एक्स्प्लोर

चंद्रपूर, परभणी, लातूर महापालिकांचं मतदान अवघ्या काही तासांवर

By : एबीपी माझा वेब टीम | Updated at : 18 Apr 2017 07:11 PM (IST)

मुंबई : चंद्रपूर, परभणी आणि लातूर महानगरपालिकांच्या सार्वत्रिक निवडणुकांसाठी गुरुवारी मतदान होणार आहे. 201 जागांसाठी 1 हजार 285 उमेदवार निवडणुकीच्या रिंगणात आहेत. शुक्रवारी 21 तारखेला मतमोजणी होणार आहे. एकूण 7 लाख 92 हजार 720 मतदारांसाठी 1 हजार 19 मतदान केंद्रांची व्यवस्था करण्यात आली आहे. प्रत्येक मतदान केंद्र आदर्शवत करण्याचा प्रयत्न आहे, अशी माहिती राज्य निवडणूक आयुक्त ज. स. सहारिया यांनी दिली. चंद्रपुरात 367, तर परभणीत 281 मतदानकेंद्रांवर मतदान होणार आहे. चंद्रपूर महापालिकेच्या 66 जागांसाठी 460 उमेदवार रिंगणात आहेत. परभणीत 65 जागांसाठी 418 उमेदवार आपलं नशीब आजमवत आहेत. उन्हाचा कडाका वाढला असल्यानं चंद्रपुरात मतदानाची वेळ एका तासानं वाढवण्यात आली आहे. लातूर महानगरपालिका पक्षीय बलाबल: एकूण जागा- 70

राष्ट्रवादी काँग्रेस- 13
काँग्रेस- 49
शिवसेना- 06
रिपाइं- 02

परभणी महानगरपालिका पक्षीय बलाबल: एकूण जागा- 65

राष्ट्रवादी काँग्रेस- 30
काँग्रेस- 23
शिवसेना- 8
भाजप- 2
अपक्ष- 2

चंद्रपूर महानगरपालिका पक्षीय बलाबल: एकूण जागा- 66

काँग्रेस- 26
भाजप- 18
शिवसेना- 5
राष्ट्रवादी- 4
मनसे- 1
बीएसपी-1
अपक्ष- 10
भारिप बहुजन महासंघ- 1

तिन्ही महापालिकेत एकूण 125 उमेदवार कोट्यधीश असल्याचं समोर आलं आहे. तर 64 उमेदवारांची गुन्हेगारी पार्श्वभूमी आहे. विशेष म्हणजे, 1 हजार 284 उमेदवारांपैकी एकूण 806 उमेदवार अल्पशिक्षित असल्याचं सांगण्यात आलं आहे. या निवडणुकीसाठी राज्यातील सत्ताधारी भाजपाने 44, काँग्रेसने 31, राष्ट्रवादी काँग्रेसने 19, शिवसेनेने 15 कोट्यधीश आणि लखपतींना उमेदवारी दिली आहे. या सर्व उमेदवारांची मिळून सरासरी संपत्ती काढली, तर प्रत्येकजण 50 लाखांच्या संपत्तीचा मालक आहे. गुन्हेगारी पार्श्वभूमी असलेल्यांमध्ये 64 उमेदवारांविरोधात खून, खुनाचा प्रयत्न, अपहरण, विनयभंग, दरोडा आणि जबरी चोरीसारखे गुन्हे दाखल आहेत. यातील सर्वाधिक गुन्हे हे लातूरच्या वार्ड क्रमांक 7 मधील रिपाइंचे उमेदवार चंद्रकांत चिट्टेवर यांच्याविरोधात आहेत. चिट्टेवर यांच्याविरोधात एकूण 12 गुन्हे दाखल आहेत. गुन्हेगारांना तिकीट वाटपात या निवडणुकीत काँग्रेसने बाजी मारली आहे. कारण, काँग्रेसचे 24, भाजपचे 18, शिवसेनेचे 15 आणि राष्ट्रवादी काँग्रेसचे 15 उमेदवार गुन्हेगार पार्श्वभूमीचे आहेत. फेब्रुवारी महिन्यात मुंबई, पुण्यासह दहा महापालिकांसाठी झालेल्या निवडणुकांमध्ये भाजपला घवघवीत यश मिळालं होतं. त्यामुळे चंद्रपूर, परभणी आणि लातूर महापालिकेवर कोणाचा झेंडा फडकणार, हे पाहणं उत्सुकतेचं ठरणार आहे.