फ मंत्री

भोसरीतील जमीन खरेदीप्रकरण भोवलं?

भोसरीतील जमीन खरेदीप्रकरणी खडसे सध्या रडारवर होते. भोसरी एमआयडीसीमधील सर्व्हे नंबर ५२ मधील तीन एकर जागेचा हा वाद आहे. ही जमीन गेल्या महिन्यात खडसेंच्या पत्नी मंदाकिनी खडसे आणि जावई गिरीष चौधरी यांनी अब्बास उकानी या व्यक्तीकडून, तीन कोटी 75 लाख रुपयांना खरेदी केली. पुण्यातील उपनिबंधक कार्यालयात या व्यवहाराची नोंद करून स्टँप ड्युटी म्हणून एक कोटी 37 लाख रुपये देखील भरण्यात आले. परंतु ही जमीन एमआयडीसीच्या मालकीची असल्याचं उघड झालं आहे.

लाल दिवा सोडून खडसे जळगावात

एकनाथ खडसेंनी चार दिवसांपूर्वी झालेल्या मंत्रिमंडळाच्या बैठकीलाही हजेरी लावली नाही. शिवाय जळगावमध्ये खडसेंनी लालदिव्याची गाडीही वापरली नाही. मुक्ताईदेवीच्या यात्रेसाठी आपण जळगावात आलं असल्याचं एकनाथ खडसे यांनी स्पष्ट केलं होतं. नाराजीमुळे कॅबिनेट बैठकीला दांडी मारुन जळगाव दौऱ्याला गेल्याच्या चर्चेनंतर खडसेंनी याबाबत स्पष्टीकरण दिलं होतं. मंत्रिपदापेक्षा मुक्ताईदेवीचा सोहळा महत्त्वाचा असून यात्रेची तारीख आधीच निश्चित झाल्याची सारवासारवही त्यांनी केली होती.

खडसेंवरील आरोप

* कथित पीए गजानन पाटीलकडून खडसेंच्या नावे 30 कोटी लाच मागितल्याचा आरोप, गजानन पाटीलला अटक * जावयाची लिमोझिन कार बेकायदा असल्याचा आरोप * दाऊदच्या कॉलर लिस्टमध्ये खडसेंचा नंबर असल्याचा हॅकरचा दावा * भोसरी एमआयडीसीतील जमीन खरेदी वाद

एकनाथ खडसे यांची कारकीर्द

*2 सप्टेंबर 1952 रोजी एकनाथ खडसेंचा मुक्ताईनगर तालुक्यातील कोठाळी गावात जन्म झाला. *खडसेंचे वडील शेतकरी होते. प्राथमिक शिक्षण कोठाळी गावातील शाळेतच झालं. *खडसेंना सामाजिक कार्याची आवड असल्याने तरुणपणीच राजकारणात सक्रीय होते. *एकनाथ खडसे 1987 मध्ये खडसे कोठाळी गावचे सरपंच म्हणून निवडून आले. तिथूनच्या त्यांच्या राजकारणाचा श्रीगणेशा झाला *1989 मध्ये मुक्ताईनगर मतदारसंघातून पहिल्यांदा विधानसभेवर निवडून गेले. *खडसेची सलग सहा वेळा मुक्ताईनगरमधून विधानसभेसाठी निवड झाली. *1995 मध्ये युती सरकार आल्यानंतर खडसेंनी अर्थ आणि जलसंपदा मंत्री म्हणून काम केलं. *2010 साली विधानसभेचे विरोधी पक्षनेते म्हणून एकनाथ खडसेंची निवड झाली. *तर 2014 ची विधानसभा निवडणूक जिंकल्यानंतर खडसेंना मुख्यमंत्रीपदाचे प्रमुख दावेदार मानले जात होते. *ज्युनिअर असलेल्या देवेंद्र फडणवीस मुख्यमंत्रीपदी विराजमान झाल्याने खडसे नाराज होते, मात्र त्यांची महसूलमंत्रीपदी वर्णी लागली. *एकनाथ खडसे यांची सून रक्षा या जळगाव लोकसभा मतदारसंघातून खासदार म्हणून संसदेत. *खडसे महसूलमंत्री झाल्यानंतर त्यांच्या पत्नी मंदाकिनी या महानंद डेअरीच्या संचालक झाल्या. *तसंच मुलगी रोहिणी खडसे जळगाव जिल्हा बँकेच्या अध्यक्षपदी कार्यरत आहेत.