रोहित पवारांची आज ईडी चौकशी; बारामती अॅग्रो कथित गैरव्यवहार प्रकरणी प्रश्नांची सरबत्ती, शरद पवार गटाचं शक्तिप्रदर्शन
बारामती अॅग्रो कथित गैरव्यवहार प्रकरणी आमदार रोहित पवारांची आज ईडी चौकशीशरद पवार गट शक्तिप्रदर्शन करणार, तर चौकशीत पूर्ण सहकार्य करणार असल्याची रोहित पवारांची प्रतिक्रिया
Rohit Pawar ED Inquiry : मुंबई : आमदार रोहित पवार (MLA Rohit Pawar) यांची आज ईडी (ED) चौकशी होणार आहे. त्यामुळे राष्ट्रवादी काँग्रेस (Nationalist Congress Party) रोहित पवार (Rohit Pawar) यांच्या समर्थनात पक्ष शक्तिप्रदर्शन करण्याच्या तयारीत आहे. रोहित पवारांची चौकशी संपेपर्यंत शरद पवार (Sharad Pawar) दिवसभर पक्षाच्या कार्यालयातच थांबणार आहेत. तर खासदार सुप्रिया सुळे (Supriya Sule) रोहित पवार यांना ईडी कार्यालयापर्यंत सोडायला जाणार आहेत. दरम्यान, चौकशीत पूर्ण सहकार्य करणार असल्याची प्रतिक्रिया रोहित पवार यांनी दिली आहे. त्याशिवाय कार्यकर्त्यांना शांत राहण्याचा सल्लाही त्यांनी दिला आहे.
गेल्या अनेक दिवसांपासून रोहित पवारांच्या घरी ईडीची छापेमारी सुरू होती. पण त्यांना चौकशीसाठी बोलावण्यात आलं नव्हतं. तसेच, मी ज्याप्रकारे वेगवेगळ्या मुद्द्यांवर भाष्य करतोय, त्यामुळे माझ्यावर केंद्रीय यंत्रणांचा दबाब आणण्याचा प्रयत्न सुरू असल्याचं रोहित पवारांकडून वारंवार सांगितलं जात होतं. त्यामुळे आता या सगळ्या घडामोडींवर रोहित पवार काय भूमिका घेणार? हे पाहणं महत्त्वाचं ठरणार आहे.
बारामती अॅग्रोवर ईडीकडून छापेमारी
बारमती अॅग्रो कथित गैरव्यावहार प्रकरणी मुंबईसह सहा ठिकाणी ईडीनं छापेमारी कोली होती. आमदार रोहित पवार यांच्याकडे बारमती अॅग्रो कंपनीची मालकी आहे. बारामती अॅग्रोच्या सहा कार्यालयांवर छापेमारी करत ईडीकडून तपास करण्यात आला होता. मागील वर्षी याच संदर्भात रोहित पवारांना ईडीकडून नोटीस बजावण्यात आली होती. आता ईडीनं पुन्हा आपला मोर्चा रोहित पवार यांच्या बारामती अॅग्रोकडे वळवला आहे.
महाविकास आघाडीच्या नेत्यांमागे तपास यंत्रणांचा ससेमिरा
सध्याचा आठवडा चौकशांचा आठवडा आहे, असं म्हटलं तरी वावगं ठरणार नाही. सोमवारपासून सुरु झालेल्या आठवड्याच्या पहिल्या दिवसापासून विरोधकांच्या नेत्यांमागे चौकशीचा ससेमिरा लागला आहे. सोमवारी शिवसेना ठाकरे गटाचे आमदार राजन साळवी यांना एसीबीने चौकशीसाठी बोलावलेलं. कथित बेहिशेबी मालमत्तेप्रकरणी त्यांची चौकशी सुरू असून त्यांच्या घराची झडतीही घेण्यात आली आहे. त्यानंतर मंगळवारी ठाकरे गटाचे आमदार रवींग्र वायकर यांनाही 11 वाजता ईडीनं चौकशीसाठी समन्स धाडलं आहे. जोगेश्वरीतील भूखंडप्रकरणी वायकरांची चौकशी सुरू आहे. तर आज म्हणजेच, बुधवारी शरद पवार गटाचे आमदार रोहित पवार यांना ईडीनं चौकशीसाठी बोलावलं आहे. बारामती अॅग्रोप्रकरणी ही चौकशी होणार आहे. तर, गुरुवारी मुंबईच्या माजी महापौर आणि ठाकरे गटाच्या नेत्या किशोरी पेडणेकर यांनाही ईडीनं चौकशीसाठी पाचारण केलं आहे. कोरोना काळातील कथित बॉडीबॅग प्रकरणी ही चौकशी होणार आहे. त्यामुळे या आठवड्याच्या चार दिवसांत विरोधकांच्या चार नेत्यांच्या होणाऱ्या चौकशांची राज्याच्या राजकीय तसंच सामाजिक वर्तुळात चर्चा सुरू आहे.
महत्त्वाच्या बातम्या
ट्रेंडिंग न्यूज
