Devendra Fadnavis : दोन भावांनी एकत्र येऊ नये असा जीआर मी काढलाय का? त्यांनी एकत्र यावं आणि क्रिकेट खेळावं : देवेंद्र फडणवीस
Devendra Fadnavis On Mumbai Morcha : उद्धव ठाकरे यांचे सत्तेतील रुप वेगळं आणि विरोधात असताना रुप वेगळं असतं असा टोला मुख्यमंत्री देवेंद्र फडणवीसांनी लगावला. विद्यार्थ्यांच्या हितासाठी कुणाच्याही दबावाला बळी पडणार नसल्याचं ते म्हणाले.
मुंबई : आम्ही निर्णय घेताना कोणत्याही पक्षाचं हित पाहणार नाही, आम्ही महाराष्ट्रातील विद्यार्थ्यांचं हित पाहणार. त्यामुळे कुणाच्याही दबावाखाली न येता योग्य तोच निर्णय घेऊन असं राज्याचे मुख्यमंत्री देवेंद्र फडणवीस म्हणाले. दोन ठाकरे बंधू एकत्र येऊ नये असा काही जीआर आम्ही काढला नाही, त्यांनी एकत्र यावं आणि किक्रेट खेळावं, जेवण करावं. आम्हाला त्याचा काही फरक पडणार नाही असंही मुख्यमंत्री म्हणाले.
राज्यातील शाळांमध्ये पहिलीपासून हिंदी भाषेसंबंधी काढण्यात आलेले जीआर राज्य शासनाने रद्द ठरवले. हा मराठी माणसाच्या एकजुटीचा विषय असल्याचं ठाकरे बंधूंनी सांगितलं. त्यावर मुख्यमंत्र्यांनी प्रतिक्रिया दिली.
मुख्यमंत्री देवेंद्र फडणवीस म्हणाले की, "उद्धव ठाकरे मुख्यमंत्री असताना त्यांचा उजवा हात समजल्या जाणाऱ्या नेत्याने हिंदी सक्तीची करा अशी शिफारस केली होती. तो अहवाल उद्धव ठाकरेंनी स्वीकारला. त्यामुळे हिंदीचा निर्णय त्यांच्या कार्यकाळातच झाला होता. हे दुटप्पी लोक आहेत. याचं सत्तेतले रुप वेगळं आणि विरोधातले रुप वेगळं आहे."
ठाकरेंनी एकत्र यावं, क्रिकेट खेळावं
ठाकरे बंधू एकत्र न येण्यासाठी भाजप प्रयत्न करतंय का असा प्रश्न विचारला असता देवेंद्र फडणवीस म्हणाले की, "ठाकरे बंधूंनी एकत्र येऊ नये म्हणून मी जीआर काढला नाही. दोन भावांना एकत्र येण्यासाठी मी रोखलंय का? त्यांनी एकत्र यावे, क्रिकेट खेळावं, टेनिस खेळावं, जेवण करावं, काहीही करावं आम्हाला काहीही फरक पडत नाही."
महाराष्ट्राचं हित पाहणार
देवेंद्र फडणवीस म्हणाले की, "राज्यात त्रिभाषा सूत्र स्वीकारायचं की नाही यावर आम्ही एक समिती नेमली आहे. ती समिती आता ठरवेल. आम्ही कुठल्याही पक्षाचं हित पाहणार नाही. आम्ही महाराष्ट्रातल्या विद्यार्थ्यांचं हित पाहणार. कुणाच्याही दबावाखाली झुकणार नाही."
हिंदी भाषेचा जीआर रद्द
दरम्यान, राज्यात पहिलीपासून तिसरी भाषा शिकवण्यासंबधी काढण्यात आलेले दोन जीआर राज्य शासनाने रद्द केले आहेत. अधिवेशनाच्या पूर्वसंध्येला घेतलेल्या पत्रकार परिषदेत मुख्यमंत्री देवेंद्र फडणवीस यांनी ही घोषणा केली. हिंदीला विरोध म्हणून राज ठाकरे आणि उद्धव ठाकरे हे मुंबईत मोर्चा काढणार होते. विरोधाचा मोर्चा रद्द झाला असला तरी ते विजयी मोर्चा काढण्याच्या तयारीत असल्याची माहिती आहे.
ही बातमी वाचा:
महत्त्वाच्या बातम्या
